PRAYER BOOK

	UMGCOBO WABAGULAYO

	Ingcazelo: Ukugcoba abagulayo akuqaliswanga liBandla eliKhatholika, kwakusenziwa ngabaPhostoli uJesu esesekhona; (Marko 6,13). Kusobalake ukuthi uMgcobo wabagulayo wamiswa nguJesu ngokwakhe, njengamanye amaSakramente. Abagcotshwayo ngabagula kakhulu, kungaba ngumkhuhlane kumbe ingozi yokulimala. Abaluphele kakhulu labo bayemukeliswa umgcobo wabagulayo. Ofuna ukwamukela umgcobo wabagulayo kumele alungise umphefumulo wakhe, azisole ngezono zakhe, enze imvumo nxa kusenzeka, afise ukwamukela iSakramente leli, avume lentando kaNkulunkulu. Nxa umpristi engakafiki, kuhle ukuba amakholwa alungise itafula eduze lomuntu ogulayo, alembese ngelembu elimhlo-phe, abeke isiphambano lamakhandlela amabili, lamanzi abusisiweyo kilo, kodwa atshiye indawo eyaneleyo phakathi ezasetshenziswa ngumpristi.

	Ukugcotshwa kogulayo

	P. Ukuthula kakube kulindlu, lakibo bonke abahlala kuyo. B. Kakube lawe njalo. - Umpristi upha isingeniso mayelana lomgcobo wabagulayo. - Ukuzisola P/B. Ngiyavuma kuNkulunkulu... P. UNkulunkulu uMninimandla wonke, akasihawukele, asithethelele izono zethu, asiphe ukuphila okulaphakade. B. Amen.
	Izifundo: Mat 8,5-10.13; Jak 5,14-16. - Intshumayelo. - Izikhalazo. - Ukubekwa kwezandla ekhanda logulayo.

	P. Woza Moya oNgcwele, welaphe umzalwane wethu lo u... ogulayo. B. Amen. P. Woza Moya oNgcwele, umvikele kikho konke okubi lasemandleni kaSathane. B. Amen. P. Woza Moya oNgcwele, umnike isibindi lolwazi lokuthi bonke abalandela uKristu, bafanele ukuthwala isiphambano sabo, bamlandele. B. Amen.

	UMpristi uthatha amafutha abagulayo abusisiweyo agcobe ngawo ogulayo, ebunzini lasezandleni esithi: Ngalumgcobo ongcwele wabagulayo iNkosi uNkulunkulu kayikusize ngomusa langothando lwayo langamandla kaMoya oNgcwele. UNkulunkulu kakuthethelele izono zakho, akusindise, akubuyisele impilo.
	K. Amen.
	Kasikhulekeni: Nkosi Jesu Kristu, Msindisi wethu, ngamandla kaMoya oNgcwele pholisa ubuhlungu bomzalwane wethu lo u... Umbuyisele impilo enhle yomzimba leyomphefumulo. Ngenxa yothando lwakho lomusa wakho ake umthethelele izono zakhe, umbuyisele impilo epheleleyo, khona ezakuba lamandla okukhonza wena wedwa, ophila ubusa loNkulunkulu uBaba ndawonye loMoya oNgcwele, kuze kube laphakade. Amen.
	- UBaba wethu. - ISidlo esiNgcwele.

	P. Khangelani, nansi iMvana kaNkulunkulu, yona esusa izono zomhlaba. Babusisiwe ababiziweyo eSidlweni seNkosi.
	B. Nkosi, angifanele ukuba ngikwamukele, khuluma ilizwi lodwa, kusile umphefumulo wami.
	P. NguKristu.
	B. Amen

	Umkhuleko emva kokwamukela iSidlo esiNgcwele.

	P. Kasikhulekeni: Nkulunkulu Baba Somandla Simakade, siyabubula kuwe sithobekile, sicela ukuba uKristu owamukelwe ngumzalwane wethu lo u... ogulayo, abe yisisusa sokusiliswa kwakhe, athole ukuphila komzimba lokomphefumulo. Sicela ngoKristu iNkosi yethu. Amen. P. Isibusiso sikaNkulunkulu uMninimandla wonke;uYise, + leNdodana, loMoya oNgcwele, kasehlele phezu kwenu sihlale lani kokuphela. B. Amen.

	Inkonzo yokwamukelisa ogulayo

	Engozini yokufa umuntu ulelungelo lokwamukela amaSakramente. Ngakhoke, angabizelwa uMpristi. Nxa engabhabhathizwanga wonke umuntu owenelisa ukubhabhathiza angambhabhathiza.

	P. Ukuthula akube kulindlu lakibo bonke abahlala kiyo.
	B. Kakube lawe njalo.
	Umamukelisi abesechela ogulayo ngamanzi angcwele.
	P. Angathi amanzi la angcwele angaba yisikhumbuzo kuwe, sobudlelwano lokuhlanganyela olakho eNkosini yakho, yona eyakusindisa ngokufa langokuvuka kwayo. B. Amen.
	Nxa ogulayo efuna ukwenza imvumo angayenza nxa umpristi ekhona Ukuzisola.

	Ngiyavuma kuNkulunkulu...
	P. UNkulunkulu uMninimandla wonke, akasihawukele, asithethelele izono zethu, asiphe ukuphila okulaphakade. Amen.

	Izifundo: Joha 6,54-59; 14,6.23.27; 15,1-5; 1 Kor 11,23b-26) Intshumayelo, Izikhalazo.

	P. Kasikhulekeni kuBaba wethu uSomandla ngamazwi esawafundiswa nguJesu Kristu uMsindisi wethu sithi: B. Baba wethu... Amen.
	Ukwamukela iSidlo esiNgcwele.
	P. Khangelani, nansi iMvana kaNkulunkulu, yona esusa izono zomhlaba. Babusisiwe labo ababiziweyo eSidlweni seNkosi. B. Nkosi, angifanele... P. NguKristu. K. Amen. P. Kasikhulekeni: Nkulunkulu Baba, Somandla Simakade, siyakuncenga sithobekile ukuba uMzimba leGazi likaKristu kulethe ukuphila komzimba lokomphefumulo kumzalwane wethu lo osekwamukele. Sicela ngoKristu iNkosi yethu. B. Amen.

	Isibusiso. P. Isibusiso sikaNkulunkulu uMninimandla wonke uYise, + leNdodana, loMoya oNgcwele, kasehlele phezu kwenu, sihlale lani kokuphela. B. Amen.

	Ukusiza lokukhulekela ophansi kokufa

	Ingcazelo: Nxa umKhatholika egula kakhulu kumbe elimele kakhulu, ebonakala ukuthi usengozini yokufa, abakhonapho bangamsiza ngalezi indlela:
	Ukumsiza ukuba azisole ngezono zakhe zonkengenhliziyo yakhe yonke. Ukumsiza ukuba avuselele ukukholwa, lokuthembakwakhe lokuthanda uNkulunkulu, lokuzibeka ezandleni zakhe, lokwamukela intando yakhe engasoli. Ukumbizela umpristi nxa kusenzeka.
	UMTSHADO

	P. = Umpristi Y. = Umyeni L. = Umlobokazi B. = IBandla

	Ingcazelo: UNkulunkulu ngokwakhe nguye owadala umtshado ngokudala umuntu wesilisa lowesifazana; (Gen 1,27). Esebadalile wathi kibo: “Zalani lande, ligcwalise umhlaba” (Gen 1,28). Nguye owenza abatshadileyo babe nyamanye okwempilo yabo yonke; (Mat 19,3-5). Ifindo loMtshado elingathukulukiyo libotshwa nguye uqobo; (Mat 19,6). Ngakhoke abatshadileyo kabakwazi ukwehlukana omunye wabo esaphila.

	Ukuhlanganiswa kwabo
	P. Lina bazalwane elizahlanganiswa lamhla, khumbulani kokuphela ukuthi ekuqaleni uNkulunkulu wadala indoda inye lomfazi munye, wathi ababili labo sebenyamanye. Ngakhoke, libothembeka kokuphela omunye komunye, lingavumeli uSathane ukuba afake ukungathembeki komunye wenu. Njengoba isithembiso somtshado sisenziwa kuNkulunkulu phambi kweBandla lakhe, njalo kunguye uNkulunkulu uqobo obopha ifindo loMtshado, umtshado wenu kawusoze ukhululwe muntu, uze uchithwe yikufa komunye wenu. Angithi liyakuqedisisa lokhu na?
	Y./L. Yebo, siyakuqedisisa. P. Njengoba uNkulunkulu wadala indodanye lomfazi munye, wabenza baba nyamanye, ukuthatha umfazi wesibili loba ukwendela kwenye indoda umkakho esaphila kuphambene lomlayo kaNkulunkulu. Angithi liyakwazi lokho kuhle na? Y./L. Yebo, siyakwazi. P. Lizimisele ukugcina izibopho zoMtshado lokuhlala lithandana, lingumzimba munye lize lehlukaniswe yikufa na? Y./L. Yebo, sizimisele. P. Lina Bandla elilapha, lani zinini labangane babo, lizwile ukuthembisa kwabo na? B. Yebo, sizwile. P. (Kumyeni): Wena ..., uzikhethele ngentando yakho ukutshada lo... olapha, kumbe usiselelwe na? Y. Ngizikhethele. P. (Kumlobokazi): Wena ..., uzithandele yini ukutshada lo... olapha kumbe usiselelwe na? L. Ngizithandele.

	Izifungo zabatshadayo:
	P. Njengoba selivumile ukuhlanganiswa, tshengisani ukuzinikela kwenu ngokuhlanganisa izandla zenu zokunene, lenze izifungo zenu phambi kukaNkulunkulu leBandla lakhe. (Besebebambana izandla).
	Umyeni:
	Mina..... ngiyathathana lawe ..... ube ngumkami. Ngiyakuthembisa ukuthi ngizakuba qotho kuwe ekuthokozeni lasekuhluphekeni, ekunotheni lasebuyangeni, ekuguleni lasempilweni enhle. Ngizakuthanda ngikuhloniphe ekuphileni kwami konke.

	Umlobokazi:
	Mina ..... ngiyathathana lawe.... ube ngumkami. Ngiyakuthembisa ukuthi ngizakuba qotho kuwe ekuthokozeni lasekuhluphekeni, ekunotheni lasebuyangeni, ekuguleni lasempilweni enhle. Ngizakuthanda ngikuhloniphe ekuphileni kwami konke.

	P. Bazalwane abathandekayo, selisenzile isifungo senu esokuthathana phambi kukaNkulunkulu leBandla lakhe. Sengathi iNkosi ngokulunga kwayo ingaqinisa isifungo senu lothando lwenu, ilibusise ngezibusiso zayo ezinengi. Lokho uNkulunkulu akuhlanganisileyo kakungahlukaniswa muntu. Ngebizo likaYise, + leleNdodana, lelikaMoya oNgcwele. Y./L. Amen.

	Ukubusiswa kwendandatho:
	P. Sengathi iNkosi ingabusisa lezindandatho elizinikanayo njengesibonakaliso sokuthandana lokuthembana kwenu. Ngebizo likaYise, + leleNdodana, lelikaMoya oNgcwele. Y./L. Amen.

	Ukugqokisana indandatho:
	Y. Yamukela indandatho le eyisibonakaliso sothando lokuthembeka kwami. Ngebizo likaYise, + lele-Ndodana, lelikaMoya oNgcwele. (Umlobokazi angenise indandatho emunweni wesibili wenxele). L. Yamukela indandatho le eyisibonakaliso sothando lokuthembeka kwami. Ngebizo likaYise, + lele-Ndodana, lelikaMoya oNgcwele. (Umyeni angenise indandatho emunweni wakhe wesibili wenxele.)

	*Umkhuleko emva kukaBaba wethu:*
	P. Bazalwane abathandekayo, uNkulunkulu uBaba, uMdali wabantu, wenza ukuba indoda yokuqala lomfazi wokuqala babe nyamanye, bathandane, bakhe umuzi. Kusukela ngalesosikhathi kuze kube lamhla uyababusisa abatshadayo. Ukuthandana kwabo lokuba muntu munye kwabo kuyinto engcwele, esiyifanisa lokuthandana kuka-Kristu leBandla lakhe. Bazalwane abathandekayo, kasiceleni uNkulunkulu ukuba abusise abatshadileyo laba, bahlale bethandana empilweni yabo yonke (beqiniswa nguMzimba leGazi likaJesu Kristu asebezawamukela). Abesebusisa umyeni, esithi: P. Nkulunkulu Baba, mlondoloze kokuphela umntanakho lo u... umbusise athandane lomkakhe ngeqiniso, amthembe, akwazi ukuthi laye ungumntanakho njengaye, amphathe ngendlela elungileyo, amthande njengoKristu ethanda iBandla lakhe. Abesebusisa umlobokazi, esithi: P. Nkulunkulu Baba, mlondoloze kokuphela umntanakho lo u..., umbusise abe ngumama othandana lomkakhe, ahlalisane laye ngesihle. Msize ukuba abe ngumama oqotho, olungileyo njengoSara loRuthe loAnna, labanye omama abalapha, abenza imisebenzi ekuthokozisayo. Abesebabusisa bobabili, esithi: P. Basize, Baba, abantwabakho laba, ukuba bagcine imilayo yakho. Yenza ukuba babe ngamakholwa aqinileyo; babe ndodanye lomfazi munye. Baphe izifiso zokulazisisa ibizo lakho, lokudonsela abanye kuwe ngesibonelo sabo esihle. (Baphe inzalo, ubasize babe ngabazali abondla abantwababo ngendlela elungileyo) Yenza ukuba lapho isikhathi sabo sokusuka kulumhlaba sesifikile, bazethokoza lawe ezulwini, labangcwele bonke kuze kube lanini. Amen.

	UBUPRISTI

	Ingcazelo: EBandleni eliKhatholika ubupristi bulezigaba ezintathu: Ububhishopi yibupristi obugcweleyo. Ababhishopi balamandla avela kubaphostoli. Ababhishopi bangabaphathi beBandla eliKhatholika bekanye loPhapha umlandeli kaPhetro uPhapha wokuqala. Abapristi bangabancedisi bababhishopi, balamandla okwamukelisa wonke amaSakramente ngaphandle kwelobupristi. Abadikoni basesigabeni sesithathu sobupristi basiza ababhishopi labapristi. Balamandla okubhabhathiza lokutshumayela, lokubusisa, lokungcwaba abantu, lokwamukelisa iSidlo esiNgcwele lokutshadisa.

	Uhlelo lokumiswa kompristi.
	Ogcotshwayo uyabizwa. Uyethulwa ngomunye wabapristi kumbhishopi. Uyemukelwa ngumbhishopi. Umbhishopi umlaya ngemisebenzi yobupristi Uyahlolwa ngokuzimisela kwakhe ukwenza imisebenzi yobupristi. Uyathembisa ukulalela umbhishopi. Uyacambalala akhulekelwe iLithani labangcwele. Ubekwa izandla ekhanda ngumbhishopi labapristi bonke. Uyamiswa ubupristi ngomkhuleko omkhulu wokumisa abapristi okhulekwa ngumbhishopi. Ugqokiswa izembatho zobupristi. Uyagcotshwa izandla ngamafutha eKrizima. Uphathiswa isinkwa lewayini okutshengisa amandla okwenza iMisa. Uyasingathwa yibo bonke abapristi besithi kuye: "Ukuthula kakube lawe."
	IZINKONZO

	A. Uhlelo lwenkonzo yesigaba
	(Section; Outstation)
	Ingoma yokuvula. Ukubingelelwa komphakathi; lenjongo yomthandazo. Ukuzisola ngezono. Umkhuleko wokuvula. Isifundo. Ingcazelo, intshumayelo loba ukwabelana ilizwi likaNkulunkulu. Ingoma. Izikhalazo, Baba wethu; umkhuleko wokuvala. Imibiko. Ingoma yokuphuma.
	B. Amanyathelo ayisikhombisa okukhuleka sisebenzisa ibhayibhili
	(Lumko 7 steps Method)

	*1. Siyanxusa iNkosi ukuba ibe lathi kulumkhuleko* Sicela omunye asinxusele uJesu ukuthi abe phakathi kwethu.

	*2. Siyabala isifundo ebhayibhilini* EBhayibhilini; asivuleni ku... isahluko...Omunye kasibalele indima kusukela ku... kusiya ku... Omunye kasibalele njalo ngokwesibili (ngokwesithathu).

	*3. Siyaqamba amazwi asithintileyo, sicabange ngawo* Siyaqamba amazwi kumbe imitsho emifitshane esithintileyo enhliziyweni zethu. Siyayibala kakhulu siyitsho, sikhuleka enhliziyweni zethu. Ibala linye siliphinde kathathu, kusiba lokuthula phakathi kokuphinda kwethu lelo lalelo bala.

	*4. Siyapha uNkulunkulu ithuba lokuthi akhulume kithi, sithule* Siyathula okwemizuzu emibili (emithathu, emine, emihlanu) siphe uNkulunkulu ithuba lokuthi akhulume kithi, simlalele.

	*5. Siyabelana esikuzwileyo enhliziyweni zethu* Yiliphi ibala elikuhlabileyo loba elikuthintileyo? Asiphikisani, njalo asitshumayeli. Lowo lalowo ukhangela ukuthi yiliphi ibala elimhlabileyo, kumbe iLizwi leNkosi lithini kuye. (Asikhulumi ngokuthi iLizwi lithini kwabanye abantu ngoba uma sisenza lokho sesitshumayela). Singabelana ngezinye indlela ebesiphila ngazo ngokholo. (Ngingabelana labanye ngokunye engakwenzelwa nguNkulunkulu empilweni yami, loba into engayibonayo kwabanye mayelana lokuphila okuhambelana lalokho esikuzwe elizwini leNkosi). Asibambi ngamandla ukuba abantu bakhulume.

	6. Siyaxoxisana ngezinto eziqondane lempilo yethu langemisebenzi engenziwa yithi sibambene Siyabelana ngesakwenza ngesikhathi esedlulayo. Yiwuphi umsebenzi omutsha esingawenza? Ngobani abazakwenza umsebenzi othile njalo bazawenza nini?

	*7. Siyakhuleka ndawonye* Abantu abathile benza imithandazo yabo yekhanda kumbe izikhalazo. Ekucineni siyenza umthandazo ojwayelekileyo kumbe sihlabele ingoma.

	C. Ukukhuleka sisebenzisa imibhalo engcwele
	(Lectio Divina)

	Endulo, lindlela yokukhuleka sisebenzisa imibhalo engcwele yayisetshenziswa yizidelamhlaba ezazibizwa ngokuthi ngama-Monks. Lamhlanje iBandla likhuthaza amakholwa onke ukusebenzisa lindlela yokulalelisisa iLizwi likaNkulunkulu ngendlela ejulileyo. “Ngokunjalo, ilizwi liseduze lani, lasemilonyeni yenu lenhliziyweni zenu ukuba liligcine” (Dute 30,14). Indlela le yakhelwe phezu kwamanyathelo amahlanu:

	*Isingeniso:* Siqala ngengoma besekulandela umkhuleko wokuvula, sizibeka phambi kukaNkulunkulu sicele umoya wokulalela isifundo esithethwe eBhayibhilini.

	Inyathelo lokuqala. Siyabala* (Read)*

	Umkhokheli: Ngicela omunye wethu asibalele isifundo esisithatha ku... iSahluko... indima... (Obalayo kangasijahi lesisifundo. Imibuzo: UJesu uthini kimi ngalesisifundo na? Yiwuphi umbiko oqakathekileyo engiwufumanayo kulesisifundo na?) (Asithuleni okwesikhatshana) Ngicela njalo omunye asibalele lesisifundo.

	Inyathelo lesibili: Siyazindla* (Meditation)*

	Umkhokheli: Asicabangisiseni ngokujulileyo ngamazwi angcwele esisanda kuwabala. (Imibuzo: Ngiyawamukela yini wonke amazwi la empilweni yami na? Amazwi la alendawo yini empilweni yami na? Yiliphi icebo uNkulunkulu alalo kimi na?) (Asithuleni okwesikhatshana)

	Inyathelo lesithathu: Siyakhuleka (Pray)

	IUmkhokheli: Njengoba sesilazi icebo likaNkulunkulu, siyakhuleka ngokuthula sisamukela amazwi kaNkulunkulu enhliziyweni zethu. (Lesi yisikhathi sokuba simdumise uNkulunkulu, loba simbonge, loba silethe izikhalazo zethu kuye kumbe sizisole ngezono zethu.)

	Inyathelo lesine: Ukunakana ngokuthula (Contemplation)

	Umkhokheli: Asinikeni uNkulunkulu ithuba lokukhuluma enhliziyweni zethu. Asithuleni okwemizuzu ethile. (Khathesi sesiqalisa ukubona ibizelo lethu ngendlela entsha kaNkulunkulu. Yisikhathi sokumvumela uNkulunkulu ukuguqula impilo yethu kube nguye osebenzayo phakathi kwayo). (Asithuleni okwesikhatshana)

	Inyathelo lesihlanu: Ukuthunywa* (Missio)*

	Umkhokheli: Emva kokuba sesilibalile iLizwi likaNkulunkulu, sazindla, sicabangisisa ngokujulileyo ngalo, sakhuleka ngalo, sanakanisisa ngalo ngokuthula, asimvumeleni uNkulunkulu ukuba asithume ukwenza lokho afuna ukuba sikwenze empilweni yethu. Mhlawumbe uyasithuma ukuba siye batshumayeza abanye ilizwi lakhe ukuze labo bamsebenzele. Umkhuleko wokuvala: Asivaleni umthandazo wethu walamhla ngokukhuleka sisithi: (Baba wethu.. Ekuhle Mariya.. Udumo... Ingoma.)


	next page