UMKHULEKO OMKHULU WOKUBONGA (II)
   
 

P. INkosi kayibe lani.

B. Kayibe lawe njalo.

P. Phakamisani inhliziyo zenu.

B. Siziphakamisele eNkosini.

P. Kasibongeni iNkosi uNkulunkulu wethu.

B. Kufanele, kulungile.

P. Ngempela kufanele njalo kulungile, ukuba ngezikhathi zonke lasendaweni zonke, sikubonge Baba, ngeNdodana yakho uJesu Kristu iNkosi yethu. Nguye oyiLizwi owadala ngalo izinto zonke. Nguye onguMsindisi owamthuma ukuzasihlenga. Ngamandla kaMoya oNgcwele waba ngumuntu, wazalwa liVirigo uMariya. Ngenxa yethu welula ingalo zakhe, wabethelwa esiphambanweni, wanqoba ukufa, wabonakalisa amandla okuvuka ekufeni.

Ngalesosenzo waphelelisa intando yakho, wakumisela isizwe esingcwele. Ngalokhoke sihlanganyela lezithunywa zasezulwini, ndawonye.labangcwele bonke, sihubela ubukhosi bakho sisithi:

   
 

B. UNgcwele, uNgcwele, uNgcwele,

Nkosi Nkulunkulu wamaxuku!

Izulu lomhlaba kugcwele ubukhosi bakho.

Hosana kweliphezulu!

Ubusisiwe ozayo ebizweni leNkosi.

Hosana kweliphezulu!

   
 

P. Ngempela uNgcwele Nkosi, ungumthombo wobungcwele bonke.

Ake uthumele uMoya wakho ungcwelise izipho lezi, usiphendulele zona, zibe nguMzimba + leGazi leNkosi yethu uJesu Kristu.

Owathi ngaphambi kokuba anikelwe ekufeni, ukufa akuvuma ngentando yakhe, wathatha isinkwa wakubonga, wasihlephula, wasipha abafundi bakhe esithi:

   
 

Thathani lonke lidle:

lokhu kungumzimba wami

ozanikelelwa lina.

   
  Sebedlile, wathatha inkezo, wakubonga njalo, waseyinika abafundi bakhe esithi:
   
 

Thathani lonke linathe:

le yinkezo yeGazi lami,

iGazi lesivumelwano esitsha esingayikuphela,

elizachithwa ngenxa yenu labantu bonke,

ukuze izono zithethelelwe.

Yenzani lokhu lingikhumbule ngakho.

   
  P. Bazalwane, kasivumeni imfihlakalo yokholo lwethu.
   
 

B. UKristu wasifela,

UKristu wavuka,

UKristu uzabuya njalo.

   
 

loba

   
 

Ngokufa kwakho wabhubhisa ukufa kwethu,

ngokuvuka kwakho wabuyisela impilo yethu;

uzabuya ngobukhosi.

   
 

loba

   
 

Uba sisamukela uMzimba leGazi lakho Nkosi, sibabaza ukufa kwakho uze ubuye.

   
 

loba

   
 

Nkosi, ngokufa kwakho langokuvuka kwakho wasikhulula, wena onguMsindisi womhlaba.

   
 

Baba, ngokukhumbula ukufa lokuvuka kukaKristu, siyethula kuwe lesiSinkwa esiphilisayo, lalinkezo esindisayo. Siyakubonga wena Nkosi osenze safanela ukuma phambi kwakho sikukhonza. Siyakuncenga, Baba, ukuba thina sonke esamukela uMzimba leGazi likaKristu, sihlanganiswe ndawonye nguMoya oNgcwele, sibe munye.

Nkosi, khumbula iBandla lakho elisemhlabeni wonke, usiphe sonke uthando, ukuze sibe munye loPhapha wethu u..., loMbhishopi wethu u..., labo bonke abasesikhundleni sobupristi, lezidelamhlaba zonke labantu bakho bonke.

 

EMiseni yabafileyo:

 

(Khumbula u... osumthethe kulumhlaba wambizela kuwe. NgoMbhabhathizo wafa kanye loKristu, sengathi angavuka laye njalo.)

Akukhumbule abazalwane bethu bonke abalele ekuphumuleni belethemba lokuvuka njalo. Bangenise enkazimulweni yakho kanye labo bonke abafa belobuzalwane lawe.

Sihawukele lathi sonke esilapha, usenze sifanele ukuphila okulaphakade ndawonye loMariya iVirigo, uNina kaNkulunkulu, kanye labaPhostoli labangcwele bonke abenza intando yakho ngezikhathi zonke. Angathi singakubonga kanye labo, sikudumise ngeNdodana yakho uJesu Kristu.

   
 

Ukudumisa uNkulunkulu uBaba

 

Ngaye uKristu, ukanye laye, ukuye uKristu,

uthola lonke udumo lobukhosi,

Wena Nkulunkulu Baba Somandla,

ndawonye loMoya oNgcwele,

kuze kube lanini. Amen.

   
 

loba

   
 

Siyakudumisa Baba, ngomlomo kaKristu,

Siyakudumisa Baba, thina amalunga kaKristu.

Siyakudumisa Baba, ngoMoya ohlala phakathi kwethu.

Siyakudumisa Baba, kuze kube laphakade. Amen.

   
 

UKULUNGISELELA ISIDLO ESINGCWELE

   
  P. Kasikhulekeni ngokuthemba kuBaba ngamazwi uMsindisi wethu asilaya wona sithi:
   
 

Baba wethu osezulwini,

alidunyiswe ibizo lakho,

awuze umbuso wakho,

intando yakho kayenziwe emhlabeni njengasezulwini.

Sipha lamhla ukudla kwethu okwansuku zonke;

usixolele izono zethu, njengalokhu lathi sibaxolela abasonayo thina.

Ungasingenisi ekulingweni,

kodwa usisindise ekubini.

   
 

Ukucela ukuvikelwa ebubini

   
  Sisindise Nkosi ebubini bonke, usiphe ukuthula ngalezinsuku zethu. Sisize ngesihawu sakho, usikhulule emandleni esono, usivikele enkathazweni zonke lapho sisalindele ngethemba langenjabulo ukuza koMsindisi wethu uJesu Kristu.
  B. Ngoba umbuso ungowakho, lamandla, lobukhosi, kuze kube lanini.
   
 

Ukucela ukuthula
   
  Nkosi Jesu Kristu wena owathi kubaPhostoli bakho: Ngilitshiyela ukuthula ngilipha ukuthula kwami. Ungakhangeli izono zethu, kodwa khangela ukukholwa kweBandla lakho, usiphe ukuthula lokumanyana kwasembusweni wakho, lapho ohlezi khona ubusa kuze kube laphakade. Amen.
   
 

P. Ukuthula kweNkosi kakube lani kokuphela.

B. Kakube lawe njalo.

P. Bazalwane, kasitshengiseni ukuthandana lokuxolelana kwethu ngokuxhawulana.

 

Oxhawulayo: Ukuthula kakube kuwe!

Oxhawulwayo: Kakube lawe njalo.

   
 

Ukwemukela iSidlo esiNgcwele

   
 

Mvana kaNkulunkulu, wena osusa izono zomhlaba; Sihawukele.

Mvana kaNkulunkulu, wena osusa izono zomhlaba; Sihawukele.

Mvana kaNkulunkulu, wena osusa izono zomhlaba; Siphe ukuthula.

   
 

P. Nkosi yethu Jesu Kristu, ngokuthemba uthando lesihawu sakho siyawemukela uMzimba leGazi lakho. Ungasilahli ngenxa yokungafaneli kwethu, kodwa usiphe impilo yomoya lomzimba.

P. Khangelani, nansi iMvana kaNkulunkulu, yona esusa izono zomhlaba! Odla lesisinkwa uzakuphila kokuphela.

B. Nkosi kangifanele ukuba ngikwamukele, khuluma ilizwi lodwa kusile umphefumulo wami.

P. NguKristu.

K. Amen.

P. Kasikhulekeni. Nkosi Nkulunkulu Baba, usisuthisile ngesinkwa esivela ezulwini. Siyakubonga. Sigcwalise ngoMoya wakho oNgcwele, usenze sibe munye ngokuthula langokuthandana, usivikele ezingozini zonke. Sicela ngoKristu iNkosi yethu. Amen.

   
 

Isiphetho senkonzo

   
 

P. INkosi kayibe lani.

B. Kayibe lawe njalo.

P. Kalibusise uNkulunkulu uMninimandla wonke. UYise, + leNdodana, loMoya oNgcwele.

B. Amen.

P. Hambani ngokuthula kukaKristu.

B. Kabongwe uNkulunkulu.
   
  Imikhuleko yokwamukela isiDlo esiNgcwele
   
  Phambi kokwamukela
  Sesifikile Nkosi Jesu, isikhathi sokwamukela iSakramente elinguMzimba wakho. Angifanele ukusondela lokusidla lesiSinkwa sezithunywa, esivela ezulwini. Kodwa ngiyakholwa ukuthi ukhona sibili kuleliSakramente: ngoMzimba leGazi, loMoya lobuNkulunkulu bakho. Ngiyafisa kakhulu ukuba ungene enhliziyweni yami, uyigcwalise ngezipho zakho zokomoya. Ithemba lami lonke likuwe: Wozake, Nkosi yami loMsindisi wami! Hlala kimi, lami ngihlale kuwe, ungavumi ukuba ngehlukane lawe ngokwenza isono. Amen.
   
  Emva kokwamukela
  Jesu wami, usuhlezi enhliziyweni yami! Ngiyakhuleka ngihlonipha kakhulu. Ngindawonye labangcwele lezithunywa zasezulwini ngiyakubonga, ngikudumisa, ngisithi: UNgcwele, uNgcwele, uNgcwele Nkosi! Ngiyakubonga kakhulu ngokungithanda kwakho okungaka. Wabusisa uMariya loJosefa, ngokuhlala labo. Lamhla ungibusisile ngokuzahlala lami. Ngiyabonga, Nkosi Msindisi olamandla wonke, ogcwele umusa lesihawu. Akungisize, ukuba ngigcine izithembiso zami, ngingephuli imilayo kaNkulunkulu. Nginqobe izilingo, ngibekezele ekuhluphekeni, ngimale uSathane lemisebenzi yakhe, kanye lobukhosi bakhe. Ngibe ngowakho wedwa wena Msindisi wami, owangifela esiphambanweni. Akungenze ngifinyelele ekhaya lakho lasezulwini; ngihlale lawe labangcwele bakho, kuze kube laphakade. Amen.
   
  Moya kaKristu
 

Moya kaKristu, ungilungise.

Mzimba kaKristu, ungisindise.

Gazi likaKristu ungijabulise.

Manzi aphuma ohlangothini lukaKristu, ungigezise.

Nhlupheko kaKristu, ungiqinise.

Jesu omnandi akungizwe.

Ungibeke emanxebeni akho.

Ungavumi ukuba ngehlukane lawe.

Esitheni sami esibi ungivikele.

Ngesikhathi sokufa kwami ungibize.

Khuluma uthi ngize kuwe.

Ukuba ngihlangane labangcwele bonke.

Ngikudumise kuze kube laphakade. Amen.

   
  ISAKRAMENTE LEMPENDUKO
   
  Ingcazelo: Into yokuqala eqakathekileyo ekwamukeleni iSakramente leMpenduko ngemfanelo, yikuphenduka ngenhliziyo yonke ezonweni, lokudabuka ngaphakathi ngazo; (Jow 2,12-13). Ozisola ngobuqotho uyazimisela ukuthi kasafuni ukuphinda ukona. Into yesibili eqakathekileyo, yikuvuma izono zakho ngokuzithoba langeqiniso, hatshi kuNkulunkulu kuphela, laseBandleni lakhe, loba kubantu abathile abaphiwa nguye amandla lomsebenzi wokuvumisa: UJohane uMbhabhathizi wayevumisa; (Mat 3,6). Abaphostoli baphiwa nguJesu amandla okuthethelela izono, okutsho ukuthi abantu babevuma kibo ukuze bathethelelwe; (Joha 20,22-23; Jak 5,16). Lamhlanje amakholwa avuma izono zawo kubapristi. Into yesithathu eqakathekileyo, yikwenza inhlawulo yezono ozivumileyo; (Nani 5,6.8). IBandla lokuqala, iBandla eliKhatholika, lalivele lihlawulisa abonileyo ngesijeziso esithile kusukela ekuqaleni kwalo; (Seb 5,1-11).
   
  Imvumo yabadala
   
  Umkhuleko wokuvula:
 

Nkulunkulu wami, Baba olomusa wonke, wasinika iSakramente leMpenduko ukuba sithethelelwe ngalo izono zethu.

Nkosi yami, sengifuna ukuphenduka, lokulahla zonke izono zami, ngibuyele kuwe. Ngisize ngamandla akho, ukuba ngikhumbule kuhle zonke izono zami, ngizikhalele ngenhliziyo, ngizivume kuhle kumpristi.

Woza Moya oNgcwele; Khanyisela ingqondo yami, ukuba ngikhumbule kuhle zonke izono engilazo.

Mama Mariya, Nina kaJesu, ngicela ungikhulekele ukuba ngivume kuhle izono zami.

Sithunywa esingilondolozayo, lawe mngcwele wami, lingikhulekele.

Baba wethu... Ekuhle Mariya...

   
  Ukuhlolisisa inhliziyo:
  1. Mina ngiyiNkosi, uNkulunkulu wakho, ungabi labanye oNkulunkulu ngaphandle kwami!
   
 

Ngayekela ukukhuleka insuku zonke ngenxa yobuvila na?

Angihloniphanga ngesikhathi sokukhuleka yini?

Angizamanga ngendlela zonke ukuqinisa ukholo lwami lokulukhulisa, kumbe ngaluyekela luphunguka na? Ngasoma ngokholo loba ngakhuluma okuphambene lokholo na?

Angikhuzanga abeyisa ukholo na?

Ngakholwa ngavumelana lamadlozi, ngaya ezinyangeni ezitshaya amathambo, ngasebenza labathakathi loba ngabasiza na?

Ngakholwa imihlolo lamaphupho na?

Ngathethela amadlozi ngaphathisa emigidweni yamadlozi leyemimoya etshiyeneyo na?

Ngaqhuba imikhuba yamaqaba na?

Ngaphuma kuBandla eliKhatholika likaJesu ngaya kwamanye amabandla na?

Ngafunda incwadi eziyingozi okholweni lwami na?

Angithembanga kuNkulunkulu ngesikhathi sobunzima na?

Angiziphanga ithuba elikhulu ukukhuleka ecaweni na?

Ngaba lenhloni ngokholo lwami na?

Ngemukela ngilesono esikhulu ngingakasivumi na?

Ngasebenzisa imithi eyenziwa ngezitho zemizimba yabantu na?

Ngasebenzisisa imithi yemilingo lamandla kaSathane na?

   
  2. Ungaliphathi ngeze ibizo leNkosi uNkulunkulu wakho!
   
 

Angiliphathanga ngemfanelo ibizo likaNkulunkulu lamanye amabizo angcwele na?

Angihloniphanga uNkulunkulu labangcwele na?

Ngafunga amanga ngebizo likaNkulunkulu na?

Angisebenzisanga amathuba okufundisa abanye ngoNkulunkulu na?

Angihloniphanga abantu abasebenzela uNkulunkulu lezindawo ezingcwele lempahla ezingcwele na? Angigcinanga izifungo zami ezombhabhathizo lomtshado na?

Ngaletha ukungezwani eBandleni na?

   
  3. Londoloza usuku lweSonto ulugcine lube ngcwele!
   
 

Ngaphutha eMiseni ngeSonto loba ngamanye amalanga amakhulu na?

Ngaphuza enkonzweni ngafica iVangeli selibaliwe na?

Ngakhuluma, ngahleka loba ngahlekisa abanye esontweni na?

Ngaziqakisa ngezigqoko langokuhamba eSontweni na?

Ngasebenza nzima ngelanga leSonto na?

Ngasebenzisa ilanga elingcwele likaNkulunkulu ngokutshona nginatha okudakayo na?

Angenzanga imisebenzi emihle ngeSonto njengokusontisa abanye lokuhambela abagulayo labalupheleyo labasentolongweni na?

Angikhuthazanga izihlobo labomakhelwane lezinini lomkami ukuya eSontweni na?

Angikhulekanga lemuli yami na?

   
  4. Hlonipha uyihlo lonyoko khona uzakuhlalakuhle, uhlale isikhathi eside njalo emhlabeni!
   
 

Ngazonda abazali labadala kimi na? Ngenyanya abazali ngabeyisa na?

Anginanzanga abazali bami na?

Angisizanga abazali bami labakwethuzala lezinini ezinsweleni zabo na?

Ngahitshana labazali bami ngabafisela okubi loba ngafunga ijoyi na?

Ngaxega ngabachothoza loba ngabanyeya abazali bami yini?

Ngadlalisa imali nginganakekeli abazali yini?

Ngazwisa abazali ubuhlungu na?

Anginikelelanga abazali bami abafileyo iMisa eNgcwele na?

 

Abazali bayazihlolisisa mayelana labantwana

 

Angivikelanga abantwana engozini zomzimba lezomphefumulo na?

Angifundisanga abantwana ukholo lokukhuleka na?

Angisontisanga abantwabami na?

Angithumelanga abantwabami ukufundela iKhathekisima mayelana loMbhabhathizo, lokwemukela iSakramente loMqiniso na?

Angigcinelanga abantwabami imali yesikolo, lokudla lezembatho na?

Ngakhuthaza abantwana ukona na?

Angikhuthazanga abantwana ababhabhathiziweyo ukutshada na?

Ngalela abantwana ukuba yizidelamhlaba (ubupristi, ububrada lobusista) na?

Ngapha abantwabami isibonelo esibi na?
   
  5. Ungabulali!
   
 

Ngaba lolaka, ngalwa ngalimaza omunye na?

Ngathuka loba ngasebenzisa inhlamba na?

Ngafundisa abanye ukona na?

Angikhuzanga abanye besona na?

Ngafisela abanye okubi na?

Ngakhupha isisu loba ngasiza omunye ukukhupha isisu na?

Ngakhuthaza abanye ukukhupha isisu na?

Nganatha amaphilisi ngasebenzisa ezinye indlela zokuvimbela inzalo na?

Ngafuna ukuzibulala na?

Ngabalolunya na?

Ngathelela abanye imikhuhlane ngabomo na?

Ngathelela abanye iAIDS ngisazi ukuthi ngilayo na?

Ngalimaza kumbe ngabulala izifuyo zabanikazi na?

Angizwelanga izigoga labahluphekayo isihawu na?

Ngaphindisela na?

Ngabandlulula abanye ngemihlobo yabo na?

Ngahlanganyela labanye emithini yobuthakathi lekuyisebenziseni na?

Ngakhuthaza ukubulawa komuntu na?

Angiphathanga abantu ngokulinganayo kumbe ngaba ndlulula ngaphatha ngcono abanye kulabanye na? Nganatha okudakisayo ngadakwa na?

Nganatha okulimaza impilo okunjengethothotho na?

Ngabhema imbanje lokunye okudakayo na?

 
  6. Ungafebi!
   
  9. Ungahawukeli umfazi kamakhelwane wakho!
   
 

Nganakana imicabango yobufebe yini?

Ngavumela amehlo ami ukudinga lokubona izinto ezivusa imicabango engcolileyo na?

Ngakhangela imifanekiso enqunu na?

Ngafunda izincwadi ezivusa inkanuko ezimbi na?

Ngakhuluma izinto ezikhuthaza ubufebe na?

Ngachitha imali yemuli ezindleleni zobufebe na?

Ngahlabela izingoma eziphikisana lobumhlophe benhliziyo na?

Ngabamba kubi umzimba womunye ngingawuhloniphi na?

Ngazibamba kubi mina ngokwami ngizithokozisa ngendlela eyisono na?

Ngabhala izincwadi eziphikisana lobungcwele na?

Ngagqoka ngendlela engakhubekisa abanye na?

Ngenza amashabhini lamagigi kumbe ngiyangena kiwo na?

Angithembekanga kumkami na?

Ngathatha isithembo na?

Ngangena umfelwakazi ngile yami inkosikazi kumbe ngavuma ukungenwa na?

Ngendela esithenjini ngilikholwa na?

Ngaya emigidweni yebusuku eyingozi emphefumulweni wami na?

Ngakhuthaza abanye ukuthi benze isono na?

Ngakhuthaza abantwana ukuzuza imali ngobufebe na?

Ngemukela imali ezuzakale kubi ngayisebenzisa na?

Ngahlala lomuntu engingatshadanga laye esontweni mina ngilikholwa na?

   
  7. Ungebi!
   
  10. Ungahawukeli impahla kamakhelwanewakho!
   
 

Ngatshontsha na?

Ngatshontsha ulutho olunjani na?

Ngona impahla loba insimu loba isifuyo somunye ngingakhathali na?

Ngaphatha butshapha impahla yami leyabanye uNkulunkulu angipha yona ukuba ngisize abanye

ngayo na?

Ngachitha impahla lemali butshapha na?

Ngaphatha kubi impahla kaHulumende, engeyabantu bonke na?

Angibuyiselanga izikwelede lengakutshontshayo na?

Ngaba lomhawu ngempahla yomunye na?

Angiphathanga kuhle izisebenzi na?

Angenzanga umsebenzi wami ngokuthembeka na?

Angiholisanga izisebenzi zami iholo elizifaneleyo, langesikhathi esifaneleyo na?

Ngathokozela ukuhlupheka komunye na?

Ngabaliqili ekuthengiseni lasekuthengeni na?

Ngemukela impahla etshontshiweyo loba amatshe aligugu azuzakala ngobuqili na?

Ngachitha imali emakhasini na?

Ngabiza amalobolo aphezulu kakhulu awomntanami na?

Ngenza iphutha, ngayekela abantu behlupheka kumbe besifa ngingabasizi lanxa ngangilamandla okubasiza na?

   
  8. Ungaqambeli amanga umakhelwane wakho!
   
 

Ngaqamba amanga yini?

Ngafihlela umkami izinto eziqakathekileyo na?

Ngabumbela omunye amanga na?

Ngaxoxa ngeziphosiso zabanye na?

Ngenza ukuthi abantu bazondane na?

Ngabulalisa umuntu ngamanga ami na?

Ngaxotshisa umuntu emsebenzini ngamanga na?

Ngehlukanisa umuntu lomkakhe ngamanga ami na?

Ngazuza umsebenzi ngobumenemene na?

Ngaqamba amanga ecaleni na?

Ngakholwa okukhulunywe zinyanga labaprofethi bamanga mayelana ngabanye abantu na?

Ngona ibizo lomunye na?

Ngapha umuntu isivalamlomo loba imali yesifumbathiso na?

Ngakholwa abaprofithi bamanga loba izinkanyezi (Horoscopes) na?

Ngahlanganyela kumacebo amabi labanye na?

Ngasebenzelana lamatsotsi lezigebenga na?

Ngilolimi na?

Ngilomlomo na?

Ngilonyawo na?

   
  Imithetho yeBandla eliKhatholika:
   
 

Ngaqeda umnyaka wonke ngingenzanga imvumo na?

Angemukelanga iSidlo seNkosi ngesikhathi sePhasika na?

Angikhuliselanga abantwabami okholweni na?

Nganikela ngomnikelo omncane ongasizi iBandla likaKristu na?

Angikhuphanga iSondlo seBandla ngemfanelo na?

Kangingenanga iMisa loba inkonzo ngelanga lesonto na?

Angizilanga inyama ngolweSithathu loMlotha langolweSihlanu oluNgcwele na?

   
 

Ukuvuma izono:

Khuleka umkhuleko wokuzisola.

Vuma izono kumpristi, ulandela indlela.
   
 

next page