PRAYER BOOK

	Umngcwabo womuntu ongayisilo ikholwa

	INkonzo endlini yomufi

	Siyalibingelela bobaba labomama kulo umsebenzi esihlangene ngawo lapha lamhla sizokhalela lokududuza abako... (isibongo) ngosizi olubehleleyo lokutshiywa yisihlobo sabo abasithandayo. Sesifikile isikhathi sokuphelekezela isihlobo sethu u... endaweni yakhe yokuphumula, asimceleleni kuMdali amvulele indlela yakhe, amemukele kuleyondawo amlungisele yona, ukuze athole ukuphumula okuhle. Kasikhulekeleni abako... ukuba uNkulunkulu abaphe induduzo epheleleyo, ngoba nguye kuphela ongenza lokho.

	Kasikhulekeni: Nkulunkulu Somandla, Simakade, nguwe owadala umuntu ngomfanekiso wakho, wamletha lapha emhlabeni. Wamdala ngoba uthanda, ulenjongo ngaye, owayigcina iyimfihlo kwabanengi. Wakubeka obala ngokufa, ukuthi awusilahlanga, njalo awusikhohlwanga. Uyasikhumbuza imihla ngemihla ukuthi siyizethekeli lapha emhlabeni, kulenye indawo osilungisela yona. Ususifuna uzasilanda njalo usise kuleyondawo. Sihlangene lamhla ukuzaphelekezela isinini sethu u... osumbizile, wamqambula phakathi kwethu. Besimthanda, sifisa ukuhlala laye, kodwa wena ubone sekufanele ukuba uhawukele isihlobo sethu lesi, wasithatha phakathi kwethu. Sicela umthethelele konke akonela ngakho, umngenise elizweni lapho azakubona khona inkazimulo yakho insuku ngensuku, akudumise ekanye lezithunywa zakho labokhokho bakhe abathola umusa wakho. Siyakuncenga, Baba, ukuba ukhumbule izinini zakhe zonke azitshiye kulumhlaba wezinyenbezi, uzilondoloze, ube lazo kokuphela, uzivikele kukho konke okulimazayo lokubi okungabaqambula endleleni obamisele yona. Yelula isandla sakho esilamandla kithi sonke esilapha, usivikele ezingozini zonke zomzimba lezomphefumulo. Akusibusise kanye lezimuli zethu, lakho konke esikwenzayo. Sicela kuwe wena ophila ubusa kuze kube laphakade. Amen.

	Ukuchelwa kwesidumbu

	Amanzi aqakathekile empilweni. Asusa yonke ingcekeza, aqede ukoma, aphe impilo. Ngala amanzi ayisibonakaliso sempilo entsha, isihlobo sethu esesingene kiyo; ngiyasichela isidumbu sesinini sethu u..., ngisicelela kuMdali ukuba amphe impilo enhle kulelo lizwe asebizelwe kilo. Angathi ngala amanzi uSomandla angamgezisa, amxolele konke amonela ngakho, amngenise edilini amlungisela lona elesembatho esihlambulukileyo.

	Izifundo: Jobe 19,1.23-27; Isa 53,1-5.10-11; Isa 25,6-9; Lilo 3,17-26; Gen 1,26-28; Gen 3,19; Eks 3,7-12; Hubo 23; Hubo 25; Hubo 27; Hubo 51; Hubo 63; Hubo 115; Hubo 130; Mat 25,1-13; Luka 15,11-24; Joha 10,14-18;.

	P. Usizo lwethu lusebizweni leNkosi B. Eyenza izulu lomhlaba.
	Kasikhulekeni: Nkosi Nkulunkulu Mninimandla wonke, wena owalalela, wezwa ukukhala kwabantu bakho, besebugqilini eGibithe, wabahawukela wehla wazabasiza, akusikhangele lathi esisosizini lokutshiywa yisinini sethu u... esizomphelekezela simletha kuwe Mdali wakhe. Sicela umamukele ngomusa wakho ongelamkhawulo; umxolele zonke iziphambeko, lamaphutha aba lawo, umngenise ekhaya lakho elilokuthula, lokuphumula okungapheliyo. Angathi Nkosi ungezwa ukukhala kwethu ukwamukele njengomkhuleko wokulabhelela isihlobo sethu lesi, sikuncenga ukuba usamukele ngesihle, usingenise ekhaya lakho, lapbo esizahlala lawe khona, sikanye lezithunywa lezihlobo zaso ezikuwe, kuze kube nini lanini. Amen.

	Ukuphelekezela umufi

	P. Nkosi, sihawukele. - Nkosi, sihawukele. P. Kristu, sihawukele. - Kristu, sihawukele. P. Nkosi sihawukele. - Nkosi, sihawukele. P. Nkosi muphe ukuphumula okungapheliyo. B. Lokukhanya okulaphakade kumkhanyele. P. Angathi angaphumula ngokuhle. B. Amen.

	Sithunywa ebesimlondoloza, nango umuntu wakho. - Hamba laye kuNkulunkulu. Lina lonke zithunywa zasezulwini, nanso isinini senu. - Hambani laso... Lina bokhokho bakhe bendlu kayise elisezulwini, nango umntanenu. - Hambani... Lina abendlu kanina elisezulwini, nango umntanenu. - Hambani... Lina zihlobo labangane bakhe abasezulwini, nanso isinini senu. - Hambani laso... Lina lonke bomakhelwane bakhe elikuNkulunkulu nanso isinini senu. - Hambani laso...

	Kasikhulekeni: Nkulunkulu Mdali wethu, sicela ngebizo leNdodana yakho, yona eyathi iyiNdlela leQiniso lokuPhila, kakho ongeza kuwe engezi ngayo. Sithi Baba nangu umuntu wakho u... akuthethelele konke akonela ngakho. Ungomunye walabo iNdodana yakho ebakhulekela isesiphambanweni isithi: Baba bathethelele ngoba abakwazi abakwenzayo. Akumngenise ekhaya lakho, umuphe ukuphila okulaphakade. Amen.

	Emva kwalo umkhuleko kubonwa isidumbu, besekuyiwa emangcwabeni

	Inkonzo emangcwabeni

	Nxa sebefikile engcwabeni isidumbu sibekwa eceleni loba phezu kwengcwaba kulungiselwe ukungcwaba ngokomkhuba. Umphathinkonzo uthi:

	Zihlobo ezithandekayo yiyo le indlu ka... esizamlalisa kuyo kuze kufike usuku lokuvuka kwabafileyo. Kasimceleleni kuNkulunkulu ukuba amlungisele indlu enhle ekhaya lakhe lasezulwini ahlale laye, aze amvuse ekufeni ngosuku lokucina athokoze laye kuze kube nininini.
	Kasikhulekeni: Nkosi wena owathi, unguMalusi olungileyo, wadela ukuphila kwakho ngenxa yezimvu zakho, njalo ulezinye izimvu ezingaphandle kwesibaya, ufuna lazo zibuye, zibe ngumhlambi munye lomalusi munye. Nangu u... esimletha kuwe ungomunye wezimvu zakho, owawufisa ukuba lazo zingene emhlambini wakho, akumhawukele, umthethelele konke akona ngakho, umngenise emhlambini wakho ePharadise, ahlale lawe kokuphela. Amen.

	P. Nkosi zwana umkhuleko wethu B. Lokukhala kwethu akufike kuwe.

	Ukubusiswa kwengcwaba

	Kasikhulekeni: Nkosi Nkulunkulu, Nkosi yezulu lomhlaba, yiyo le indlu yomntanakho u... esiza kumlalisa kuyo. Akuyibusise, uthumele izithunywa zakho zizoyilondoloza ukuze izitha, lamandla obubi angasondeli kuyo. Ngebizo likaYise, + leleNdodana, lelikaMoya oNgcwele. Amen.

	Ukungeniswa kwesidumbu

	... ngena endlini yakho le, uphumule ngobuhle, uhlale ngokuthula kuze kufike usuku uNkulunkulu azakuvusa ngalo kwabafileyo. Amen.

	Ukuvuvuzela ngomhlabathi

	Khumbula muntu (thela inhlabathi) ukuthi uluthuli (thela inhlabathi) lokuthi uzabuyela futhi othulini. (thela inhlabathi)

	Ukubusiswa kwelitshe

	Nkulunkulu wena olidwala elilaphakade, akubusise + ilitshe leli, libe lidwala lokuphumula okulaphakade kwesihlobo sethu lesi esisilalise lapha. Angathi lelilitshe eliyisibonakaliso sakho wena olidwala elilaphakade lingamupha umthunzi ongadluliyo. Amen.

	Ukubusiswa kwehlahla

	Nkulunkulu Baba akubusise + ihlahla leli eliyisitshengiselo sokuthi wena ulihawu lethu elisivikela kokubi konke. Akuhawukele isinini sethu esesisilalise lapha, usivikele usiphe ukuphumula okungapheliyo. Amen.

	Inkonzo yokuhlambulula umuzi

	Yenziwa emva kokungcwatshwa komuntu. Iqondana lokugezisa amakhuba loba ingcekeza loba utshwala bamanzi loba ukuchithwa komlotha. Kungumkhuba ojwayelekileyo kuleli elakithi ukuthi nxa abantu sebeqedile ukungcwaba umuntu bageze, bazihlambulule, ngoba bekholwa ukuthi lokho kuzasusa umnyama lamatshwa kibo. Lanxa thina singakholwa ukuthi ukubamba isidumbu somuntu kuletha umnyama lamatshwa, singathatha isiko lokugeza lokuzihlambulula, sibe batsha, sifanele ukungena ekhaya likaNkulunkulu mhla sifayo. Thina amaKristu singathatha amanzi abusisiweyo, sigeze ngawo. Ekugezeni izandla kuthiwa:

	Ungigezise Nkosi ebubini bami, Ungihlambulule ezonweni zami (Hubo 51,2).

	Ukuchela abantu lendlu lokunye. Nxa umkhokheli ebona ukuthi kulokwesaba okuthile ebantwini emva kokungcwatshwa komuntu, angaphinda abachele ngamanzi angcwele, achele lendlu, lezinye izinto, emva kokutshela abantu ukuthi ufuna ukuxotsha amatshwa lezingozi zonke. Amazwi angawasebenzisa ekucheleni yila:

	K. Khathesi sesizachela abantu, lendlu lezitsha zokudlela lokunye okusetshenziswayo, lomuzi wonke, ukuba nxa kukhona amandla amabi axotshwe nguNkulunkulu, kusale izibusiso lamandla akhe, lapha ekhaya, abantu bangesabi, ngoba sebelondolozwa nguNkulunkulu.

	Ukuchelwa kwabantu

	K. Hlambulula abantu bakho, Nkosi, ubavikele kuwo wonke amandla ezitha, ubalondoloze ngamandla akho angehlulwa yilutho. Ngebizo likaYise, + leleNdodana, lelikaMoya, oNgcwele. Amen.

	Abesehamba ebachela engakhulumi lutho. Ukuchelwa kwendlu, phakathi langaphandle

	K. Nkosi Nkulunkulu Baba, hlambulula indlu le kukho konke okubi, uxotshe wonke amandla amabi angabe ekulindlu loba efuna ukusondela kuyo. Londoloza kuhle bonke abahlala kuyo, ubavikele ngamandla akho angehlulwa lutho. Ngebizo likaYise, + leleNdodana, lelikaMoya oNgcwele. Amen.

	Uchela izitsha zokudlela lezinye izinto.

	K. Nkosi Nkulunkulu Baba, ake ubusise izitsha lezi lakho konke okusetshenziswa kulindlu (kulumuzi), uzikhulule kuwo wonke amandla alimazayo. Ngebizo likaYise, + leleNdodana, loMoya oNgcwele. Amen.

	Ukuchela umuzi wonke

	K. Nkosi Nkulunkulu Baba, ake ubusise umuzi lo, uwuhlambulule ebubini bonke, uwuvikele ezingozini zonke lasemandleni kaSathane, ulondoloze kuhle bonke abahlala kuwo. Ngebizo likaYise, + leleNdodana, lelikaMoya oNgcwele. Amen.

	Emva kokubusiswa komuzi besekukhulekwa imikhuleko yekhanda, kukhulekelwa ofileyo, lezinini zakhe. Izingoma zingahlatshelwa phakathi kwemikhuleko.

	Izinkonzo zesikhumbuzo

	Ingcazelo
	Thina amakristu sikhumbula abasitshiyayo bethu ngenkonzo yesikhumbuzo. Isikhumbuzo senziwa emva komnyaka umuntu esitshiyile. Abanye basenza ngosuku lokufa kwalowo aba-mkhumbulayo kumbe ngesikhathi ababona sibalungele. Inkonzo yesikhumbuzo ithatha indawo yombuyiso wesintu ovame ukwenzelwa umuntu omdala. Kodwa kithi amakristu iyenzelwa loba ngumntwana loba umuntu omdala. Into eqakathekileyo yisifiso sezihlobo ukuba isihlobo sabo esife silikholwa kuKristu senzelwe linkonzo. KuMakhabi kukhulunywa ngesikhumbuzo, kuthiwa: ‘Kungakho wenzela abafileyo umhlatshelo wokubuyisana ukuze bathethelelwe izono zabo”(2 AbaMakhabi 12,45b). Ngokunjalo nxa sisembula ilitshe loba sibusisa ingcwaba, sikhumbula ukuthi lo olele lapha angaba sezulwini loba esihlanjulweni nxa efele eNkosini. Nxa esezulwini, angasi- celela lathi kuNkulunkulu ukuba asilondoloze kanye labomuzi wakhe. Ngalinkonzo yesikhumbuzo sicela ukuba iNkosi ixotshe ithunzi lokufa lobumnyama obembese lumuzi. Sithi thina Nkosi sesimlilele, umntanakho, kwanele. Akuhlambulule lo, owembethe inzilo. Uhlambulule lomuzi wonke ulethe ukukha- nya kwakho lentokozo lapha ekhaya. Futhike, siyakholwa ukumanyana kwalabo abasitshiyayo labaphilayo ngoba kuthiwa: Uba umuntu efela eNkosini, lathi esiphila eNkosini, simunye kuKristu. “Ngenxa yalokhu uKristu wafa, wabuya wa- phila ukuba abe yiNkosi yabafileyo labaphilayo”(Roma 14,9). Kule iNkonzo sisebenzisa izinto ezithile. Sisebenzisa amanzi angcwele ayisikhumbuzo sombhabhathizo wethu. Amakha- ndlela afanekisa ukukhanya kukaKristu esakuthola mhla sibhabhathizwa. IBhayibhili liqukethe ilizwi likaNkulunkulu. Njalo sisebenzisa impepha elephunga elimnandi sinxusa uNkulunkulu ukuba enyusele umphefumulo womzalwane wethu ezulwini, sixotsha imimoya emibi lethunzi lokufa. Nxa sisembula ilitshe loba sibusisa ingcwaba, sicela uNkulunkulu ukuba amvulele amasango asezulwini, ahlangane laye ubuso ngobuso. Sizaqhubeka simkhumbula ngalezonsuku asitshiya ngazo ngeMisa eNgcwele.

	Inkonzo yesikhumbuzo emakhaya

	P. Ngebizo likaYise, + leleNdodana, lelikaMoya oNgcwele. B. Amen. P. Umusa weNkosi yethu uJesu Kristu, lothando lukaNkulunkulu uBaba, lokuhlanganyela kukaMoya oNgcwele, kakube lani lonke. B. Kakube lawe njalo.

	K. Bazalwane bami abathandekayo, lamhlanje lusuku oluqakathekileyo emulini yako... lapha abakhumbula khona u... owasitshiyayo. Injongo yale inkonzo yethu yikuba simkhulekele ukuze umphefumulo wakhe wenyuselwe ezulwini. Sinikela inkonzo le ukuze uNkulunkulu ahlambulule umoya wakhe. Njalo yinkonzo yokuchitha ithunzi lokufa lapha ekhaya simncenga uBaba uSomandla ukuba asuse ubumnyama obembese imuli ngenxa yokufa. Lamhlanje, sigqiba isikhathi imuli ebimzilela, imlilela ngaso. Sithi Baba, Nkosi yezulu sesimlilele umntanakho u..., sekwanele. Sicela ubuyisele impilo entsha lapha ekhaya, uhlambulule lumuzi, kube lokuthokoza lokuthula kiwo. Bathandekayo, ukuze uNkulunkulu emukele ukukhala kwethu, kasiqaleni ngokuhlolisisa inhliziyo zethu, sizisole ngokona kwethu.

	Ngiyavuma...

	K. UNkulunkulu uMninimandla wonke akasihawukele asithethelele izono zethu, asiphe ukuphila okulaphakade. Amen. Nkosi, sihawukele... (3x)

	Emva kukaNkosi sihawukele, kuthathwa amanzi azasetshenziswa. Kusuka lapho, abantu baya ethuneni besuka ngekhaya ngenhlonipho behlabela ingoma. Bengafika ethuneni bangabala isifundo sibe sinye esikhethiweyo, kuze ingoma lengcazelo emfitshane, besekubusiswa ingcwaba lichelwe ngamanzi angcwele, kuthunqiselwe impepha, kufakwe amakhandlela phezu kweliba lomufi, atshiywe ebhebha. Nxa kulabanye abeze lamaluba, bangawabeka elibeni. Izifundo: 2 abaMakhabi 12,43-45; Eklesiyastiku 44,1-15. Ukubusiswa kwengcwaba ngamanzi angcwele

	K. Nkulunkulu Baba, ngalamanzi ayisikhumbuzo sombhabhathizo lesibonakaliso sosindiso, ake uhlanganise umzalwane wethu lo u... olele lapha labangcwele bonke abasezulwini. Sicela ngeNdodana yakho uJesu Kristu. Amen. (Chela)

	Ukuthunqisela ngempepha

	K. Somandla wena owakhokhela abantu bakho uIsrayeli ngensika yeyezi, siyakuncenga ukuba ukhokhelele umphefumulo ka... ezulwini. Ngale impepha akwenze umoya wakhe ube lephunga elimnandi, uwemukele ezulwini, njalo uxotshe imimoya engalunganga. (Thunqisela)

	Ukulumathisa amakhandlela:

	P. Nkosi muphe ukuphumula okungapheliyo. B. Lokukhanya okulaphakade kumkhanyele. P. Angathi angaphumula ngobuhle. B. Amen.

	Ukukhulekela ilitshe

	K. Nkosi, sikhulekela umzalwane wethu u... ukuba umemukele ekhaya lakho lasezulwini, ikhaya ayelifisa esahamba emhlabeni. Angathi uKristu onguye idwala lethu, lensika yengonsi, angaba ngumthunzi wakhe ongakhawukiyo, lomvikeli wemuli yakhe. Sicela ngo-Kristu iNkosi yethu. Amen.

	Ukususwa kwelembu

	“Uba safa kanye laye, sizakuphila kanye laye futhi, uba sabekezela laye, sizakubusa kanye laye uba simphika, laye uzasiphika” (2 Tim 2,11-12).

	Umkhuleko wokuvala

	K. Nkulunkulu Baba, sesisuka lapha sisiya ngekhaya. Sesicela ukuthi ugcine umzalwane wethu lo asale ezandleni zakho, asikhulekele lathi size sifinyelele kuwe. Amen.

	Udwendwe kuyiwa ngekhaya, kuhlatshelwa ingoma. Ukungena ekhaya

	K. Nkulunkulu Baba, sesingena lapha kulumuzi sicela ukuthi ngala amanzi, langale impepha uwuhlambulule kanye labo bonke abahlala kuwo. Letha ukukhanya kwakho uxotshe bonke ubumnyama. Xotsha ithunzi lokufa, lokwesaba emulini yakho. Siyazi Nkosi ukuba kawusamukelisanga umoya wobugqili ukuba sesabe kodwa usemukelisa umoya wobuntwana esimemeza ngawo sisithi: Aba, Baba. Lamhlake, Baba phana imuli yakho ukuthula lentokozo, wesule izinyembezi zayo. Akwenze isungule ukuphila okutsha okukhokhelelwa nguMoya oNgcwele. Sicela ngoKristu iNkosi yethu. Amen.

	Kuhlatshelwa izingoma ngesikhathi kuchelwa umuzi Endaweni lapho okuzakwenzelwa khona inkonzo, owembethe inzilo ulungiselwa indawo, lapho azaguqa khona phambili, abekwe izandla abusiswe, achelwe ngamanzi kanye lesembatho sakhe esitsha. Ukukhulekelwa ozilileyo

	K. Nkosi Jesu Kristu, wena oyiNdlela, leQiniso, lokuPhila kwethu, khangela ngamehlo alomusa umntanakho lo u... ozilele omunye wakhe. Siyakuncenga lamhlanje ukuba umkhulule wena. Uselilile Baba, sekwanele, lamhlanje siyakuncenga ukuba umkhuphe wena inzilo le ayembetheyo, umvuselele aphile impilo entsha. Muphe ukukhanya kwakho aphile impilo eyisibonelo. Sicela ngoKristu iNkosi yethu. Amen.

	Isembatho

	K. Nkulunkulu Somandla, akubusise isembatho lesi, wenze lowo osigqokayo avuselelwe kutsha emzimbeni lasemphefumulweni. Akumvikele kuzo zonke inkathazo, ukuze akukhonze ngentokozo, langokuthula. Amen.

	Uyaphuma ayekhupha inzilo, ephelekezelwa ngabanye, iBandla lisale lihlabela. Ekubuyeni kwakhe, iBandla lonke liyasukuma, kuhlatshelwe uDumo... Umkhuleko

	K. Nkulunkulu Baba, Mdali wezinto zonke, olesihawu esingapheliyo, akwemukele inkonzo yethu le, uthethelele umzalwane wethu owasitshiyayo u... umngenise embusweni wakho. Menze athokoze labokhokho bakhe abasezulwini, umuphe ukuphumula okungapheliyo, asicelele lathi esilapha emhlabeni ukuze ngolunye usuku sifinyelele ukuhlangana laye embusweni wakho olenjabulo engapheliyo. Yelusa ngothando abendlu yakhe abasesemhlabeni ubavikele enkathazweni zonke ezomzimba lezomphefumulo. Baphe inhlanhla yokuphila ngokuthula kungekho ukwesaba phakathi kwabo, uxotshele khatshana amandla omubi. Sicela ngoKristu iNkosi yethu. Amen.

	Izifundo: 2 abaMakhabi 12,43-45; Eklesiyastiku 44,1-15; Roma 5,1-11; Roma 6,3-10; 1 Kho 15ff; Mat 17,1-8; 22,23-32; Mat 27,45-53; Marko 5,37-42; Marko 12,18-27; Luka 7,11-17; Joha 3,13-21; Joha 4,5-15; Joha 5,19-25f f; Joha 11,32-40.
	Intshumayelo Izikhalazo Umnikelo
	Inkonzo iyaqhubeka njengokwejwayelekileyo kuze kuyefika emaphethelweni.

	Inkonzo yesikhumbuzo
	(Emadolobheni - Ukwembula kwelitshe)

	K. Ngebizo likaYise, + leleNdodana, lelikaMoya oNgcwele. B. Amen. K. Umusa weNkosi yethu uJesu Kristu, lothando lukaNkulunkulu uBaba, lokuhlanganyela kuka-Moya oNgcwele, kakube lani lonke. B. Kakube lawe njalo.

	Isingeniso seNkonzo

	K. Bazalwane, thina esikholwa kuKristu asikhulumi ngokubuyisa ngoba sikholwa ukuthi labo abasitshiyayo, imiphefumulo yabo isiyedlulele ekhaya lasezulwini. Kodwa lanxa kunjalo singeze saphawula ngokweqiniso ukuba imiphefumulo yabo isezulwini. Ngakho-ke, nxa sibenzela inkonzo yesikhumbuzo kuyindlela yokubalabhelela ukuba uNkulunkulu abazwele isihawu emukele imiphefumulo yabo. Siyayicelela leyomphefumulo ukuba ithethelelwe izono, ihlanzwe ibemhlophe. Ukuze uNkulunkulu emukele umkhuleko wethu, asizisoleni ngezono zethu.

	Ngiyavuma kuNkulunkulu... Nkosi, sihawukele...

	Kasikhulekeni: Nkosi Jesu Kristu wena oyikuvuka lokuphila, siyacela ukuba umzalwane wethu lo, olele kulelithuna, aphumule ngoxolo kuze kufike usuku ozamvusa ngalo. Mngenise ekukhanyeni kwasezulwini, abone ubukhosi bakho, ahlale lawe, wena ophila ubusa kuze kube laphakade. Amen.

	Izifundo: Kungabalwa esinye salezizifundo, kuchasiswe ngamafitshane: Mat 11,25-30; 2 abaMakhabi 12,43-44; 1 Tes 5,4-10; Roma 14,7-9 lezinye ezinjalo. Nxa singasoze senze inkonzo yesikhumbuzo ngekhaya, siyenza izikhalazo. Kodwa uba sizaqhuba inkonzo ngekhaya, asenzi izikhalazo.

	Izikhalazo: Bazalwane abathandekayo, asikhulekeni ngokuzithoba kuNkulunkulu uBaba wesihawu sicelele umzalwane wethu ofele eNkosini. Nkulunkulu olobubele, ake umthethelele izono zakhe. Nkosi, silalele... Ake wemukele imisebenzi yakhe emihle ayenza esahamba lapha emhlabeni. Nkosi, silalele... Ake ube lomusa umngenise ekuphileni okulaphakade. Nkosi, silalele... Ake wandise ukholo lwabemuli, uqinise lethemba labo. Nkosi, silalele...

	Ukubusiswa kwamanzi lamakhandlela.

	Kasikhulekeni: Nkulunkulu Baba, ake ubusise + amanzi la ayisikhumbuzo sombhabhathizo wethu. Busisa amakhandlela la + ayisikhumbuzo sokukhanya kukaKristu phakathi kwethu. Sicelela isikhonzi sakho u... ukuba usamukele ekhaya lakho lasezulwini. Sicela ngoKristu iNkosi yethu. Amen.

	Ukubusiswa kwengcwaba Umphathinkonzo wembula ilitshe, abesedweba isibonakaliso sesiphambano. Nxa ilitshe selilesiphambano, ulandela uphawu oludwetshwe elitsheni esitsho la amazwi:

	K. Nkosi, sikhulekela umzalwane wethu u.... ukuba umemukele ekhaya lakho lasezulwini, ikhaya ayelifisa esahamba emhlabeni. Angathi uKristu onguye idwala lethu, lensika yengonsi, angaba ngumthunzi wakhe ongakhawukiyo, lomvikeli wemuli yakhe. Sicela ngoKristu iNkosi yethu. Amen.

	Ukususwa kwelembu

	K. Mina ngiyikuvuka lokuphila, lowo okholwa kimi uzakuphila loba esefile. Lalowo ophilayo ekholwa kimi, kasayikufa lanini (Joha 11,25-26).

	Emva kwalokhu ithuna liyachelwa ngamanzi angcwele, beselithunqiselwa ngempepha. Esinye isinini somufi silumathisa amakhandlela siwafake ethuneni sisithi:

	K. Nkosi muphe ukuphumula okungapheliyo. B. Lokukhanya okulaphakade kumkhanyele. K. Angathi angaphumula ngobuhle. B. Amen.

	Baba wethu Isibusiso

	P. INkosi kayibe lani. K. Kayibe lawe njalo. K. UNkulunkulu uMninimandla wonke akalibusise alilondoloze, alivikele enkathazweni zonke, uYise, + leNdodana, loMoya oNgcwele. Amen.

	Nxa inkonzo izaqhubeka ngekhaya, sizalandela indlela yeNkonzo yesikhumbuzo ephezulu.