PRAYER BOOK

	Imvumo yamajaha lezintombi

	Umkhuleko wokuvula:
	Nkulunkulu Baba, khangela ngomusa mina mntanakho engiyisoni! Ngiyazithoba ngizilahlela phambi kwakho ngivuma izono zami. Akungithumele uMoya oNgcwele ukuthi angisize ukwenza imvumo yami ngemfanelo, ungiphe amandla ngingabuyeli odakeni lwesono. Mama Mariya, wena obonayo ubuhlungu beNdodana yakho ngenxa yezono zami, akungifundise ukuzonda isono, nginanzelele ukuthi ngesono esincinyane nginyathela uJesu enyaweni, njalo ngesono esikhulu ngigwaza inhliziyo yakho. Akungicelele kumntanakho uJesu angihawukele angithethelele. Amen.

	Ukuhlolisisa inhliziyo:
	*Ukuzigqaja*

	Ngazigqaja yini, ngazibona ngingcono kulabanye? Angilalelanga ngilaywa na? Ngakhuluma kubi ngoNkulunkulu ngamenza inhlekisa na? Ngasola abazali lababalisi na? Ngadinga imithi yenhlanhla na? Ngadinga imithi yokudlala ibhola lokuthandwa ngamankazana kumbe ngabafana na? Ngaba lolunya lokuncitshana na? Ngaveza imfihlo zabanye na? Ngeyisa abazali babanye ngemfundo langokugqoka na?

	*Umhawu*

	Ngaba lomhawu na? Ngalwela isikhundla na? Ngabangisana lomunye impahla yakhe na? Ngazondela abanye ngoba bengcono kulami ebusweni, esikolo, ekugqokeni, ebugabazini na? Ngona ulutho lomunye na? Ngafihla ulutho lomunye na? Ngatshontsha impahla yomunye na? Kangiyibuyiselanga na?

	*Ubufebe*

	Ngagqoka kubi ukuze ngithiye abanye ngibadonsela esonweni na? Ngabamba kubi umzimba wami olithempeli likaMoya oNgcwele na? Ngavuma ukubanjwa kubi ngomunye na? Ngafeba na? (Ngafeba ngemicabango, ngamacebo amabi, ngezenzo) Ngathelela abanye imikhuhlane evela ekufebeni na? Ngacecisa indlu ngemifanekiso enqunu na? Ngaya emidlalweni engcolileyo na? Ngafungela ukwenza isenzo esibi na? Ngathandana labangane ababi na? Ngayenga umfana loba inkazana ngiyikhuthaza ukungaziphathi na? Ngavala inzalo ngamaphilisi lokunye okunjalo na? Ngabala izincwadi ezingcolileyo ngabukela lamabhayisikopo loba imifanekiso engafanelanga na?

	*Ulaka*

	Ngaba lolaka lokukhahlameza abanye na? Ngaba lolunya na? Ngaphindisela okubi ngokubi na? Ngabulala kumbe ngabulalisa umuntu na? Ngalwa ngalimaza loba ngaphuthisela omunye na? Ngaba lomlomo ngaxega abantu na? Ngala ukusiza abazali na? Angizithintanga olakeni na? Ukhona umuntu engimzondayo engingakamthetheleli na? Ngakhupha isisu na?

	*Ubuhwaba*

	Ngaminza kumbe ngadakwa na? Ngancitsha abahluphekayo na? Ngadlalisa imali yesikolo na? Ngachitha imali ekunatheni loba egwayini loba emakhasini na? Ngabhema imbanje loba ngahotsha i-glue na? Nganatha ithothotho loba okunye okudakayo na? Ngasebenzisa abanye abantu ukuzuza ngabo imali na?

	*Umona*

	Ngaba lomhawu loba ubukhwele na? Ngacabangela abanye okubi na? Angibathembi abanye abantu na? Ngaqilibezela abanye na? Ngazuza imali ngobuqili na? Ngona impahla yomunye ngabomo na? Angijabulelanga okuhle okwabanye njengoba ngijabulela okuhle okwami na? Ngavimbela omunye ukuthi angaphumeleli ngenxa yomona na?

	*Ubuvila*

	Angikhulekanga ngokukhuthala na? Ngala ukukhuleka labanye ngekhaya na? Angingenanga iMisa ngamasonto na? Ngatshiya iBandla eliKhatholika elaqaliswa nguJesu ngalandela elinye na? Angiphanga abanawami isibonelo esihle sokukholwa na? Ngayekela abazali bami behlupheka ngingabasizi ukuthi bazuze okubaphilisayo na? Ngachitha isikhathi ezintweni eziyize na? Ngabaleka esikolo na? Ngayekela umsebenzi omuhle ngenxa yobuvila na?

	Ukuvuma izono: Khuleka umkhuleko wokuzisola. Vuma izono kumpristi, ulandela indlela.

	Imvumo yabantwana

	Umkhuleko wokuvula:
	Nkulunkulu Baba, ngiyazisola ngoba ngonile ngokungalaleli abazali bami labadala lababalisi bami, langokweqa imilayo yakho. Ngiyacela Baba, ukuba ungixolele izono zami zonke, ungiphe amandla okuba ngingaphindi ngikone futhi. Akukhanyisele inhliziyo yami, ukuze ngikhumbule kuhle ngizisole ngazo izono zami ngizivume kuhle kumpristi. Amen.

	Ukuhlolisisa inhliziyo: Sekulesikhathi esingakanani ngacina ukuvuma na? Ekuvumeni kwami kokucina ngavuma kuhle yini? Engakuthembisayo uNkulunkulu, ngakwenza yini?

	*1. Ukuphilela uNkulunkulu;*

	Ngaphutha ukuthandaza ekuseni lantambama lekudleni na? Ngakhuleka ngomlomo inhliziyo yami ingekho emthandazweni na? Ngakhuluma ngahleka ngadlala endlini kaNkulunkulu na? Ngaphuza eMiseni ngeSonto loba enkonzweni na? Ngaphutha eSontweni ngabomo na? Ngafunga amanga ngebizo likaNkulunkulu yini? Ngadlala ngezinto zikaNkulunkulu lezeBandla na? Ngafuna ukuphuma kuBandla eliKhatholika likaJesu na?

	*2. Ngekhaya;*

	Angilalelanga abazali labantu abadala kimi na? Ngabazondisa ngabeyisa na? Ngabaqambela amanga na? Ngababiza ngamabizo amabi na? Ngadlalisa imali yabo na? Ngazondisa, ngatshaya abanawami na? Ngaqilibezela abanye na? Ngadlala ngezinto eziyingozi njengomlilo na? Ngaphatha ngesihluku izifuyo na? Ngakhuthaza omunye ukona na? Ngakhuluma inhlamba na? Ngeyisa abanye ngabahleka loba ngabachothoza na? Ngahleka izigoga, ngenza ubuphoxo ngazo na?

	*3. Esikolo;*

	Ngahlupha ababalisi yini? Ngabaqambela amanga loba ngababiza ngamabizo amabi na? Angifundanga ngokukhuthala na? Angenzanga imisebenzi engangiyiphiwe esikolo na? Ngatshontsha ingwalo loba amapenseli abanye na? Ngadabulela abanye izembatho zabo na? Ngathathela abanye ukudla kwabo na? Ngachitha impahla yesikolo ngobutshapha na? Ngafundisana labanye izenzo ezingcolileyo na?

	*4. Ngesikhathi sekhefu;*

	Ngaphuza ukubuyela ekhaya na? Ngabalekela ukuthunywa na? Ngalala lapho engingavunyelwanga khona na? Ngaba labangane abangalunganga na? Ngatshontsha yini? Kuyini engakutshontshayo na? Ngabalekela umsebenzi ngayazidlalela labangane na?

	*5. Ngingedwa;*

	Ngacabangela abanye okubi na? Ngaba lomhawu na? Ngenyanya abanye na? Ngafisa ukuganga na? Ngadlala kubi ngomzimba wami na? Ngavumela abanye ukudlala kubi lami na?

	*6. Ukuphilela abanye;*

	Ngazibona ngingcono kulabanye yini? Ngancitshana ngokudla na? Ngazwisa abanye ubuhlungu ngamazwi loba ngezenzo na? Nganyeya abanye na? Ngona ibizo lomunye ngokumqambela amanga na?

	Ukuvuma izono

	Ukuzimisela ukuthi ngingoni. Zimisele ukuthi uzakwenza konke okusemandleni akho ukuthokozisa uNkulunkulu, uxwaye ukumona ngenhliziyo yakho yonke.

	Ukuzisola ngezono

	Nkulunkulu wami, inhliziyo yami ibuhlungu kakhulu, ngoba ngikonile wena Baba olobuhle obungapheliyo. Sengizimisele ukukuthanda phezu kwakho konke okudaliweyo. Ngiyazizonda izono zami zonke; ungisize ngamandla akho, ngingaphindi ukwenza isono.

	loba:

	Uzisole usebenzisa iHubo 51, eBhayibhilini.

	Emva kokuzisola, uyahamba kumpristi uyekwenza imvumo ngale indlela. Uyaguqa kumbe uhlale phansi wenze isibonakaliso sesiphambano.

	K. Ngebizo likaYise, + leleNdodana, lelikaMoya oNgcwele. Umpristi: P. Angathi uNkulunkulu okhanyisela inhliziyo zethu angenza ubone izono zakho, uzwisise lesihawu sakhe. Amen. K. Mina ngingumuntu othetheyo/ongathathanga oleminyaka engu...

	loba:

	K. Mina ngingumuntu owendileyo/ongendanga oleminyaka engu.... K. Sekwedlule amalanga angu... /amaviki angu... / izinyanga ezingu... /iminyaka engu.... ngenzile imvumo yami yokucina. Izono engazenza ngemva kwemvumo yami yokucina yilezi: Nga... (vuma izono zakho ngokucacileyo, ungesabi ngoba uzathola ukuxolelwa nguNkulunkulu leBandla lakhe.) Nxa usuqedile ukuvuma uthi: Sengiqedile ngicela intethelelo.

	kumbe:

	Jesu, yiba lomusa kimi. Umpristi uyakunika izeluleko ezithile, lenhlawulo yezono ozayenza. Abesekutshela ukuba uzisole ngezono.

	UNkulunkulu uYise olomusa wonke, owabuyisana lomhlaba ngokufa langokuvuka kweNdodana yakhe, wathumela uMoya oNgcwele ukuze izono zithethelelwe, akuthethelele izono zakho, akuphe ukuthula ngamandla asetshenziswa liBandla lakhe engingummeli walo. Ngakho-ke ngiyakuthethelela izono zakho ngebizo likaYise, + leleNdodana lelikaMoya oNgcwele. K. Amen. P. INkosi isikuthethelele izono zakho. Hamba ngokuthula. K. Amen.

	Ukubonga emva kokuvuma

	Nkulunkulu Baba, ngiyakubonga ngenhliziyo yami yonke ngokungixolela kwakho izono zami. Baba, mkhulu kangaka umusa wakho! Yeka ubukhulu bothando lwakho olumangalisayo. Inhliziyo yami isimhlophe, njalo isimsulwa, usuzisusile izono zami. Jesu wami ugezisile umoya wami ngegazi lakho elingcwele. Ngiyakubonga kakhulu. Ngiswela imilomo ezinkulungwane yokukubonga ngayo. Akungisize ngingaphindi ngone njalo, ungisize ngibalekele zonke izinto ezingangingenisa esonweni. Ngisize ngibe ngumntanakho othembekileyo. Mama Mariya, ungikhulekele ukuba ngilondoloze ubungcwele lobu engibuphiwe nguMoya oNgcwele eSakramenteni leMvumo, ngize ngibonane lawe kuNkulunkulu ezulwini. Amen.

	next page