PRAYER BOOK

	UKUNGCWATSHWA KOMUNTU OSEKHULILE

	Isingeniso: Ezizweni zonke ukufa komuntu kuyinto eyaziswayo kakhulu, eqakathekileyo lelungiselelwa ngesizotha esikhulu. Nxa amakholwa ekhokhela imingcwabo, adonsela abangakholwayo eBandleni. Njalo uma amakholwa evilapha ukukhokhela inkonzo zemiduduzo lemingcwabo, bephatha butshapha inkonzo zawo, angalahlekelwa ngamalunga amanengi, abalekele kwamanye amasonto. Ngakho-ke, inkonzo yokungcwaba umuntu imele ilungiselelwe kuhle kakhulu ukuze isuthise abantu bonke, ibahlabe umxhwele. Abakhokheli bangezwa nje ukuthi emzini othile kufiwe bamele baphangise ukuya khona, bayekhalela abantu, babone lezinswelo ezikhona, batshele amakholwa ukuba asize ngokwamandla awo. Ekufikeni kwabo lapho okufiwe khona, kabazithobe, bacele imvumo kumninimuzi yokwenza lokho abafuna ukukwenza, lanxa abalowomuzi bengamakholwa. Abakhokheli bangaphathisana labafelweyo ukuhlela uhlelo lomngcwabo. Izifundo: Isa 25,6a.9; 1 Kor 15,20-28; Joha 14,1-3.

	Inkonzo endlini yomufi
	Ingoma Isibonakaliso sesiphambano Ukubingelela Isingeniso:

	Bobaba labomama, ebizweni leBandla lethu lalapha e... ngiyethula ukukhala kwethu; sikhalela abako... (isibongo) ngosizi olubehleleyo. Ngiyacela ukuba sonke khathesi sethule ukukhala kwethu losizi lwethu kuNkulunkulu, simncenge ukuba umphefumulo wesinini sethu u..., awuse ekuphumuleni okungapheliyo, njalo ehlisele izibusiso zakhe lenduduzo yakhe ezininini zakhe ezisele ziphakathi kosizi.

	Kasikhulekeni: Nkulunkulu Somandla Simakade, siyazi ukuthi nguwe obize umzalwane wethu u..., ukuba asuke kulumhlaba, eze kuwe. Siyakuncenga, Nkosi elomusa, ukuba umbeke endaweni enhle elokuthula lokuphumula lokuthokoza okungapheliyo. Nxa kukhona akonela khona, siyacela ukuba umthethelele ngenxa yomusa lokulunga kwakho, langenxa yezinzuzelo zikaJesu Kristu iNdodana yakho eyamhluphekela kabuhlungu esiphambanweni. Siyakuncenga Baba, ukuba ukhumbule izinini zakhe zonke azitshiye kulumhlaba wezinyembezi, uzilondoloze, ube lazo kokuphela, uzivikele kukho konke okulimazayo, lasemandleni kaSathane. Yelula isandla sakho esilamandla kithi sonke esilapha, usivikele ezingozini zonke zomphefumulo lezomzimba, usibusise kanye lezimuli zethu lakho konke esikwenzayo. Sicela ngoKristu iNkosi yethu. Amen.

	Nxa umufi engayi ecaweni, singaqhubeka ngenkonzo eyenziwa ecaweni.

	Inkonzo ecaweni Umphathinkonzo uchela isidumbu ngamanzi angcwele esitsho lo umkhuleko:

	P. Ngiyasibusisa isidumbu somzalwane wethu u... + (chela ngamanzi) okusikhumbuza umbhabhathizo wakhe uPhawuli ongcwele aloha ngawo esithi: Thina esabhabhathizelwa ekufeni kwakhe, ngalokhuke sambelwa loKristu ngokubhabhathizelwa ekufeni ukuba, njengoba uKristu wavuka kwabafileyo ngobukhosi bukaYise, ngokunjalo lathi sihambe ekuphileni okutsha. Ngoba uba sihlanganisiwe kanye laye ngokufa okufana lokwakhe, sizahlanganiswa kanye laye futhi ngokuvuka okufana lokwakhe.
	Isidumbu singeniswa ecaweni kuhlatshelwa ingoma kumbe kusenziwa ihubo.

	P. INkosi kayibe lani. B. Kayibe lawe njalo. Bazalwane abathandekayo, njengoba sesingenise umzalwane wethu u... ecaweni (njengoba sesiphelekezela umzalwane wethu u... endaweni yakhe yokuphumula), kasiceleni uNkulunkulu uBaba ukuba amamukele, ekhaya lakhe lasezulwini, izithunywa zakhe labangcwele bakhe bamamukele, bahlale laye kuze kube nini lanini.

	Kuyaqhutshekwa ngeNkonzo yeMisa loba ngeNkonzo yeLizwi. (nxa kungelaMpristi). Izifundo ezingabalwa: Joha 11,21-27; Joha 6,37-40; Joha 9,4; Joha 6,51; Joha 14,1-6; Roma 8,38-40; 14,8-9;1 Kor 13,12; 15,20-23; 2 Kor 4,18; 2 Kor 5,10; 1 Tes 4,13-18; 1 Tim 6,7; Isa 14,13; 21,1-7. Emva kwesifundo kulandela intshumayelo. Emva kweNkonzo kuqhutshekwa kanje:

	P. Nkosi, zwana umkhuleko wethu. B. Lokukhala kwethu akufike kuwe. Nkulunkulu, Nkosi yezulu, Mninimhlaba lezinto zonke, Baba olomusa, khangela lapha thin’abantwabakho, sizophelekezela umntanakho u..., simletha kuwe. Nguwe ombizileyo; nguwe omqambule phakathi kwethu, wambizela kuwe. Sicela ukuba kungabi lenye indawo angaya kuyo ngaphandle kweyakho. Mamukele, ahlale lawe wena Mdali wakhe. Mxolele zonke iziphambeko zakhe, umngenise ekhaya lakho lokuthula lokujabula okungapheliyo. Mhawukele, ungamthonisisi ngolaka, ungamjezisi, uzwe lemikhuleko yabangcwele bakho abamkhulekelayo, umngenise ekhaya lakho lasezulwini, ahlale lezithunywa labangcwele bonke, lezinini zakhe ezisezulwini, kuze kube nini lanini. Amen. P. Nkosi, sihawukele. - Nkosi, sihawukele. P. Kristu, sihawukele. - Kristu, sihawukele. P. Nkosi sihawukele. - Nkosi, sihawukele. P. Nkosi muphe ukuphumula okungapheliyo. B. Lokukhanya okulaphakade kumkhanyele. P. Angathi angaphumula ngokuhle. B. Amen.

	Mariya oNgcwele, Nina kaJesu, loMama wethu sonke. Nango umntanakho.- Hamba laye kuNkulunkulu. Josefa oNgcwele, Mondli kaJesu lowamakholwa onke, nango umntanakho. - Hamba... Wena sithunywa sakhe ebesimlondoloza, lawe mngcwele wakhe, nango umuntu wenu. - Hambani... Lina lonke zithunywa zasezulwini, nanso isinini senu. - Hambani laso... Lina lonke bangcwele elisezulwini, nanso isinini senu. - Hambani laso... Lina bokhokho bakhe bendlu kayise elisezulwini, nango umntanenu. - Hambani... Lina abendlu kanina elisezulwini, nango umntanenu. - Hambani... Lina lonke zinini labangane bakhe elisezulwini, nanso isinini senu. - Hambani laso... Lina elalikhonza laye, elisezulwini nanso isihlobo senu. - Hambani laso... Lina lonke bomakhelwane bakhe elikuNkulunkulu, nanso isinini senu. - Hambani...

	Kasikhulekeni: Nkosi Jesu Kristu, wasilaya wathi: Celani lizakuphiwa, funani lizakufumana, Qoqodani lizakuvulelwa. Siyacela ukuba usikhulumele kuNkulu nkulu uBaba, athethelele umzalwane wethu lo u... izono zakhe zonke, amvulele izulu, lapho azajabula khona labangcwele bonke, lezinini zakhe ezasindiswayo. Wena ophila ubusa ndawonye loYihlo loMoya oNgcwele, kuze kube laphakade. Amen.

	Umkhuleko wokucela ukuthethelelwa P. Ngiyakhala kuwe, Nkosi ngicwile enzikini yosizi; Nkosi zwana ilizwi lami. B. Nkosi zwana ilizwi lami. Sengathi indlebe zakho zingalizwa ilizwi lokukhala kwami. - Nkosi zwana ilizwi lami. Nkosi, uma ukhumbula izono zethu, ngubani ongasindiswa na? - Nkosi ... Kuwe kukhona umusa lokuthethelelwa. Ngenxa yalokho ngikulindele, Nkosi. - Nkosi ... Umphefumulo wami weyame elizwini lakho, umphefumulo wami uthembe kuwe Nkosi yami. - Nkosi ... Kusukela ekuseni kuze kuhlwe, uIsrayeli kathembe eNkosini. - Nkosi ... Ngoba eNkosini kukhona umusa, losindiso olulaphakade. - Nkosi ... Yiyo ezakuhlenga uIsrayeli ebubini bakhe bonke. - Nkosi ... P. Nkosi, muphe ukuphumula okungapheliyo. B. Lokukhanya okulaphakade kumkhanyele. P. Angathi angaphumula ngobuhle. B. Amen.

	P. Kasikhulekeni: Nkulunkulu nguwe uMdali wabantu bonke, nguwe onguMsindisi wabo, zwana ukukhala kwethu. Xolela umntanakho (u....) konke akona ngakho. INdodana yakho, uJesu Kristu owahlupheka eGetsemani watshaywa ngoswazi, wafela esiphambanweni esenzela (u...) ukuthi athole ukuphila okungapheliyo. Akumamukele, uhlale laye, umuphe impilo elaphakade. Sicela ngoKristu iNkosi yethu. Amen.

	Ukuchelwa kwesidumbu ngamanzi angcwele

	Bazalwane abathandekayo, isizwe esikhethiweyo sika-Nkulunkulu sadabula phakathi kwamanzi oLwandle oluBomvu lawomfula iJordani, sisuka ebugqilini baseGibithe, sisiya elizweni lesithembiso. Kasiceleni uNkulunkulu ukuba ngesibonakaliso salamanzi ahlambulule umzalwane wethu lo u... ezonweni zakhe zonke, amngenise elizweni lesithembiso elasezulwini. Ngesibonakaliso salamanzi angcwele, ake uhlambulule Nkosi umzalwane wethu u..., aphume ebugqilini besono, afinyelele elizweni lesithembiso sokuphila okungapheliyo lentokozo engelamkhawulo, (abesechela esithi:) Ngebizo likaYise, + leleNdodana, lelikaMoya oNgcwele. Amen.

	Ukuthunqiselwa kwesidumbu ngempepha

	UNkulunkulu wakhokhela abantu bakoIsrayeli enjengensika yeyezi emini, leyomlilo ebusuku, ebasa elizweni lesithembiso. Angathi angakhokhela umzalwane wethu lo u..., afike ezulwini, ekhaya elilokujabula, lokuphila okulaphakade, Ngebizo likaYise, + leleNdodana, lelikaMoya oNgcwele. Amen.

	Umkhokheli unikeza kumphathumngcwabo onguye ozakutsho okulandelayo. Emva kwalokho, isidumbu besesithwalelwa emangcwabeni.

	Inkonzo emangcwabeni

	Nxa umpristi engekho abakhokheli bandise ukuphatha inkonzo yomngcwabo bebathathu ukuze kube lesithunzi. Nxa besiya emangcwabeni bahamba phambi kwesidumbu belinganisene. Nxa befika engcwabeni bama ngasenyaweni zethuna kuze kuthi nxa bekhuleka bakhangele ubuso bofileyo. Abakhonzayo bathwala amanzi angcwele lempepha. Nxa isidumbu sesibekiwe eceleni loba phezu kwengcwaba umphathinkozo uthi:

	P. Bazalwane abathandekayo, yiyo le indlu ka..., esiza kumbeka kiyo, ukuba aphumule kuyo kuze kufike usuku lokuvuka kwabafileyo. Kasimceleleni kuNkulunkulu ukuba amlungisele indlu enhle ekhaya lakhe lasezulwini ahlale laye, aze avuke ekufeni ngosuku lokucina, athokoze laye kuze kube nini lanini.

	Kasikhulekeni: Nkosi Jesu Kristu, wena owathi: Mina ngiyikuphila lokuvuka kwenu. Siyakuncenga ukuba wamukele umzalwane wethu lo u..., owamhlawulela ngokumfela esiphambanweni, osebizwe nguNkulunkulu uYihlo, uhambe laye ePharadise, ahlale lawe kuze kube nini lanini. Amen.

	Ukubusiswa kwengcwaba

	P. Nkosi zwana umkhukelo wethu. B. Lokukhala kwethu akufike kuwe. Kasikhulekeni: Nkosi Nkulunkulu, Nkosi yezulu lomhlaba, yiyole indlu yomntanakho u..., esiza kumlalisa kuyo. Ake uyibusise uthumele izithunywa zakho ziyilondoloze, ukuze izitha zingasondeli kuyo, Ngebizo likaYise, + leleNdodana, lelikaMoya oNgcwele. Amen.

	Ukuchelwa kwengcwaba ngamanzi angcwele

	Ngichela indlu ka..., ngamanzi angcwele ukuba iNkosi imuse emadlelweni amahle lasemanzini okuphila kwasezulwini, Ngebizo likaYise, + leleNdodana, lelikaMoya oNgcwele. Amen.

	Ukuthunqiselwa kwengcwaba ngempepha

	Ngithunqisela indlu ka..., ngempepha engcwele, ukuba umoya wakhe wenyukele ekuphileni okulaphakade. Ngebizo likaYise, + leleNdodana, lelikaMoya oNgcwele. Amen.

	Ukubekwa kwesidumbu elibeni

	K. ... ngena endlini yakho le, uphumule ngobuhle, uhlale ngokuthula, kuze kufike usuku uKristu azakuvusa ngalo kwabafileyo. Amen.

	Isidumbu besesingeniswa elibeni kuhlatshelwa ingoma emphelekezela ukungena ekhaya elilaphakade; Izulu lilikhaya; Kulelizwe lenjabulo; njalo njalo. Ukuvuvuzela isidumbu ngomhlabathi. Lowo lalowo ovuvuzelayo uthi:

	Khumbula muntu ukuthi uluthuli, lokuthi uzabuyela futhi othulini.

	Kumbe abafundisi bonke bafole engcwabeni bephethe inhlabathi:

	Njengoba kube yintando kaNkulunkulu ukubiza umzalwane wethu u..., ukuba asuke kulokhu kuphila, aye kuye, sesibeka isidumbu sakhe sisithi: Umhlabathi ubuyela emhlabathini; (Bathela inhlabathi kanyekanye); Uthuli lubuyela othulini; (Bathela inhlabathi); Umlotha ubuyela emlotheni; (Bathela inhlabathi). Siyazi ukuthi uKristu uzamvusa othulini akhazimulise umzimba wakhe ngosuku lokucina. Amen.

	Ukubusisa ilitshe

	Nkulunkulu wena olidwala elilaphakade, ake ubusise + ilitshe leli wenze ukuba umzalwane wethu lo, ahlale kuwe kokuphela wena olidwala elilaphakade, ongumthunzi wakhe ongadluliyo.

	Ukubusisa ihlahla

	Nkulunkulu Baba, ake ubusise + ihlahla leli, elitshengisela ukuthi wena ulihawu lethu osivikela kokubi konke. Akumhawukele umzalwane wethu esesimbekile lapha, uvikele umphefumulo wakhe ekulahlweni okulaphakade, aphumule ezulwini lakho.

	Ukubusisa isiphambano

	Nkulunkulu Baba, ake ubusise lesi siphambano + esiyisibonakaliso sokusindiswa kwethu nguKristu lethemba lokuvuka kwethu ngosuku lokucina. Ngebizo likaYise, + leleNdodana, lelikaMoya oNgcwele. Amen.

	Inkulumo zokubonga.
	Nxa ingcwaba seligqitshelwe, umsebenzi usuphelile, umkhokheli ubonga bonke abaphathisileyo enkonzweni, labo bonke abakhona. Emva kwakhe izinini zomufi ziphiwa ithuba lokubonga abasizileyo.
	Umkhuleko wokuphetha

	P. Nkosi muphe ukuphumula okungapheliyo. B. Lokukhanya okulaphakade kumkhanyele. P. Angathi angaphumula ngobuhle. B. Amen. Kasikhulekeni: Nkosi, Nkulunkulu Baba, sesimphele kezele umzalwane wethu u... Sesimtshiya kuwe, ukuba agcinwe nguwe. Ake ulondoloze imuli lezihlobo zakhe zonke azitshiye lapha emhlabeni. Busisa bonke abaphathisileyo kulinkonzo, ube labo insuku ngensuku, ubaphephise ezingozini zonke zokomoya lezomzimba. Sicela ukuthi nxa u... esicelela kuwe ulalele imikhuleko yakhe, usisize ukuba sifinyelele ekhaya lakho lasezulwini. Sicela ngoKristu iNkosi yethu. Amen.

	Ukubusiswa kwabantu.

	P. INkosi kayibe lani. B. Kayibe lawe njalo. P. Akalibusise uNkulunkulu uMninimandla wonke, uYise, + leNdodana, loMoya oNgcwele. B. Amen.

	Ukukhulekela ikholwa elife lingasakhonzi

	Kasikhulekeni: Nkulunkulu Somandla Simakade, nangu umntanakho u.. simletha kuwe. Nguwe omaziyo. Wazi impilo yakhe yensuku ngensuku kusukela ebuntwaneni bakhe kuze kube lamuhla. Thina ebesimazi, ngokwenyama, langokuba ngumzalwane. Singamahlulela ngamehlo ethu enyama, kodwa wasilaya ngeNdodana yakho ukuba singahluleli ukuze lathi singahlulelwa. Njalo wena uthi: Imicabango yami lezenzo zami zahlukile kulezenu. Nangu umzalwane wethu u... sesimletha kuwe. Nguwe ombizileyo. Siyakuncenga wena obona ingaphakathi yomuntu, lobona esingakuboniyo ukuba umhawukele umzalwane wethu lo umgezise ngegazi leNdodana yakho. Nkosi ungamjezisi ngolaka, uma usijezisa ngolaka, ngubani ongasindiswa na? Ngoba iNdodana yakho ithi: “Akulamuntu olungileyo ngaphandle kukaBaba.” Ngakho-ke, sicela kukhule uzwelo lwakho, lesihawu owaba laso usuhlanyukelwe ngabantu bakuqala. Wabathumela iNdodana yakho ukuba izobasindisa. U... ungomunye walabo iNdodana yakho eyachitha iGazi layo izama ukubahlenga. Angathi imikhuleko yethu yezinyembezi ingaba yimithandazo yokulabhelela umzalwane wethu lo ukuba umhlenge ekufeni okulaphakade. Amen.

	Umngcwabo womntwana obhabhathiziweyo

	Ngaphandle kokuthi njengoba umntwana omncinyane engelasono, sitshiya leyo mizila ekhuluma ngesono semvelo. Inkonzo ekhaya: Ukubusiswa kwesidumbu kungenziwa njengasenkonzweni yofileyo osekhulile. Ecaweni loba ngekhaya.

	P. Ngebizo likaYise, + leleNdodana, lelikaMoya oNgcwele. Amen.

	Umpristi loba umphathinkonzo abesekhuluma amazwi okududuza abafelweyo, ngokubatshela ukuthi uJesu wathi umbuso wezulu ngowabanje, ngakho-ke, iBandla eliKhatholika liyakholwa ukuthi umntwana omncane obhabhathiziweyo uya ezulwini emva kokufa kwakhe. Umntwana ongabhabhathizwanga uyangcwatshwa liBandla, njalo simtshiya emuseni kaNkulunkulu.

	P. Nkosi, zwana umkhuleko wethu. B. Lokukhala kwethu akufike kuwe. P. INkosi kayibe lani. B. Kayibe lawe njalo. P. Kasikhulekeni: Nkosi Nkulunkulu Baba, akulalele imikhuleko yethu, wamukele umntanakho lo u... embusweni wasezulwini, athokoze labangcwele bonke phambi kwakho, kuze kube nini lanini. Amen. Sicelela abazali bakhe, lezinini, labo bonke abendlu yabo abasele bephakathi kosizi, ukuba ubasize ngamandla akho, ubaqinise bangaphelelwa lithemba, ubaduduze ngomusa wakho langoMoya wakho oNgcwele, ukuze bemukele intando yakho ngokubekezela, bangasoli. (Baphe omunye umntwana / abanye abantwana, nxa kuyintando yakho, ukuze baduduzeke, bakudumise ngokubonga.) Sicela ngoKristu iNkosi yethu. Amen.

	Izifundo: Isa 25,6a9, Roma 6,3-9, Luka 18,15-17. Ukunikelwa komphefumulo

	P. Nkosi, sihawukele. - Nkosi, sihawukele. P. Kristu, sihawukele. - Kristu, sihawukele. P. Nkosi sihawukele. - Nkosi, sihawukele. P. Nkosi muphe ukuphumula okungapheliyo. B. Lokukhanya okulaphakade kumkhanyele. P. Angathi angaphumula ngokuhle. B. Amen.

	Mariya oNgcwele, Nina kaJesu, loMama wethu sonke. Nango umntanakho.- Hamba laye kuNkulunkulu. Josefa oNgcwele, Mondli kaJesu lowamakholwa onke, nango umntanakho. - Hamba... Wena sithunywa sakhe ebesimlondoloza, lawe mngcwele wakhe, nango umuntu wenu. - Hambani... Lina lonke zithunywa zasezulwini, nanso isinini senu. - Hambani laso... Lina lonke bangcwele elisezulwini, nanso isinini senu. - Hambani laso... Lina bokhokho bakhe bendlu kayise elisezulwini, nango umntanenu. - Hambani... Lina abendlu kanina elisezulwini, nango umntanenu. - Hambani... Lina lonke bantwana abangcwele elafa libancane elisezulwini. Nanso isinini senu. - Hambani laso.. Lina lonke elalisizana lemuli yalumntwana elisezulwini. Nanso isinini senu. - Hambani laso... Lina lonke bangane bemuli yakhe esezulwini. Nanso isinini senu. -Hambani laso...

	P. Kasikhulekeni: Nkosi Jesu Kristu wena owakhuluma usithi: “Vumelani abantwana beze kimi lingabenqabeli ngoba umbuso wezulu ungobawanje. Wakhuluma njalo usithi: Lowo owamukela umntwana onje wamukela mina”. Sicela ukuba wamukele umntwana lo owafakwa uphawu lwakho ekhaya lasezulwini. Ake ududuze abazali lezinini zalo umntwana bathi ngokucelelwa ngulumntwana bazuze izibusiso ezinengi. Sicela ngoKristu iNkosi yethu. Amen.

	Ukuchelwa isidumbu ngamanzi angcwele

	P. Nkulunkulu Baba owahlambulula lumntwana ngombhabhathizo, ake umkhokhele ngesibonakaliso salamanzi angcwele angene ekuthokozeni okungelamkhawulo kwasezulwini. Ngebizo likaYise, + leleNdodana, lelikaMoya oNgcwele. Amen.

	Ukuthunqiselwa isidumbu ngempepha

	P. Nkulunkulu mninibantu bonke, impepha le itshengisa imithandazo yethu eyenyukela kuwe, ake wamukele imithandazo yethu kuthi umphefumulo walo umntwana wenyukele kuwe. Ngebizo likaYise, + lele-Ndodana, lelikaMoya oNgcwele. Amen.

	Emangcwabeni: Imikhuleko yokungcwaba umuntu osekhulile iyahambelana lenkonzo yokungcwaba umntwana, lokubusiswa kwengcwaba, lokuchelwa ngamanzi angcwele, lokuthunqiselwa ngempepha, imikhuleko yakhona ivumelana lemingcwabo yonke, ngakhoke kungasetshenziswa yona.

	Umkhuleko wokuphetha

	Kasikhulekeni: Nkosi, Nkulunkulu Baba, sesimphelekezele umntanakho u... Sesimtshiya kuwe, ukuba agcinwe nguwe, ulondoloze abazali bakhe, labo bonke abemuli yakwabo, lezihlobo zakhe zonke ezisele kulumhlaba wezinyembezi. Busisa bonke abaphathisileyo kulinkonzo, ube labo insuku ngensuku ubaphephise ezingozini zonke zokomoya lezomzimba. Sicela ukuba usisize sonke esilapha, lezinini zethu labangane bethu, ukuthi mhla sisuka kulumhlaba simlandele lumntwana ekuthokozeni okungapheliyo kwasezulwini, sibonane laye, sihlale laye kokuphela ndawonye labangcwele bakho. Konke lokhu sikucela ngoKristu iNkosi yethu. Amen.

	Umngcwabo womntwana ongabhabhathizwanga

	P. Ngebizo likaYise, + leleNdodana, lelikaMoya oNgcwele. Amen.

	Umpristi loba umphathi ududuza abafelweyo ebatshela ngothando lukaNkulunkulu langokusidala kwakhe ngothando.

	P. Nkosi, zwana umkhuleko wethu. B. Lokukhala kwethu akufike kuwe. P. INkosi kayibe lani. B. Kayibe lawe njalo. P. Kasikhulekeni: Nkosi, Nkulunkulu Somandla, nguwe owadala umntwana lo wamnika abazali bakhe. Khathesi usesitshiyile. Siyazi ukuthi kuyisifiso sakho ukuba wonke umuntu afinyelele ukungena emzini wakho wasezulwini. Siyazi njalo ukuthi umusa lothando lwakho akulamkhawulo. Sesicela ukuthi umamukele umntwana lo ekhaya lasezulwini. Duduza abazali lezinini labo bonke abendlu yakwabo abasosizini ubaqinise ubaphe isibindi kulobubuhlungu bokufelwa ngumntwana. Baduduze ngoMoya wakho oNgcwele ukuze bemukele intando yakho ngokubekezela njengoJobe. (Baphe abanye abantwana ukuze baduduzeke, bakudumise bakubonge) Sicela lokhu ngoKristu iNkosi yethu. Amen.

	Izifundo: Izililo 3,22-26; Mat 18,1-5; Mat 19,13-15; Isaya 25,6-8, Mat 11,25-30; Marko 15,33-46; Joha 19,25-30. Intshumayelo

	Ukunikelwa komphefumulo P. Nkosi, sihawukele. - Nkosi, sihawukele. P. Kristu, sihawukele. - Kristu, sihawukele. P. Nkosi sihawukele. - Nkosi, sihawukele. Wena sithunywa salo umntwana ebesimlondoloza. Nango umntanakho. - Hamba laye KuNkulunkulu. Lina bokhokho bakhe bendlu kayise elisezulwini. Nango umntanenu. - Hambani... Lina bokhokho bakhe bendlu kanina elisezulwini. Nango umntanenu. - Hambani...

	P. Kasikhulekeni: Nkulunkulu Somandla onguwe owadala abantu bonke ulenjongo yokuhlala labo ezulwini, nangu umntanakho osesitshiyile siyamcelela kuwe ukuba umngenise ekhaya lasezulwini uqinise abazali bakhe abezwa ubuhlungu, bathembele kuwe wena wedwa. Sicela lokhu ngoKristu iNkosi yethu. Amen.

	Emangcwabeni; Ukubusiswa kwengcwaba

	Kasikhulekeni: Nkosi Nkulunkulu Baba le yindlu yesidalwa sakho u... esimbeka kuyo. Sicela ukuthi uyibusise azuze ukuphumula okuyikho lokuvikelwa nguwe. Ngebizo likaYise, + leleNdodana, lelikaMoya oNgcwele. Amen.

	Ukuchela ngamanzi angcwele

	Nkulunkulu Baba, amanzi ayisibonakaliso sempilo. Sicela ukuba ubusise ingcwaba leli ukuze umntwana lo u... azuze impilo engelamkhawulo ezandleni zakho. Ngebizo likaYise, + leleNdodana, lelikaMoya oNgcwele. Amen.

	Ukubekwa kwesidumbu elibeni .... ngena endlini yakho, uphumule ezandleni zeNkosi. Amen.

	Ukubusisa ilitshe

	Nkulunkulu wena ongadluliyo, woba yinsika yalo umntwana ahlale othandweni lwakho olukhulu. Amen.

	Ukubusisa ihlahla

	Nkulunkulu Baba, busisa ihlahla leli elitshengisa ukuvikela kwakho. Umvikele umntwana lo ahlale ekhwapheni lakho elikhudumalayo. Amen.

	Ukubusisa isiphambano

	Ake ubusise isiphambano lesi Nkulunkulu wothando, kuthi umntwana lo azuze induduzo ezingalweni zikaJesu. Ngebizo likaYise, + leleNdodana, lelikaMoya oNgcwele. Amen.

	Umkhuleko wokuphetha

	Kasikhulekeni: Nkosi Nkulunkulu Somandla, siyakubonga ngokusipha amandla okugcina lo umntwana. Ake ulondoloze imuli lezihlobo azitshiye lapha emhlabeni. Busisa bonke abaphathisileyo kule inkonzo lalabo akade besebenza kanzima, ubavikele engozini zoMoya lezomzimba. Siphathise sonke sihlale sizilungiselele ukuza kwakho. Sicela ngoKristu iNkosi yethu. Amen.

	Ukubusiswa kwabantu

	P. Kalibusise uNkulunkulu uMninimandla wonke uYise, + leNdodana, loMoya oNgcwele. Amen.

	next page