ISAKRAMENTE LOMQINISO

   
  Ingcazelo: ESakramenteni loMqiniso samukela uMoya oNgcwele, ukuba asiqinise okholweni lwethu, asenze sibe ngofakazi bakaJesu Kristu, lamalunga akhutheleyo eBandla lakhe. Nxa sesiqinisiwe sesiphiwe umsebenzi omkhulu wokuba ngofakazi abangesabi lutho bakaKristu, abazimisele lokumfela. Ngakhoke, uMqiniso wemukeliswa asebekhulile, asebeqedisisa umsebenzi wobuKristu lezibopho zawo. Ababhishopi bakulelilizwe yibo abamisa ukuthi abantu bamele baqiniswe sebeleminyaka elitshumi lambili, kumbe ephezu kwaleyo.
   
  Umkhuleko owensuku ezificamunwemibili (inovena) wokulungisela ukwemukela iSakramente loMqiniso.
   
 

Nkulunkulu Baba, wena owathanda ukuqinisa ukholo lwethu ngesipho sikaMoya oNgcwele, siyakuncenga ukuba usithumele lowo Moya oNgcwele, asiphe izipho zakhe eziyisikhombisa. Akukhanyisele ingqondo zethu usiphe ukuhlakanipha ukuze sazi intando yakho, siyilandele. Akusiphe ukuqedisisa, ukuze sikwazi wena, siqedisise lendlela zakho.

Akusiphe isipho sokweluleka ukuze sibonisise okulungileyo, selulekane ezindleleni ezinhle. Akusiphe isibindi, ukuze sibe lamandla okugcwalisa intando yakho singelakwesaba inkulumo zabantu. Siphefumulele Nkosi ulwazi oluvela kuwe ukuze sazi ngokujulileyo amaqiniso angcwele owasazisa wona. Akwenze inhliziyo zethu zilunge, zibambelele okholweni, sithokozele ukusebenzela wena. Usiphe njalo ukwesaba wena Nkosi ukuze singakudanisi, njalo singaduhi ezindleleni zakho.

Akusigcwalise ngezipho zakho ukuze sikudumise, sazise omakhelwane, siphumelele ukufika kuwe ezulwini. Woza Moya oNgcwele ugcwalise inhliziyo zethu.

 
  Baba wethu... Ekuhle Mariya... Udumo alube...
   
 

Umkhuleko wabalungisela uMqiniso

Moya oNgcwele, Mninimandla wonke, Wena Mzimeli wesithathu kaNkulunkulu, Mduduzi wabalusizi, woza uhlale enhliziyweni yami ebuthakathaka. Njengoba wehlela kubaPhostoli labafundi bakaKristu ngelanga lePhentekoste, wabagcwalisa ngezipho zakho, ngokunjalo akugcwalise inhliziyo yami ngomlilo wothando lwakho olungcwele, ungiphe inhliziyo etshisekela ukukhonza uNkulunkulu kokuphela okwempilo yami yonke. Ngiyakuncenga, Moya oNgcwele, ukuba wehlele kimi, Wena onguMduduzi wemiphefumulo ezinsizini, loMlondolozi ezingozini, loMsizi ekuhluphekeni, laMandla ebuthakathakeni, loMfundisi wabazithobayo, loYise wezintandane, leThemba labayanga, loMsizi wabafayo. Akungihawukele, Moya oNgcwele, uze kimi, uhlale kimi, wenze inhliziyo yami ibe lithempeli lakho elingcwele, ngenxa yomusa wakho omkhulu. Amen.

   
  Uhlelo lwenkonzo yoMqiniso
 

  • Ukulahla uSathane lokuvuma ukholo. Khangelani imibuzo lezimpendulo mayelana loMbhabhathizo.

  • Ukubekwa kwezandla emakhanda. UMbhishopi welula izandla zakhe phezu kwabaqiniswayo, anxuse uMoya oNgcwele ukuba ehlele kibo.

 

Bp. Nkulunkulu Somandla, Yise weNkosi yethu uJesu Kristu, ngamanzi langoMoya oNgcwele, wasindisa abantwabakho laba esonweni, wabanika impilo entsha. Thumela uMoya wakho oNgcwele ehlele kibo abe nguMsizi loMkhokheli wabo. Banike uMoya wokuhlakanipha lokuqedisisa, uMoya wokweluleka lesibindi, uMoya wokwazi lokulunga; ubagcwalise ngoMoya wokwesaba wena Nkosi. Sicela ngoKristu iNkosi yethu.

K. Amen.

   
 

Ukugcotshwa ngeKrizima

UMbhishopi ugcoba oqiniswayo ngamagcobo ekrizima esenza isibonakaliso sesiphambano ebunzini.

   
 

Bp. ..., yamukela uphawu + lweSipho esingu-Moya oNgcwele.

K. Amen. Bp. Ukuthula kakube lawe!

K. Kakube lawe njalo.

   
 

Umkhuleko walowo oseqinisiwe

Moya oNgcwele, ngiyakubonga ngenhliziyo yami yonke, ngamandla ongiphe wona ngoMqiniso ongcwele. Ngiyakuncenga ukuba ungangitshiyi ngesikhathi esizayo, kodwa uhlale kimi kokuphela. Nguwe owaqinisa abafelukholo wabanika amandla okubekezela ebuhlungwini lasekufeni, bavuma uKristu bengesabi lutho. Akungikhanyisele, ungiqinise lami, ukuba ngingehlukaniswa yilutho loNkulunkulu lemithetho yakhe, ngingaxegiswa yilutho kuze kube sekufeni. Moya wokuvikela, akungivikele esonweni lasengozini zonke zomphefumulo ngamandla akho angehlulwa lutho, ukuze ngihlale ngilikholwa elilungileyo kokuphela ngize ngisuke kulumhlaba, khona ngizahlanganiswa lezithunywa labangcwele ezulwini, ngithokoze labo kuze kube nini lanini. Amen.

   
  ISAKRAMENTE LESIDLO ESINGCWELE
   
  Ingcazelo: ISakramente leAlithare lizinqobo ezinhlanu:
 

  1. LinguMhlabiso waseKhalivari, ovuselelwa kokuphela ngeNkonzo yeMisa eNgcwele, ukugcwalisa okwatshiwo nguJesu kubafundi bakhe esithi: “Yenzani lokhu lingikhumbule ngakho”(1 Kor 11,24-26; Luka 22,19-20).

  2. LiyiSidlo esiNgcwele, esinguMzimba leGazi likaJesu Kristu; (Joha 6,51-58).

  3. LiliDili eliNgcwele, eliyisibonakaliso sothando lokumanyana eBandleni likaJesu Kristu. Kulelidili amalunga eBandla amanyana loKristu ngokupheleleyo ngokumamukela, njalo ayamanyana wona ngokwawo ngokuhlanganyela eDilini linye, langokwamukela uKristu munye, langokuba nguMzimba wakhe munye; (Seb 2,42-47; 4,32; Roma 12,4-5.)

  4. Liyisikhumbuzo sokudla kokucina kukaJesu Kristu labafundi bakhe. Abavunyelwa ukwamukela iSidlo esiNgcwele yilaba:

    a) AmaKhatholika abhabhathiziweyo, abalemvumo yokwamukela.

    b) Abangelasono esikhulu. Olesono esikhulu umele azisole, enze imvumo kuqala, anduba amukele. Abalamaphutha amancinyane bamele bazisole ngawo, bawalahle bazimisele ukungaphindi ukuwenza, kube ng’khona bezakuya kwamukela.

    c) Abazilileyo ukudla, loba yikuphi, okuhlafunwayo lokumunyuzwayo, lokunathwayo, okweAwa elilodwa. Abanathe utshwala bamele bazile okwamahola amathathu.

    d) Ukuba lesifiso esiqotho sokwamukela.

       5.   Lingumphako wohambo lwethu lokuya edilini likaMesiya ekhaya lasezulwini.
   
  INKONZO YEMISA ENGCWELE
   
 

ISIGABA SOKULUNGISELELA

Ingoma yokungena

Ukubingelela

   
 

P. Ngebizo likaYise, + leleNdodana, lelikaMoya oNgcwele.

B. Amen.

P. Bazalwane bami, umusa weNkosi yethu uJesu Kristu, lothando lukaNkulunkulu uBaba, lokuhlanganyela kukaMoya oNgcwele, kakube lani lonke.

B. Kakube lawe njalo.

   
 

Ukuvuma izono

 

P. Bazalwane, kasikhumbuleni izono zethu ukuze siqhube ngemfanelo imfihlakalo ezingcwele.

B. Ngiyavuma kuNkulunkulu,uMninimandla wonke, lakini bazalwane, ukuthi ngonile kakhulu ngokucabanga langokukhuluma, langokwenza langephutha ngecala lami, ngecala lami, ngecala lami elinzima kakhulu sibili. Ngakhoke ngiyancenga uMariya obusisiweyo, oliVirigo kokuphela, lezithunywa zonke zasezulwini, labangcwele bonke, lani bazalwane, ukuba lingikhulekele eNkosini uNkulunkulu wethu. Amen.

   
 

Intethelelo

  P. UNkulunkulu uMninimandla wonke, akasihawukele, asithethelele izono zethu, asiphe ukuphila okulaphakade. Amen.
   
 

Ukucela umusa

 
 

P. Nkosi, sihawukele;

P. Kristu, sihawukele;

P. Nkosi, sihawukele;

B. Nkosi, sihawukele.

B. Kristu, sihawukele.  

B. Nkosi, sihawukele.
   
 

Ukudumisa uNkulunkulu

 

Udumo kalube kuNkulunkulu kweliphezulu.

Kube lokuthula emhlabeni ebantwini bakhe,

Nkosi Nkulunkulu, Nkosi yasezulwini,

Nkulunkulu Baba Somandla,

siyakubabaza, siyakwazisa, siyakuguqela, siyakudumisa,

siyakubonga ngenxa yobukhosi bakho obukhulu.

Nkosi, Jesu Kristu, Ndodana ezelwe yodwa, Nkosi Nkulunkulu,

Mvana kaNkulunkulu, Ndodana kaNkulunkulu uYise.

Wena osusa izono zomhlaba, sihawukele.

Wena ohlezi kwesokunene sikaYihlo, zwana ukukhala kwethu.

Ngoba nguwe wedwa oNgcwele. Nguwe wedwa oyiNkosi.

Nguwe wedwa onguPhezukonke,

wena Jesu Kristu;

undawonye loMoya oNgcwele,

ebukhosini bukaNkulunkulu uBaba. Amen.

   
 

Umkhuleko wokuvula

 

P. Kasikhulekeni: Nkulunkulu wothando, ake uzwe imikhuleko yethu. Sisize sazi lokho othanda ukuba sikwenze, ukuze sikwenze ngesibindi lobuqotho. Sicela ngeNkosi yethu uJesu Kristu iNdodana yakho, enguNkulunkulu, ephila ibusa kanye lawe, ndawonye loMoya oNgcwele, kuze kube laphakade.

B. Amen.

   
  ISIGABA SELIZWI LIKANKULUNKULU
 

Ingoma

Isifundo sokuqala

   
  F. Isifundo sokuqala sithethwe encwadini kalsaya (55,10-11.)
   
  Njengalokhu izulu longqoqwane kusehla kuvela phezulu, kungabuyeli khona kodwa kuthambisa umhlaba, kuwenze ukuba uthele okuhlumayo, unike umhlanyeli inhlanyelo, lodlayo ukudla, lizakuba njaloke lelizwi eliphuma emlonyeni wami, kaliyikubuya kimi lize, kodwa lizakwenza lokho engikufunayo, liphumelelise lokho engilithumele khona.
 

F. Yiwola amazwi eNkosi.

B. Kabongwe uNkulunkulu.

   
 

Umkhuleko weHubo...

Isifundo sesibili

   
  F. Isifundo sesibili sithethwe kwabaseKorinte (1 Kor 12,3-5.)
   
  Bazalwane, ngiyalazisa ukuthi kakho umuntu okhuluma ngoMoya kaNkulunkulu ongathi: Kathukwe uJesu. Futhi kakho umuntu ongathi uJesu uyiNkosi, kuphela ngaye uMoya oNgcwele. Kukhona iziphiwo ezehlukeneyo, kodwa uMoya munye. Kukhona izinkonzo ezehlukeneyo, kodwa iNkosi yinye.
 

F. Yiwola amazwi eNkosi.

B. Kabongwe uNkulunkulu.

   
 

Ingoma yeAleluya

IVangeli

   
 

P. INkosi kayibe lani.

B. Kayibe lawe njalo.

P. Zwanini iVangeli elingcwele likaJesu Kristu njengoba libhalwe nguMarko (1,14-15)

B. Udumo kalube kuwe Nkosi Jesu Kristu.

  Emva kokubotshwa kukaJohane, uJesu wafika eGalili etshumayela ivangeli likaNkulunkulu, wathi: Isikhathi sesiphelele, umbuso kaNkulunkulu ususondele, phendukani, likholwe ivangeli.
 

P. Yiwola amazwi eVangeli elingcwele.

B. Kadunyiswe uJesu Kristu.

   
 

Intshumayelo

UMvumukholo wabaphostoli

   
 

Ngiyakholwa kuNkulunkulu,

uYise uMninimandla wonke,

uMdali wezulu lomhlaba,

lakuJesu Kristu, iNdodana yakhe eyodwa, iNkosi yethu;

owemulwa ngamandla kaMoya oNgcwele,

wazalwa liVirigo uMariya; wahlutshwa ekubuseni kukaPhonsiyo Philathu;

wabethelwa esiphambanweni, wafa, wangcwatshwa, wehla waya kwabafileyo.

Ngelanga lesithathu wabuya wavuka ekufeni, wenyuka waya ezulwini.

Uhlezi esandleni sokunene sikaYise,

lapho azavela khona ezothetha amacala abaphilayo labafileyo.

Ngiyakholwa kuMoya oNgcwele,

iBandla elingcwele eliKhatholika,

ukumanyana kwabangcwele,

ukuthethelelwa kwezono,

ukuvuka komzimba ekufeni,

lokuphila okulaphakade. Amen.

   
 

UMvumukholo woMhlangano waseNiseya (325A.D.)

 

Ngiyakholwa kuNkulunkulu munye,

uYise olamandla wonke, uMenzi wezulu lomhlaba,

lakho konke okubonakalayo lokungabonakaliyo.

Ngiyakholwa laseNkosini nye, uJesu Kristu, iNdodana eyodwa kaNkulunkulu;

eyazalwa nguYise ngaphambi kwezikhathi zonke.

EnguNkulunkulu uqobo ophuma kuNkulunkulu uqobo.

Eyazalwa ingenziwanga; eluqobo lunye loYise; okwenziwa ngayo konke.

Eyathi ngenxa yethu thina abantu, langenxa yokusisindisa, yehla ivela ezulwini.

Ngamandla kaMoya oNgcwele, yaba ngumuntu, yazalwa liVirigo uMariya.

(Khothamisa ikhanda)

Yahlupheka ekubuseni kukaPhonsiyo Philathu,

yabethelwa ngenxa yethu, yafa yangcwatshwa,

Yavuka ngosuku lwesithathu njengokulotshiweyo emibhalweni.

Yenyuka yaya ezulwini, lapho ehlezi khona kwesokunene sikaYise.

Izabuya ibuye ngobukhosi, izothetha amacala abaphilayo labafileyo;

umbuso wayo kawusoze waphela.

Ngiyakholwa kuMoya oNgcwele, oyiNkosi, uMphilisi,

ophuma kuYise beleNdodana,

okhonzwa adunyiswe ndawonye loYise leNdodana,

owakhuluma ngabaprofethi.

Ngiyakholwa eBandleni linye elingcwele, eliKhatholika, elabaPhostoli.

Ngiyavuma uMbhabhathizo munye wokuthethelela izono;

ngilindele ukuvuka kwabafileyo,

lokuphila kwaselizweni elizayo. Amen.
   
 

Izikhalazo

   
 

P. Asikhulekeni kuJesu Kristu owanikela impilo yakhe ukuze sisindiswe.

K. Sikhulekela bonke abamemezela ilizwi lakhe - Nkosi, silalele.

B. Nkosi, silalele ngomusa.

K. Sikhulekela bonke abafa belethemba kuNkulunkulu uBaba - Nkosi, silalele.

B. Nkosi, silalele ngomusa.

K. Lethani izikhalazo zenu eNkosini.

Nkosi Jesu Kristu wena ongumngane wethu sonke. Siyakudumisa ukanye loNkulunkulu uBaba ndawonye loMoya oNgcwele kuze kube laphakade. Amen.

   
 

ISIGABA SOMHLABISO

Ingoma yomnikelo

Ukulungisela ukwethula izipho

   
 

P. Siyakudumisa, Nkosi Nkulunkulu, Menzi wezinto zonke, ngoba ngomusa wakho sinikela lesisinkwa esavezwa ngumhlabathi, senziwa yizandla zabantu, sizakuba yisinkwa esisipha ukuphila.

B. Kadunyiswe uNkulunkulu kuze kube lanini.

P. Ngesibonakaliso sokuhlanganiswa kwamanzi lewayini, senze sibe lempilo kaKristu, owathi ngokuzithoba kwakhe waba ngumuntu njengathi.

P. Siyakudumisa, Nkosi, Nkulunkulu, Menzi wezinto zonke, ngoba ngomusa wakho sinikela liwayini eyisithelo sevini lomsebenzi wezandla zabantu izaphenduka ibe yikudla kwemiphefumulo yethu.

B. Kadunyiswe uNkulunkulu kuze kube lanini.

P. Nkosi, Nkulunkulu, siyakuncenga ukuba wamukele umhlabiso wethu lo. Siyazinikela kuwe ngenhliziyo ezithobekileyo. Ungigezise, Nkosi ebubini bami, ungihlambulule ezonweni zami.

P. Bazalwane, khulekani ukuba umhlabiso wethu wemukelwe nguNkulunkulu uBaba uMninimandla wonke.

B. INkosi kayemukele umhlabiso lo ezandleni zakho, ukuze ibizo layo libongwe, lidunyiswe; lokuba sithole usizo, thina, lalo lonke iBandla layo elingcwele.

   
 

Umkhuleko wokunikela izipho

   
 

P. Nkosi Nkulunkulu Baba, yamukela umnikelo wethu lo, wandise ubungcwele bethu, usiphe konke esikucela ngethemba. Sicela ngoKristu iNkosi yethu. Amen.

   
 

next page