INKONZO YEBANDLA NXA UMPRISTI ENGEKHO
   
  ISIGABA SOKULUNGISELELA
 

Ingoma yokungena

Isibonakaliso sesiphambano
 

K. Ngebizo likaYise, + leleNdodana, lelikaMoya oNgcwele.

B. Amen.
   
 

Ukubingelela

 

K. Ukuthula kweNkosi yethu uJesu Kristu akube lani lonke.

B. Kakube lawe njalo.
   
 

Isingeniso

  K. Bazalwane, kulinkonzo injongo yethu yiku...
   
 

Ukuvuma izono

  K. Ngakhoke asizisoleni ngezono zethu, siceleuNkulunkulu asithethelele.
   
  (Siyathula kancane sizihlolisise ngezono zethu)
 

B. Ngiyavuma kuNkulunkulu,uMninimandla wonke, lakini bazalwane,

ukuthi ngonile kakhulu ngokucabanga langokukhuluma, langokwenza langephutha ngecala lami, ngecala lami, ngecala lami elinzima kakhulu sibili. Ngakhoke ngiyancenga uMariya obusisiweyo, oliVirigo kokuphela, lezithunywa zonke zasezulwini, labangcwele bonke, lani bazalwane, ukuba lingikhulekele eNkosini uNkulunkulu wethu. Amen.

   
 

Intethelelo

  K. UNkulunkulu uMninimandla wonke, akasihawukele, asithethelele izono zethu, asiphe ukuphila okulaphakade. Amen.
   
 

Ukucela umusa

 

K. Nkosi, sihawukele;

K. Kristu, sihawukele;

K. Nkosi, sihawukele;

B. Nkosi, sihawukele.

B. Kristu, sihawukele.

B. Nkosi, sihawukele.
   
 

Ukudumisa uNkulunkulu

 

Udumo kalube kuNkulunkulu kweliphezulu.

Kube lokuthula emhlabeni ebantwini bakhe,

Nkosi Nkulunkulu, Nkosi yasezulwini, Nkulunkulu Baba Somandla,

siyakubabaza, siyakwazisa, siyakuguqela, siyakudumisa,

siyakubonga ngenxa yobukhosi bakho obukhulu.

Nkosi, Jesu Kristu, Ndodana ezelwe yodwa, Nkosi Nkulunkulu,

Mvana kaNkulunkulu, Ndodana kaNkulunkulu uYise.

Wena osusa izono zomhlaba, sihawukele.

Wena ohlezi kwesokunene sikaYihlo, zwana ukukhala kwethu.

Ngoba nguwe wedwa oNgcwele. Nguwe wedwa oyiNkosi.

Nguwe wedwa onguPhezukonke, wena Jesu Kristu;

undawonye loMoya oNgcwele, ebukhosini bukaNkulunkulu uBaba. Amen.

   
 

Umkhuleko wokuvula

 

K. Kasikhulekeni: Nkulunkulu Baba Somandla, wena ungumkhokheli lomvikeli wabantu bakho,

akusenze sihloniphe ibizo lakho ngokupheleleyo; usigcine sisothandweni lwakho kokuphela.

Sicela ngoKristu iNkosi yethu.

B. Amen.

   
  ISIGABA SELIZWI LIKANKULUNKULU
   
 

Ingoma

Isifundo sokuqala
  K. Zwanini ilizwi likaNkulunkulu encwadini ...
 

K. Yiwola amazwi eNkosi.

B. Kabongwe uNkulunkulu.

   
 

IUmkhuleko weHubo...

Isifundo sesibili

 

K. Zwanini ilizwi likaNkulunkulu encwadini ...

K. Yiwola amazwi eNkosi.

B. Kabongwe uNkulunkulu.

   
 

Ingoma yeAleluya IVangeli

 

P. INkosi kayibe lani.

B. Kayibe lawe njalo.

P. Zwanini iVangeli elingcwele likaJesu Kristu njengoba libhalwe ngu...

B. Udumo kalube kuwe Nkosi Jesu Kristu. ...

P. Yiwola amazwi eVangeli elingcwele.

B. Kadunyiswe uJesu Kristu.

   
 

Intshumayelo

UMvumukholo wabaphostoli

  K: Asivumeni ukholo lwethu:
 

Ngiyakholwa kuNkulunkulu, uYise uMninimandla wonke,

uMdali wezulu lomhlaba, lakuJesu Kristu, iNdodana yakhe eyodwa, iNkosi yethu;

owemulwa ngamandla kaMoya oNgcwele, wazalwa liVirigo uMariya;

wahlutshwa ekubuseni kukaPhonsiyo Philathu; wabethelwa esiphambanweni, wafa, wangcwatshwa, wehla waya kwabafileyo. Ngelanga lesithathu wabuya wavuka ekufeni, wenyuka waya ezulwini. Uhlezi esandleni sokunene sikaYise,

lapho azavela khona ezothetha amacala abaphilayo labafileyo.

Ngiyakholwa kuMoya oNgcwele, iBandla elingcwele eliKhatholika,

ukumanyana kwabangcwele, ukuthethelelwa kwezono,

ukuvuka komzimba ekufeni, lokuphila okulaphakade. Amen.

   
 

Izikhalazo
 

K. Nkosi Nkulunkulu Baba,... Nkosi silalele

B. Nkosi, silalele ngomusa.

K. Lethani izikhalazo zenu eNkosini.

K. Nkosi Jesu Kristu, wena owathi konke elikucela kuBaba ngebizo lami, kholwani ukuthi uzalipha khona. Sicela usifikisele umkhuleko wethu lo kuNkulunkulu uBaba yena ohlala ebusa kanye lawe kuze kube laphakade. Amen.

   
  ISIGABA SOKULETHA IZIPHO
   
 

Ingoma yomnikelo

Umkhuleko wokwamukela umnikelo

  K. Nkulunkulu Baba, siyazinikela kuwe njengeNdodana yakho eyanikela impilo yayo kuwe esiphambanweni. Sinikela impilo yethu, ukuthaba lokuhlupheka kwethu, abantwabethu lamasimu ethu, imizi lezifuyo zethu, lakho konke esilakho. Kwamukele Baba, ubusise umnikelo wethu lo, usikhokhelele ekuphileni okungapheliyo. Sicela kuwe, wena ophila ubusa kuze kube laphakade. Amen.
   
  ISIGABA SOMKHULEKO OMKHULU WOKUBONGA
 

(Singenza eyethu imikhukelo yokubonga kumbe sikhethe omunye walimikhuleko emine):
 

A  B  C  D

   
 

UNgcwele

 

B. UNgcwele, uNgcwele, uNgcwele, Nkosi Nkulunkulu wamaxuku!

Izulu lomhlaba kugcwele ubukhosi bakho. Hosana kweliphezulu!

Ubusisiwe ozayo ebizweni leNkosi. Hosana kweliphezulu!

K. Singenza umkhuleko ohambelana lenjongo yeNkonzo yethu yalelolanga

   
 

Ingoma

  (Ngalesisikhathi nxa kuleSidlo esiNgcwele esontweni siyalethwa eAlithareni)
   
 

Umkhuleko weNkosi

  K. Kasikhulekeni ngokuthemba kuBaba ngamazwi uMsindisi wethu asilaya wona sithi:
 

Baba wethu osezulwini, alidunyiswe ibizo lakho, awuze umbuso wakho,

intando yakho kayenziwe emhlabeni njengasezulwini.

Sipha lamhla ukudla kwethu okwansuku zonke; usixolele izono zethu,

njengalokhu lathi sibaxolela abasonayo thina. Ungasingenisi ekulingweni,

kodwa usisindise ekubini.

   
 

Ukucela ukuvikelwa ebubini

  K. Sisindise Nkosi ebubini bonke, usiphe ukuthula ngalezinsuku zethu. Sisize ngesihawu sakho, usikhulule emandleni esono, usivikele enkathazweni zonke lapho sisalindele ngethemba langenjabulo ukuza koMsindisi wethu uJesu Kristu.
  B. Ngoba umbuso ungowakho, lamandla, lobukhosi, kuze kube lanini.
   
 

Ukucela ukuthula

  K. Nkosi Jesu Kristu wena owathi kubaPhostoli bakho: Ngilitshiyela ukuthula ngilipha ukuthula kwami. Ungakhangeli izono zethu, kodwa khangela ukukholwa kweBandla lakho, usiphe ukuthula lokumanyana kwasembusweni wakho, lapho ohlezi khona ubusa kuze kube laphakade. Amen.
 

K. Ukuthula kweNkosi kakube lani kokuphela.

B. Kakube lawe njalo.

K. Bazalwane, kasitshengiseni ukuthandana lokuxolelana kwethu ngokuxhawulana.

 

Oxhawulayo: Ukuthula kakube kuwe!

Oxhawulwayo: Kakube lawe njalo.

   
 

Nxa kuleSidlo esiNgcwele, owemukelisayo ulungiselela ukwamukelisa

Mvana kaNkulunkulu, simenza nxa kuleSidlo esiNgcwele kuphela

   
 

Mvana kaNkulunkulu, wena osusa izono zomhlaba; Sihawukele.

Mvana kaNkulunkulu, wena osusa izono zomhlaba; Sihawukele.

Mvana kaNkulunkulu, wena osusa izono zomhlaba; Siphe ukuthula.

   
 

Ukwamukela

 

K. Khangelani, nansi iMvana kaNkulunkulu, yona esusa izono zomhlaba! Babusisiwe labo ababiziweyo eSidlweni seNkosi.

B. Nkosi kangifanele ukuba ngikwamukele, khuluma ilizwi lodwa kusile umphefumulo wami.

P. UKristu.

K. Amen.
   
  Ngemva kokwamukela siyathula kancance sixoxe loJesu Kristu
   
 

Ingoma yeSidlo esiNgcwele

Isiphetho senkonzo
  K. Kasikhulekeni. Nkulunkulu Baba, siyabonga isipho sempilo lesokholo. Qeda kithi umoya wobugwala, singesabi ukuze singathandabuzi ukufakaza ilizwi lakho emphakathini. Angathi singamelana lokweyiswa, lokusolwa, sikwazise ebantwini bonke. Sicela ngoKristu iNkosi yethu. Amen.
   
 

Imibiko

Isibusiso

 

K. Amandla kaNkulunkulu uBaba, lothando lweNkosi yethu uJesu Kristu, onguye owadela ukuphila kwakhe ngenxa yethu ukuze sisindiswe ezonweni zethu, lenlimi zikaMoya oNgcwele, kakube lathi kusiphelekezele endleleni zethu zonke. Amen.

Kusenze sitshisekele ukholo lwethu, sifanele ukubizwa kwethu njengamakholwa, labalandeli abaqotho bakaKristu. Senze intando yeNkosi yethu emisebenzini yethu, lasekukhulumeni, lasekukhulekeni kwethu, engqondweni zethu lasekwenzeni kwethu, impilo yethu yonke ibe yimpilo yobuKristu. Amen.

Angathi isibusiso sikaNkulunkulu olamandla wonke, esikaBaba, + leseNdodana lesikaMoya oNgcwele singehlela phezu kwethu sihlale lathi kokuphela, kuze kube laphakade. Amen.

   
 

Ukuvalelisa

K. Asihambeni othandweni lweNkosi, siyithande, siyisebenzele sifanele ukubizwa kwethu njengamaKristu.

B. Kabongwe uNkulunkulu.
   
 

Ingoma yokuphuma

   
  UKUBONGA LOKUDUMISA UNKULUNKULU (A)
   
 

K. Kasibongeni uNkulunkulu, ngoba ulungile.

B. Uthando lwakhe olungapheliyo lumi kuze kube nininini.

K. Nkulunkulu Baba, siyakubonga ngalumhlaba owasipha wona. Siyakubonga ngemifula, lamasimu, lezintaba, lakho konke okukikho. Siyakubonga ngezifuyo, lezithelo zezihlahla, lamabele osipha wona. Siyakubonga ngakho konke okugcwele umhlaba okusisizayo.

B. Udumo alube kuwe Nkulunkulu kweliphezulu.

K. Wadala abantu bonke ngomfanekiso wakho. Omunye lomunye wethu ufuze wena:

Siludiwo olufuz’imbiza ngenxa yokusithanda kwakho. Ngakhoke siyakubonga sikudumisa

sisithi: - Udumo...

K. Kawuthandi ukuba buqamama lathi. UMose wasidalulela ukusithanda kwakho,

wasambulela izimangaliso zokubakhona kwakho phakathi kwethu. Ngakhoke siyakubonga

sikudumisa sisithi: - Udumo...

K. Kodwa ukuzimanyanisa kwakho lathi kwadalulwa kakhulu yikuzenza kwakho umuntu,

ngeNdodana yakho. Ngayo iNdodana yakho wadla, wahamba, wahlala lathi. Ngakhoke siyakubonga sikudumisa sisithi: - Udumo...

K. Ngokufa langokuvuka kweNdodana yakho wasinika impilo entsha, wasimanyanisa lawe,

wasenza saphila kuwe leNdodana yakho loMoya oNgcwele. Ngakho-ke siyakubonga sikudumisa

sisithi: - Udumo...

K. Ngakho sihlanganyela lamakholwa asemhlabeni wonke akhulekayo lamhla, labangcwele bonke abasezulwini sisithi:

B. UNgcwele, uNgcwele, uNgcwele Nkosi...
   
  UKUBONGA LOKUDUMISA UNKULUNKULU (B)
   
 

K. Kasibongeni uNkulunkulu, ngoba ulungile.

B. Uthando lwakhe olungapheliyo lumi kuze kube nininini.

K. Bayethe, Nkosi, Nkulunkulu wamaxuku! UyiNgobamakhosi, thina siyizichaka zakho. Kodwa wasidalela ukuhlala lawe entokozweni yakho engapheliyo, wasithumela uKristu ukuba asivulele indlela eza kuwe.

B. Siyakubabaza, siyakudumisa, siyakubonga, Nkulunkulu Baba.

K. Wasenza saba yimuli emhlabeni wonke, ngenxa yokusithanda kwakho. Siyakubonga ngabazali abasizalayo, lezinini, labangane abasenzela okuhle. Siyakubonga ngokuthandana lokuxolelana owakufaka phakathi kwethu, sisitsho ngelizwi linye sisithi: - Siyakubabaza...

K. Wasinika amandla okucabanga lokuzikhethela esikuthandayo, lokusekela abendlu yethu, labomakhelwana, lokusebenzisa izinto zalumhlaba ezisisizayo, lokuphisekela ukufinyelela ekuphileni okulaphakade. Ngakho-ke siyakubonga sikudumisa, Nkulunkulu Baba. - Siyakubabaza...

K. Nguwe owahlela ukuba sibe luhlanga lunye emhlabeni munye. Nguwe ofunzelela umoya

wokuzwana lokuthandana phakathi kwabantu, lokuphathwa kwabo ngokufanayo.

Ngakho-ke, siyakubonga sikudumisa Nkulunkulu Baba. - Siyakubabaza...

K. Nguwe owasibizela eBandleni lakho elingcwele, wasenza saba njengezandla ezigezanayo, wasambulela ukujula kothando lwakho kubantu bonke, wasenza saba ngofakazi bombuso wakho opheleleyo. Ngakho-ke, siyakubonga sikudumisa Nkulunkulu Baba. - Siyakubabaza...

K. Ngakho-ke sihlanganyela labangcwele abasezulwini labakhokheli beBandla lakho, lamakholwa onke, labo bonke abakukhonzayo sisithi:

B. UNgcwele, uNgcwele, uNgcwele Nkosi...

   
  UKUBONGA LOKUDUMISA UNKULUNKULU (C)
   
 

K. Kasibongeni uNkulunkulu, ngoba ulungile.

B. Uthando lwakhe olungapheliyo lumi kuze kube nininini.

K. Simangaliswa yikho konke owakudalayo, Nkosi, sinkema imilomo sikhumbula umusa lokulunga kwakho. Simakade, sihube ndawonye sisithi:

B. Siyakubonga sikudumisa, Nkosi, siyakubonga sikudumisa!

K. Amanzi athambisa umhlaba uthele, izikhathi lomkhathi kuvuselela impilo yethu, ngalokhu siyakubonga sikudumisa, Nkosi, siyakubonga sikudumisa. - Siyakubonga...

K. Inhlanyelo iyahlanyelwa ife, kodwa ivuka ekufeni, imile, ifakaze kithi sonke, ukuthi lathi sizakufa

sibuye sivuke. Ngalokhu siyakubonga sikudumisa! - Siyakubonga...

K. Imisebenzi yabantu bakho bonke eyenza ukuba umhlaba uveze ukudla lezithelo, siyinikela kuwe, kanye loMnikelo omutsha kaKristu, sisithi: - Siyakubonga...

K. Nguwe owasinika amandla okunqoba ubunzima esabunqobayo; nguwe owasiphephisa ezingozini ezazisizingelezile; nguwe owasophula ezindlaleni, lasemikhuhlaneni, ngakho-ke, siyakubonga sikudumisa! - Siyakubonga...

K. Siyakuhubela ngentokozo ihubo elitsho okudaliweyo konke, sikanye leBandla lakho elilihubayo lelohubo, sikhuleka ngokuthemba kuwe Baba, sisithi: UNgcwele, uNgcwele uNgcwele Nkosi...

   
  UKUBONGA LOKUDUMISA UNKULUNKULU (D)
   
 

K. Kasibongeni uNkulunkulu, ngoba ulungile.

B. Uthando lwakhe olungapheliyo lumi kuze kube nininini.

K. Siyakubonga ngenhliziyo zethu zonke, Nkulunkulu Baba, siyakubabaza, siyakwazisa, ngokuthumela uMoya oNgcwele enhliziyweni zabantu bakho.

B. Thumela uMoya wakho oNgcwele enhliziyweni zabantu bakho.

K. UMoya wakho usikhupha kwezomhlaba, usenyusela kwezaphezulu, simangaliswe

yizimangaliso zakho. - Thumela...

K. UMoya wakho oNgcwele uyasivuselela, asenze silungisele umbuso wakho; ngaye usibonisa uthando lwakho olumangalisayo, umanyanise abantu bakho babe munye. - Thumela...

K. Sihlangene lapha ukuze siqinisane, sinqobe amandla obumnyama ngamandla kaKristu ovukileyo, sibe lethemba elitsha lempilo entsha kuye. - Thumela...

K. Ngalokhuke, sikanye leBandla lonke, eliyilona elifakaza izimangaliso zothando lwakho kubantu bonke, ndawonye labangcwele bonke, ababetshumayela iVangeli emazweni wonke, sithi:

B. UNgcwele, uNgcwele, uNgcwele Nkosi...

   
  UKUKHULEKELA IZULU (1)
   
  Ingcazelo: UJesu wathi: Celani lizakuphiwa; funani, lizakufumana; qoqodani, lizakuvulelwa; (Luka 11,9). Kanengi, nxa sesiphakathi kohlupho kumbe sesilobunzima obuthile, siyamkhohlwa uNkulunkulu sidinge uncedo emandleni alize. Lamhla siphakathi kobunzima obukhulu, umhlaba womile, izifuyo ziyafa ziswela amanzi. Nxa sikhangela isibhakabhaka sisibona siluhlaza tshoko, asilangitsho lechatha leyezi. Ngakho-ke, kasibekeni ithemba lethu kuNkulunkulu uSomandla simcele asiphe izulu ukuba lisiphilise thina lezidalwa zakhe.
   
 

B. Ingoma yokungena

K. Isibonakaliso sesiphambano

K. Ukubingelela

K. Isingeniso

B. Ukuzisola ngezono

B. Nkosi sihawukele

Umkhuleko wokucela izulu

Awu, Mdali, Baba, Nkulunkulu, Menzi wethu lowezinto zonke akukhangele ukuhawula kwemuli yakho ngenxa yokuswela kwayo izulu! Khangela ukuhawula kwezifuyo lezinyamazana zasendle! Khangela ukoma kwamasimu lemithombo lamachibi lemifula yethu! Sithembele kuwe, Baba, sithembele kuwe. Kakho omunye esimthembileyo ngaphandle kwakho. Sisize Baba olomusa; sisize Nkulunkulu wesihawu, usithumele izulu elaneleyo, zithokoze ngawe inhliziyo zethu, ihube indumiso yakho ngemilomo yethu, zijabule izifuyo lezinyamazana, zihlume izihlahla lotshani, ubukeke umhlaba, athele amasimu ethu, sibone amandla akho lokulunga kwakho okungelamkhawulo. Sicela ngoKristu iNkosi yethu. Amen.

   
  Izifundo: Levi 26,31-32; 1 Kho 18,30-46; Mat 5,43-48.
  Intshumayelo
  Izikhalazo ezokucela izulu
   
 

Nkulunkulu Somandla, Nkosi yezulu lomhlaba, zonke izinto zingaphansi kwamandla akho. Ilanga, lenyanga lezinkanyezi, konke kulandela intando yakho. Umoya lamayezi kulalela ilizwi lakho. Thumela izulu lakho ukuze izilimo zethu zikhule zisiphe ukudla. Siyakunce- nga ukuba usitshengise kokuphela ukulunga kwakho lozwelo lwakho. - Nkosi, silalele.

Akusibusise, thina zikhonzi zakho, ubusise lakho konke esilakho. - Nkosi, silalele.

Ake ubusise amasimu ethu lenhlanyelo yethu kanye lezifuyo zethu. - Nkosi, silalele.

Kasikhulekeni: Nkulunkulu Somandla Simakade, akulondoloze, ubusise amasimu ethu, usithumele izulu elaneleyo, likhulise izilimo emasimini ethu, sikubonge ngezibusiso zakho. Yembesa iphezulu ngamayezi ezulu, wehlisele umhlaba izulu elaneleyo, usivikele ezingozini zonke. Sicela ngoKristu iNkosi yethu. Amen.

   
  Ukubusisa inhlanyelo:
 

K. Usizo lwethu lusebizweni lweNkosi.

B. Eyenza izulu lomhlaba.

K. INkosi kayibe lani.

B. Kayibe lawe njalo.

Kasikhulekeni: Nkulunkulu Baba Somandla, Menzi wezulu lomhlaba, siyakuncenga sikunxusa ukuba ubusise inhlanyelo yalokhu kudla. Ake uyilondoloze ngokuyithumela umoya omnandi ukuze uyiphephethe, njalo uyithumele amazolo ezulu, khona izavuthwa kuhle, ingoniwa yilutho. Akusitholise ngayo uncedo lwemiphefumulo yethu. Sicela ngoKristu iNkosi yethu. Amen.

   
 

Umkhuleko wokubonga

K. Bayethe, Nkulunkulu wamaxuku, Mvelingqangi wamabandla, Somandla, Simakade, Mninimusa lokulunga konke! Siyakubonga Baba; sibonga umusa lokulunga kwakho, ngezulu elihle osinika lona iminyaka ngeminyaka. Ziyamangalisa izenzo zakho, lomusa wakho lobungcwele lokulunga kwakho kungelinganiswe. UNgcwele, uNgcwele, uNgcwele, Nkosi ...

(Baba wethu... Ekuhle Mariya... Udumo alube...)

K. Isibusiso

B. Ingoma

   
 

next page