PRAYER BOOK

	UKUKHULEKELA IZULU (2)

	Indawo: Kungaba sedamu kumbe emfuleni.
	B. Ingoma yokungena. K. Isibonakaliso sesiphambano. K. Ukubingelela.

	Isingeniso:
	K. Bazalwane abathandekayo, sibuthene lapha ngoba sonke silephango esilaziyo ukuthi lingasuthiswa kuphela nguMdali wethu. Thina sonke lapha sesikhangelane lamasimu lamadlelo ethu lokungenzakala uma singaswela amazolo. Yenake uNkulunkulu esewudalile umhlaba wathi: Umhlaba kawuveze utshani, lemibhida ethela inhlanyelo, lezihlahla ezithela izithelo ezilenhlanyelo yazo, ngezinhlobo zazo; (Gen 1,11). Wasinika wonalo umhlaba ukuze siwulime njalo siwuphathe ngonanzelelo; (Gen 2,15). INkosi uNkulunkulu yasimthatha umuntu yambeka ensimini yaseEdeni ukuba ayilime, ayilo ndoloze. INkosi yasinika umhlaba ukuze sithole ukudla, yathi: Khangelani, ngilinika yonke imibhida ethela inhlanyelo esemhlabeni wonke, lezihlahla zonke ezilezithelo eziveza inhlanyelo, ukuba kube yikudla kwenu; (Gen 1,29). Kambe lina likubona njani bathandekayo? Kakukuhle yini? Uma kunjalo, pho! akufanelanga yini ukuthi simbonge yena yedwa nje zwi uMdali wethu, owahle wakuphawula kusukela ekuqaleni ukuthi konke lokhu ukulima, lokuvuna kuzahlala kukhona. Lapho umhlaba usekhona kakuyikuphela ukuhlanyela lokuvuna, amakhaza lokufudumala, ihlobo lobusika, imini lobusuku; (Gen 8,22). Ukuze uNkulunkulu ezwe imikhuleko yethu asizisoleni ngezono zethu. (Siyathula okwesikhatshana)

	B. Ngiyavuma kuNkulunkulu... K. UNkulunkulu uMninimandla wonke, akasihawukele, asithethelele izono zethu, asiphe ukuphila okulaphakade. Amen. B. Nkosi, sihawukele... Kasikhulekeni: Nkulunkulu Baba, uhlala ulathi kokuphela, ekuphileni lasekuhambeni kwethu, lakukho konke esikwenzayo. Konke esilakho kuvela kuwe. Akusiphe izulu elaneleyo lonyaka, sithole ukusila kwalapha emhlabeni, sidinge ngethemba elikhulu ukuphila okulaphakade. Nkulunkulu Mninimandla wonke, siyakuncenga ukuba usivikele kukho konke okubi, usilondoloze thina esithembele emuseni wakho kizo zonke izinswelo zethu. Siyacela, Nkosi ukuba usiphe izulu eliphilisayo, uvume ukuthumela umhlaba amazolo ezulu. Sicela ngoKristu iNkosi yethu. Amen.

	Izifundo: Levi 26,31-32; 1 Kho 18,30-46; Mat 5,43-48.

	*Intshumayelo.* *Izikhalazo.* *Ingoma zokucela izulu.*
	Umnikelo: Abantu baletha izindiwo zamanzi lenkezo.

	K. Siyakudumisa Nkosi Nkulunkulu Menzi wezinto zonke, sinikela kuwe amanzi la esiwathela emhlabathini owomileyo siwahlanganisa lalumhlabiso wesinkwa lewayini, ngakho sicela ukuthola izulu elaneleyo ngalezinsuku zokuphila kwethu. (Amanzi ayathelwa phansi ngenkezo kutshiywe amanye). Sicela ngoKristu iNkosi yethu. Amen.

	Ukuchelwa kwabantu lamagumbi amane omhlaba ngamanzi angcwele. Umphathinkonzo uchela abantu ngamanzi angcwele, abese-chela inhlangothi zonke zomhlaba, eqalisela empumalanga. Kungaba kuhle ukuba kukhethwe amakholwa amane ukuba achele inhlangothi zomhlaba, omunye esiya entshonalanga, omunye enyakatho, omunye eningizimu. Ingoma yokucela izulu ingahlatshelwa ngalesisikhathi sokuchela.

	Kasikhulekeni: Awu, Mdali, Baba, Nkulunkulu, Menzi wethu, khangela ukuhawula kwemuli yakho ngenxa yokuswela kwayo izulu! Khangela ukuhawulisa kwezifuyo lenyamazana zasendle! Khangela ukoma kwamasimu, lemithombo, lamachibi, lemifula yethu! Sithembele kuwe Baba, sithembele kuwe, kakho omunye esimthembileyo. Sisize, Baba olomusa; sisize, Nkulunkulu wesihawu, usithumele izulu elaneleyo: zithokoze ngawe inhliziyo zethu, lemilomo yethu ihube udumo lwakho, zijabule izifuyo lezinyamazana, zihlume izihlahla lotshani, ubukeke umhlaba, athele amasimu ethu, sibone amandla akho lokulunga kwakho. Sicela ngoKristu iNkosi yethu. Amen. (Baba wethu... Ekuhle Mariya... Udumo...) K. Isibusiso

	INKONZO YOKUBONGA IZULU LESIVUNO ESIHLE

	B. Ingoma yokungena: K. Isibonakaliso sesiphambano. K. Ukubingelela. K. Isingeniso: Bazalwane abathandekayo, lamhla sibuthene lapha ukuzabonga uNkulunkulu ngesivuno esihle, asiphe sona kulumnyaka. Nguye obesithumela izulu elisize amasimu ethu ukuba athele izithelo esizilethe kuye lamuhla ukuba simbonge ngazo. Endulo kwakulomkhosi weNxwala, owawungowokubonga uMdali ngamabele amatsha. Le yiyo inxwala yethu, ngakhoke kasibongeni uMdali wethu, sijabule. Okokuqala, kasihlolisiseni inhliziyo zethu, sibone ukuthi kukhona yini esamona ngakho, sizisole ngezono zethu, simcele ukuba asithethelele.

	B. Ngiyavuma kuNkulunkulu... K. UNkulunkulu uMninimandla wonke akasihawukele, asithethelele izono zethu, asiphe ukuphila okulaphakade. B. Amen. K. Nkosi, sihawukele...

	Kasikhulekeni: Bayethe, Nkulunkulu wamaxuku, Mvelingqangi wamabandla, Somandla, Simakade, Mninimusa lokulunga konke! Siyabonga, Baba, sibonga umusa lokulunga kwakho, ngezulu osinike lona lonyaka. Ziyamangalisa izenzo zakho, lomusa, lobungcwele, lokulunga kwakho kungelinganiswe. UNgcwele, uNgcwele, uNgcwele Nkosi... Silondoloze kokuphela, usibusise lezimuli zethu, usinike izulu elaneleyo lakulumnyaka. Sicela ngoKristu iNkosi yethu. Amen.

	Izifundo: Dute 8,7-18; Jer 14,1-9; Marko 5,18-20. Intshumayelo.

	B. Udwendwe lokunikela izipho.

	Umphathinkonzo utshela abantu ukuthi sekuzakwenziwa udwendwe lokuyanikela izipho lezithelo ezintsha kuNkulunkulu, phambi kweAlithare lakhe, njengesibonakaliso sokumbonga. Izithelo ezintsha zizanikwa abayanga labahluphekayo, umnikelo ngoweBandla likaJesu Kristu. *Ingoma yomnikelo:* Ukubonga lokudumisa uNkulunkulu; kungathathwa u(C).

	Kasikhulekeni: Siyabonga, Nkulunkulu Baba, siyabonga Mvelingqangi, Mdali wezulu lomhlaba lezinto zonke siyabonga, Somandla, Simakade, sibonga izulu lembewu lezithelo osiphe zona kulumnyaka. Wena Thulasizwe wemibani lemidumo yezulu! Wena Mlawuli weziphepho lezivunguzane leziqhotho! Wena Mgiqi wezivimbezelo zamachibi aphezulu! Siyabonga ngezithelo zalonyaka langakho konke osenzela khona. Siyacela ukuba ungasusi umusa lothando lwakho kithi. Sicela ngoKristu iNkosi yethu. Amen.
	(Baba wethu... Ekuhle Mariya... Udumo...)

	Isibusiso lokuvalelisana. Ingoma.

	IZIBUSISO EZITSHIYENEYO

	Ukubusiswa kwetswayi
	Baba olomusa wonke, siyakuncenga ukuba ubusise + itswayi leli owalidalayo; okwathi ngokulaya kwakho uElisha umprofethi walihlanganisa lamanzi, ukuwahlambulula lokuxotsha ububi kiwo. Akuxotshe wonke amandla obubi lapho amanzi la ahlanganiswe lalelitswayi azachelwa khona, usilondoloze ngokuba khona kukaMoya wakho oNgcwele phakathi kwethu. Sicela ngoKristu iNkosi yethu. Amen.

	Ukubusiswa kwamanzi (1)
	Nkulunkulu Baba Somandla, Wena ungumthombo wempilo yonke. Siyakuncenga ukuba ubusise + amanzi la esiwasebenzisa ngokukholwa, sikucela ukuba usixolele izono zethu, usivikele emikhuhlaneni lasemandleni wonke esitha. Nkosi, ngomusa wakho akuvume ukuba amanzi la asilethele impilo losindiso. Sengathi angasenza sisondele kuwe silenhliziyo ezihlanjululiweyo ezonweni, siphephe lasezingozini zonke zokomoya lezomzimba. Sicela ngoKristu iNkosi yethu. Amen.

	Ukubusiswa kwamanzi (2)
	Nkulunkulu Baba Somandla, Mthombo wempilo, ake ubusise amanzi la, uwaphe amandla ukuze asilethele izibusiso asivikele njalo, asisilise emikhuhlaneni, axotshe amandla kaSathane lemimoya emibi lamathunzi amabi. Yenza amanzi la avikele imizi yethu, alethe izibusiso emasimini ethu andise izifuyo zethu. Busisa amanzi la ngebizo likaYise, + leleNdodana, lelikaMoya oNgcwele. Amen.

	Umkhuleko wokuxotsha uSathane lemimoya emibi.
	(Indlela yokumlaya ukuphuma emuntwini)
	Ngiyakulaya wena Sathane, sitha sabantu bonke lenhlalakahle yabo ukuba ulalele ukuphelela lokulunga kukaNkulunkulu uBaba, yena owahlulela ngobuqotho osekulahlile ngokuziphakamisa lomhawu wakho. Suka kule inceku kaNkulunkulu u... owadalwa yiNkosi ngomfanekiso wayo, wamupha izipho zakhe, njalo ngomusa wakhe wamenza umntanakhe. Ngiyakulaya wena Sathane, nkosana yobumnyama, nanzelela amandla lesithunzi sikaJesu Kristu owakunqobayo enkangala, wakukhulela ensimini yaseGetsemani, wakwehlula esiphambanweni, kwathi ngokuvuka ekufeni wanqoba ubumnyama ngokukhanya. Suka kulesisidalwa sikaNkulunkulu u ... uKristu amenza umzalwane wakhe ngoMbhabhathizo, wamsindisa ngegazi lakhe. Ngiyakulaya Sathane, wena oyenga uluntu lonke ukuba uthobele uMoya weqiniso lomusa olwisa ubuqili bakho njalo echitha amanga akho, phuma kulesisidalwa sika-Nkulunkulu u ... amphawulayo ngophawu lwakhe lwaphezulu, unyamalale kulo umuntu uNkulunkulu amenza ithempeli lakhe elingcwele ngomgcobo wokoMoya. Suka ngamandla okholo lomthandazo weBandla. Nyamalala ngamandla esibonakaliso sesiphambano sikaJesu Kristu iNkosi yethu. (Zibani) ... ngiyakubusisa ngesiphambano esingcwele: Ngebizo likaYise, + leleNdodana, lelikaMoya oNgcwele. Amen.

	(Abesemchela ngamanzi angcwele, abesemthunqisele ngempepha).

	Umkhuleko wokuxotsha uSathane
	(indlela yokulabhela)
	Nkulunkulu Somandla, Mdali lomvikeli woluntu lonke, ake ukhangele ngomusa inceku yakho le u ... owamdala ngomfanekiso wakho wambizela ukwabelwa ubukhosi bakho: Isitha esidala siyamhlukuluza kabuhlungu, siyamncindezela ngodlakela olukhulu, siyamphazamisa ngesihluku esesabekayo. Siyakucela wehlisele phezu kwale inceku yakho uMoya oNgcwele ukuze amuphe amandla, kule impi, amfundise ukuba acele kuye ngesikhathi sohlupho njalo amvikele ngamandla akhe amakhulu. Ake uzwe Nkulunkulu Baba, wokulunga ukububula kweBandla elicelayo, ungavumi ukuba umntanakho lo, owasindiswa nguJesu Kristu ngegazi lakhe abotshwe nguSathane. Ulithempeli likaMoya oNgcwele, ngakhoke, ungavumi ukuba umoya omubi ongcolileyo ahlale kuye. Ake uzwe Nkulunkulu Mninimusa imikhuleko yeVirigo elibusisiweyo uMariya, iNdodana yakhe eyafa esiphambanweni, yachoboza ikhanda lenyoka, yasinikela abantu bonke ezandleni zikaNina. Angathi ukukhanya kweqiniso kungakhanya phezu kwenceku yakho le, ukuze ukuthokoza lokuthula kuhlale kuye, loMoya oNgcwele amenze acoleke ahlambuluke. Siyacela uzwe Nkosi umkhuleko wesithunywa esikhulu uMikhayeli, lomkhuleko wezithunywa ezikukhonzayo imihla ngemihla. Nkulunkulu Mninimandla wonke xotsha amandla kaSathane. Nkulunkulu weqiniso lentethelelo, susa izindlela zobuqili bukaSathane. Nkulunkulu wenkululeko losizo lonke, qamula amaketane obubi. Ake uzwe Nkulunkulu sisusa sosindiso lwabantu, umkhuleko wabaphostoli bakho uPhetro loPhawuli kanye labangcwele bonke, abanqoba amandla esitha esibi: Siyakuncenga ukhulule inceku yakho le kiwo wonke amandla angayisiwo, umgcine emsulwa, ukuze akhululeke akukhonze kuhle, akuthande ngenhliziyo yakhe yonke, akusebenzele ngemfanelo kuyo yonke imisebenzi yakhe, akudumise, akufakazele ngempilo yakhe. Sicela ngoJesu Kristu iNkosi yethu. Amen.

	IZINKONZO ZEMINGCWABO

	Umlindelo womngcwabo (1)

	B. Ingoma yokuvula:
	Izulu lilikhaya...
	K. Isibonakaliso sesiphambano K. Ukubingelela
	K. Isingeniso Bobaba labomama, siyalibonga ngokuhlangana kwenu enkonzweni yomlindelo womngane wethu u... ositshiyileyo. Sihlangene lapha ukuzaduduza abomdeni lezinini zomufi, lokukhulekela yena umufi uqobo, ukuba uNku lunkulu amhawukele, amthethelele izono zakhe zonke, amamukele ekhaya lakhe lasezulwini. B. Ingoma yokuzisola:
	Xola Jesu, O! sonile loba eyinye eyokuzisola.

	Kasikhulekeni: Nkulunkulu Baba, sibuthene lapha, thina abantwabakho, ukuzaduduza abangane bethu laba abasele besosizini ngokutshiywa yisinini sabo esithandekayo u... Sonke sidabukile ngomngane wethu ositshiyileyo, ngakho-ke, sizoduduzana sonke kulinkonzo, sithemba usizo lwakho, lolukaMoya wakho oNgcwele. UMphostoli wakho uPhawuli wasilaya ukuba sikhale labakhalayo. Siyakuncenga Baba ukuba uthele uMoya wakho phakathi kwethu lakibo bonke ababuthene lapha, ukuze silethele abazalwane bethu laba, induduzo enkulu ngemikhuleko yethu kulobubusuku. Siyakucela ukuba ukhulule umzalwane wethu u... ezonweni zakhe zonke. Amen.

	Isifundo sokuqala: 1 Tes 4,13-18. Ingoma: Woza, woza kithi Moy oNgcwele.
	Umkhokheli: Khathesike, abathanda ukukhuluma amazwi enduduzo lokukhuthaza, bangawatsho belandela isifundo esifundiweyo. Nxa sekwanele, umkhokheli uthi: Khathesi, kasiceleni induduzo kuNkulunkulu uBaba wethu, sikhuleka iHubo 116,1-9.

	K. Nkosi, siduduze kokuphela B. Nkosi, siduduze kokuphela Ngiyayithanda iNkosi, ngoba iyezwa ilizwi lami lokukhala kwami. - Nkosi... Iyangizwa, ngakho-ke ngizakukhuleka kuzo zonke insuku zami. - Nkosi... Imijibila yokufa yangihanqa, lobuhlungu bendawo yabafileyo bangibamba: ngehlelwa yikuhlupheka losizi. - Nkosi... Ngasengikhuleka ebizweni leNkosi, ngathi: Nkosi ngiyakuncenga, silisa ukuphila kwami. - Nkosi... INkosi ilomusa, ilungile; uNkulunkulu wethu ulesihawu. - Nkosi... INkosi iyabalondoloza abantukazana; lapho ngiwiselwa phansi yangisiza. - Nkosi... Buyela ekuphumuleni kwakho mphefumulo wami, ngoba iNkosi ikuphathe ngomusa. - Nkosi... INkosi isilise umphefumulo wami ekufeni, lamehlo ami ezinyembezini, lenyawo zami ekuweni. - Nkosi... Ngiyahamba phambi kweNkosi elizweni labaphilayo. - Nkosi...

	Izikhalazo Umkhuleko weNkosi Umkhuleko wokuvala Imibiko: Imibiko ephathelane lamalungiselelo womngcwabo. Kungahlatshelwa ingoma yokuchitheka kwabantu sebebuyela emakhaya.

	Imikhuleko yokugeziswa lokugqokiswa komufi

	Isingeniso: Kungaba yinto enhle ukuthi nxa ofileyo esegeziswa, lalapho esegqokiswa, amakholwa akhuleke imikhuleko ethile, kuhlatshelwe lezingoma ezithile, kungathuli nje kuthi cwaka.

	Nxa esegeziswa Nkulunkulu womusa lesihawu, njengoba umzalwane wethu lo u..., esegeziswa ukuze ahlambuluke, siyakuncenga ukuba uhlambulule umphefumulo wakhe ekungcoleni konke, abemhlophe, afanele ukungena ekhaya lakho lasezulwini. Sicela ngoKristu iNkosi yethu. Amen. Kungafundwa iHubo 51

	Nxa esegqokiswa Nkulunkulu olomusa lesihawu esingapheliyo, njengalokhu umzalwane wethu esegqokiswa izembatho ezinhle, siyakuncenga ukuba ugqokise umphefumulo wakhe ngesembatho esimhlophe somthimba wasezulwini. Sicela ngoKristu iNkosi yethu. Amen.

	Umlindelo womngcwabo (2)

	Ukungeniswa kwesidumbu ekhaya (Isidumbu esangweni lomuzi)

	B. Ingoma. K. Isibonakaliso sesiphambano. K. Ukubingelela. K. Umkhuleko wokuvula.
	Emva kwalumkhuleko isidumbu singeniswa ekhaya kukhulekwa ihubo elilandelayo.
	K. INkosi ingumalusi wami, kangiyikuswela lutho. B. INkosi ingumalusi wami, kangiyikuswela lutho.

	Iyangalusela emadlelweni aluhlaza, ingise endaweni elamanzi amahle; - INkosi... Ivuselela umphefumulo wami, ingihole endleleni zokulunga ngenxa yebizo layo; - INkosi... Loba ngidabula esihotsheni esimnyama kangiyikwesaba okubi, ngoba wena ulami, intonga yakho lodondolo lwakho kuyangivikela; - INkosi... Uyalungisa itafula phambi kwami laphambi kwezitha zami; ugcoba ikhanda lami ngamagcobo, umganu wami ugcwele uyaphuphuma; - INkosi... Impela okuhle lesihawu kuzakungilandela insuku zonke zokuphila kwami; ngizakuhlala endlini yeNkosi kuze kube nininini; - INkosi...
	Ihubo liyaphindwa nxa isidumbu singakabekwa phansi. Isidumbu singabekwa phansi kwenziwa iLithani elilandelayo.

	Nkosi, sihawukele. Nkosi, sihawukele. Kristu, sihawukele. Kristu, sihawukele. Nkosi, sihawukele. Nkosi, sihawukele. Mariya oNgcwele - Umlabhelele kuMntanakho. Wena Mduduzi wabalusizi. - Umlabhelele kumntanakho. Wena owenyuselwa ezulwini.- Umlabhelele kuMntanakho. Wena Mama wethu.- Umlabhelele kuMntanakho. Simemezela ukufa kwakho, Nkosi; - Sizamemezela lokuvuka kwakho uze ubuye. Josefa ongcwele - Umkhulekele kuKristu uMsindisi. Martini de Poresi ongcwele - Umkhulekele... Charles Lwanga ongcwele - Umkhulekele... Lina bokhokho bakhe abasezulwini - Limkhulekele kuKristu uMsindisi. Lina lonke bangcwele bakaNkulunkulu - Limkhulekele... Lina zithunywa zonke zikaNkulunkulu - Limkhulekele... Simemezela ukufa kwakho, Nkosi - Sizamemezela lokuvuka kwakho uze ubuye. Jesu, Msindisi wabantu - Umhawukele... Jesu, Wena owasifela esiphambanweni - Umhawukele... Wena owehla waya kwabafileyo - Umhawukele... Wena owavuka ekufeni ngenkazimulo - Umhawukele... Wena esithemba ukuthi sizangena ngawe ekuphileni okulaphakade - Umhawukele... Simemezela ukufa kwakho, Nkosi. - Sizamemezela lokuvuka kwakho uze ubuye. Ngokuhlutshwa lokuzwiswa kwakho ubuhlungu - Umthethelele, Nkosi, Msindisi. Ngokufa kwakho kabuhlungu esiphambanweni - Umthethelele, Nkosi, Msindisi. Ngokwenza impilo yakho ibe nguMhlatshelo wezono - Umthethelele, Nkosi, Msindisi. NgeGazi lakho elachithwa ngenxa yethu - Umthethelele, Nkosi, Msindisi. Ngokuvuka kwakho ngobukhosi uvukela empilweni entsha -Umthethelele, Nkosi, Msindisi. Ngokubuya kwakho kokucina esisakulindeleyo - Umthethelele, Nkosi, Msindisi. Simemezela ukufa kwakho, Nkosi - Sizamemezela lokuvuka kwakho uze ubuye. Thina zoni - Akusizwe, siyakuncenga Akusixolele, usenze sixolelane - Akusizwe... Akusenze sikholwe, sithembe kuwe - Akusizwe... Akusenze siphile ngawe - Akusizwe... Akwenze ukuba uMbuso wakho uze - Akusizwe... Mvana kaNkulunkulu, wena osusa izono zabantu - Siphathe ngomusa, Nkosi. Mvana kaNkulunkulu, wena osusa izono zabantu - Sizwe, Nkosi. Mvana kaNkulunkulu, wena osusa izono zabantu - Sihawukele.

	Kasikhulekeni: Siyakubonga Nkosi Jesu Kristu, ngokuhlupheka langokusifela kwakho, ukuze sisindiswe. Akusiphe amandla ukuze lathi sithwale iziphambano zethu ngokubekezela. Wena ophila ubusa kuze kube laphakade. Amen.

	Baba wethu... Ingoma.
	Nxa kulesikhathi, kungenziwa eminye imikhuleko eyekhanda andubana abantu batshelwe ukuthi inkonzo yomlindelo ebusuku izaqaliswa nini. Emva kwalokhu kuyamiwa kancane ukwenzela ukuthi abangakadli bayekudla, abathanda ukusala bekhuleka kumbe behlabela, basale.

	next page