AMASAKRAMENTE AYISIKHOMBISA

   
 

Ingcazelo: UJesu watshiyela iBandla amaSakramente. Nguye osebenza empilweni yethu, esilethela impilo kaNkulunkulu ngawo. Ayisikhombisa. UMbhabhathizo loMqiniso leSidlo esiNgcwele ngamaSakramente esithwasiswa ngawo eBandleni likaNkulunkulu. ISakramente lokuBuyisana leloMgcobo wabagulayo, yiwo asisilisayo emoyeni lasemzimbeni. UMtshado lobuPristi, ngamaSakramente akha iBandla.

UKristu uza kithi ngelizwi lakhe langamaSakramente. Lokhu kuyisipho sakhe esikhulu esiphakathi kwabantu bakaNkulunkulu.

   
  ISAKRAMENTE LOMBHABHATHIZO
   
  Ingcazelo: Umbhabhathizo yikuzalwa kutsha ngokufa langokuvuka kanye loJesu; (Roma 6,3-11). Uligugu empilweni yethu ngoba usenza sibe ngabantwana bakaNkulunkulu; (Roma 8,15), wesula zonke izono esazenzayo; (Seb 2,38), usenza sibe yizindlalifa zasezulwini; (Roma 8,17).
   
  UMbhabhathizo wabantwana
  Ukubuza abazali.
 

P. Amabizo abantwana benu ngobani?

Mzali: Ngu... lo..., ngu..., lo..., ngu...lo...,

P. Kuyini elibacelela khona eBandleni likaNkulunkulu na?

Mzali: Sicela ukuba babhabhathizwe.

P. Bazali, ngokucela ukuba abantwana benu babhabhathizwe, livuma umlandu wokubafundisa ukugcina imisebenzi yokholo. Sekungumsebenzi wenu ukubondla bakhule begcina imilayo kaKristu yokuthanda uNkulunkulu labomakhelwane babo. Liyawuzwisisa yini lumsebenzi elizethesa wona na?

Mzali. Yebo, siyawuzwisisa.

P. Linake bameli, lizimisele yini ukuncedisa abazali laba emsebenzini abafanele ukuwenza njengabazali abangamaKristu na?

Mmeli: Yebo, sizimisele.

   
 

  • Umpristi abesesamukela abantwana eBandleni.

  • Umpristi, labazali labameli badweba uphawu lwesiphambano emabunzini abantwana.

  • Besekulandela izifundo zeBhayibhili.

  • Ingcazelo lezikhalazo. Umkhuleko wokuxotsha uSathane lemimoya emibi.

  • Ukugcotshwa kwabantwana phambi kombhabhathizo.

  • ILithani labaNgcwele bonke.

  • Ukubusiswa kwamanzi ombhabhathizo.

  • Abazali labameli, endaweni yabantwana, benza izifungo zombhabhathizo

  Ukubhabhathiza
 

P. Liyathanda yini ukuba u... abhabhathizelwe okholweni lweBandla esesiluvume kanye lani na?

B. Yebo, siyathanda.

P. ..., ngiyakubhabhathiza ngebizo likaYise, + leleNdodana lelikaMoya oNgcwele.

   
 

  • Ukugcotshwa kwabantwana ngamafutha eKrizima.

  • Ukugqokiswa kwabantwana isembatho esimhlophe.

  • Abazali labameli bayaphathiswa isibane esivuthayo.

  • Umpristi uthinta indlebe lemilomo yabantwana.

  • Umkhuleko uBaba wethu lesibusiso.

  Umbhabhathizo wasebekhulile
   
  Umuntu osekwazi akwenzayo ufanele afundiswe iminyaka emibili anduba abhabhathizwe. Isikhathi sokufundela umbhabhathizo siyindlela yokuthwasiswa komuntu eBandleni, njalo siyigxenye yenkonzo yombhabhathizo. Zintathu izigaba:
 

  • umkhuba wokuthwasiswa esiga- beni sabafundela ukubhabhathizwa (cathecumenate)

  • umkhuba wokukhethwa (election) lokubhaliswa kwamabizo (enrolment)

  • ukuthwasiswa ngokugcweleyo emBhabhathizweni.
 

Isikhathi esivame ukubhabhathiza ngaso abadala ngesePhasika. Uhlelo lwalinkonzo lulandela umkhuba wokuthwasiswa kwabadala okholweni lwesikristu (Rite of Christian Initiation of Adults).

Nanzelela: ISakramente lombhabhathizo lenza umtshado wabathetheneyo ngokwesintu wamukeleke eBandleni loba omunye wabo ebhabhathiziwe.

   
  A. Umkhuba wokuthwasiswa esigabeni sabafu-ndela ukubhabhathizwa (Cathecumenate)
  Abafundelayo bema phandle kwecawe labammeli babo. Umpristi uyabahlangabeza ababingelele.
   
 

P. Licelani eBandleni likaNkulunkulu na?

K. Sicela ukholo.

P. Ukholo luliphani na?

K. Ukuphila okungapheliyo.

P. Ukuphila okungapheliyo yilokhu, ukwazi uNkulunkulu weqiniso lalowo amthumayo uJesu Kristu. UNkulunkulu wamvusa ekufeni ukuba abeyi-Nkosi yokuphila leyezinto zonke ezibonakalayo lezingabonakaliyo. Ngokucela ukubhabhathizwa, licela yonale impilo kaNkulunkulu. Lokhu kutshengisa ukuthi selimazi uKristu njalo lifuna ukumlandela. Kuhle ukuthi selizahlala limazisisa uKristu liqedisisa iLizwi lakhe, ligcina lemilayo.

P. Lizahlanganyela lathi empilweni yobuKristu lekukhulekeni na?

K. Yebo, sizahlanganyela.

P. Lina bameli balaba abafuna ukubhabhathizwa, libabona befanele ukungena eBandleni ngombhabhathizo na?

K. Yebo, sibabona befanele.

P. Lizaqhubeka libasiza ngamazwi langesibonelo ukukhonza uKristu na?

K. Yebo, sizabasiza.

P. Kasikhulekeni: Baba olothando lesihawu sibongela abazalwane bethu laba owababizela kuwe, wabambana labo empilweni yabo. Lamhlanje, bayavuma ukubabizela kwakho okholweni. Benze bafumane ukuthokoza empilweni yabo entsha. Sicela ngoKristu iNkosi yethu.

K. Amen.

   
 

  • Abafundelayo bemukela uphawu lwesiphambano

  • Ukunikwa kwamabizo amatsha

  • Ukungeniswa amalunga amatsha ecaweni

  • Kulandela izifundo lentshumayelo

  • Ukunikezwa kwebhayibhili

  • Izikhalazo

  • Isibusiso

  B. Izinkonzo ezilandelayo ziqondanelokwamukela abafundelayo eBandleni
 

Kulesisigaba sokuthwasiswa kwenziwa:
 

  • Imikhuleko yokuxotsha imimoya emibi

  • ukubusiswa kwabafundelayo

  • ukugcotshwa kwabafundelayo

  • ukwabelana empilweni yokholo

  Umkhuleko wokuxotsha uSathane
  Omunye wemikhuleko wokuxotsha uSathane.
 

P. Nkulunkulu Somandla, wathuma iNdodana yakho eyodwa ukuba izesihlenga ebugqilini besono, lokusinika inkululeko yabantwana bakho. Sikhulekela abazalwane bethu laba abeza phambi kwakho bevuma izono zabo. Bakhangelane lokulingwa nguSathane. Ngokuhlupheka langokuvuka ekufeni kweNdodana yakho, bakhuphe emandleni obumnyama. Baqinise ngamandla kaKristu ubeluleke ekuphileni kwabo. Sicela lokhu ngoKristu iNkosi yethu.

K. Amen.

  Ukugcoba ngamafutha labo abafundela umbhabhathizo esifubeni loba lamanye amalunga omzimba.
 

P. Ngiyakugcoba ngamafutha osindiso ebizweni likaKristu uMsindisi wethu. Angathi angakuqinisa ngamandla akhe yena ophila ebusa kuze kube lanini.

K. Amen.

   
  Umkhuba wokukhethwa (election) lokubhaliswa kwamabizo (enrolment)
  Lesi yisigaba sokucina phambi kombhabhathizo. Siqhutshwa ngesikhathi sokuzila phambi kombhabhathizo. Kulelisigaba kwenziwa lokhu okulandelayo:
 

  • Ukubhalisa amabizo alabo abazabhatbhathizwa; (ISonto lokuqala ngesikhathi sokuzila).

  • Ukuhlanjululwa lokukhanyiselwa; (AmaSonto 3; 4; 5 ngesikhathi sokuzila).

  • Ukunikezwa koMvumukholo (ISonto lesithathu) loMkhuleko weNkosi; (ISonto lesihlanu ngesikhathi sokuzila).

  • Umkhuba wokuvulwa komlomo lendlebe (Ephphetha); (Phambi kwenkonzo yombhabhathizo).

  • Ukukhuleka uMvumukholo; (Phambi kwenkonzo yombhabhathizo).

  • Eminye imikhuba yokuthwasiswa njengokunikezwa koMvumukholo loMkhuleko weNkosi, ukukhuleka uMvumukholo lokuvulwa komlomo lendlebe (Ephphetha) kungenziwa ngesikhathi abathwasiswayo befundiswa ngakho.
  C. Ukuthwasiswa ngokugcweleyoemBhabhathizweni (INkonzo yoMbhabhathizo)
  - ILithani labaNgcwele bonke, kukhasi 61.
   
  Umkhuleko wokubusisa amanzi
 

P. Nkulunkulu Baba, usipha impilo entsha ngamaSakramente, asambulela izimangaliso zamandla akho angabonakaliyo. Embhabhathizweni sisebenzisa amanzi ayisibonakaliso sempilo entsha. Ekuqaliseni kwakho ukudala, uMoya wakho wawuphezu kwamanzi ukuze abe lamandla. Amanzi kazamcolo ngesikhathi sikaNowa ayefanekisa umbhabhathizo asusa izono alethe ukuqalisa kutsha kokulunga. Wakhokhela abakolsrayeli besuka ebugqilini badabula uLwandle oluBomvu, baba ngumfanekiso wabantu bakho abakhululwa esonweni ngombhabhathizo. Emanzini eJordani, iNdodana yakho yabhabhathizwa nguJohane, yagcotshwa nguMoya oNgcwele.

Amanzi leGazi kwaphuma ohlangothini ilenga esiphambanweni. Emva kokuvuka kwayo yathuma abafundi isithi: “Hambani lifundise izizwe zonke, lizibhabhathize ebizweni likaYise, + leleNdodana, lelikaMoya oNgcwele.” Baba, khangela ngomusa iBandla lakho ulivulele umthombo wombhabhathizo. NgoMoya oNgcwele yenza amanzi la abe lamandla eNdodana yakho, umhlambulule esonweni umuntu owamdala ngomfanekiso wakho (thinta amanzi ngesandla).

Nkulunkulu Baba, thumela uMoya oNgcwele ngeNdodana yakho ehlele emanzini la. Akuthi bonke abambelwa kanye loKristu ngokubhabhathizelwa ekufeni kwakhe, bavukele kanye laye empilweni entsha. Sicela ngoKristu iNkosi yethu. Amen.

   
  Ukulahla uSathane lokuvuma ukholo
 

P. Liyasilahla isono yini ukuze lihlale enkululekweni yabantwana bakaNkulunkulu na?

K. Yebo, siyasilahla.

P. Liyakulahla ukukhohliswa yibubi lokubuswa yisono na?

K. Yebo, siyakulahla.

P. Liyamlahla uSathane, uyise wesono lenkosi yobumnyama na?

K. Yebo, siyamlahla.

P. Liyakholwa kuNkulunkulu uYise uMninimandla wonke, uMdali wezulu lomhlaba na?

K. Yebo, siyakholwa.

P. Liyakholwa kuJesu Kristu, iNdodana yakhe eyodwa iNkosi yethu, owazalwa liVirigo uMariya, wabethelwa esiphambanweni, wafa wangcwatshwa wavuka ekufeni, ohlezi esandleni

sokunene sikaYise na?

K. Yebo, siyakholwa.

P. Liyakholwa kuMoya oNgcwele, iBandla eliNgcwele eliKhatholika, ukuvuka koMzimba ekufeni, lokuphila okungapheliyo na?

K. Yebo, siyakholwa.

   
  UMbhabhathizo. Umuntu uyacwiliswa kathathu kumbe athelwe amanzi kathathu ebunzini.
 

P. ...., ngiyakubhabhathiza ngebizo likaYise (thela), leleNdodana (thela), lelikaMoya oNgcwele (thela).

   
  Ukugcoba ngeKrizima
 

P. UNkulunkulu uBaba usekukhulule esonweni wakupha ukuzalwa kutsha ngamanzi langoMoya oNgcwele. Khathesi usekugcoba ngamafutha eKrizima. UKristu wagcotshwa waba ngumPristi, loMprofethi, leNkosi. Laweke, ukhuleke, utshumayele, usebenzele umbuso kaKristu empilweni yakho njengelunga lomzimba wakhe. (Bagcotshwa ebunzini).

   
  Isembatho esimhlophe
 

P. Mzalwane, wenziwe waba yisidalwa esitsha wambatha uKristu. Thatha lesisembatho esimhlophe uyefika laso simsulwa esihlalweni sokuthonisisa seNkosi yethu uJesu Kristu, ukuze ube lokuphila okulaphakade.

K. Amen.

   
 

Isibane esivuthayo

Ummeli ulumathisa isibane asiphe obhabhathiziweyo.

 

P. Usukhanyiselwe nguKristu. Phila njengomntwana wokukhanya ugcine ilangabi lokukholwa libhebha enhliziyweni yakho ukuze kuthi iNkosi isibuya uphume uyihlangabeze ndawonye labangcwele embusweni wasezulwini.

K. Amen

   
  Ukubhabhathizwa komuntu ophansi kokufa
   
 

Indlela le, ingasetshenziswa ngamakholwa onke nxa kungelampristi kodwa amele azise ngakho umpristi wakulesosigaba ngokuphangisa. Nxa kusenzakala, umuntu engakabhabhathizwa ufanele afundiswe ngamafitshane ukuqakatheka kombhabhathizo, azisole ngezono zakhe anduba abhabhathizwe.

   
  Ukuhlolwa kobhabhathizwayo
 

P. Mzalwane othandekayo, ucela ukuba ubhabhathizwe ukuze kuthi usungumKristu ube lokuphila okungapheliyo. Ukuphila okungapheliyo yilokhu: Ukwazi uNkulunkulu oqotho loJesu Kristu amthumayo. Lolu yilo ukholo lobuKristu. Uyakwazi lokhu na?

K. Yebo, ngiyakwazi.

P. Phezu kokukholwa kuJesu Kristu, umele ugcine imilayo yakhe njengokufanele kwenziwe ngamaKristu. Uyakwazi lokhu na?

K. Yebo, ngiyakwazi.

P. Uyafisa ukuphila impilo yamaKristu na?

K. Yebo, ngiyafisa.

P. Umele uthembise ukuthi uma uzasila uzazama ukwazi uKristu ngcono, ulandele imfundiso yamaKristu. Uyathembisa ukwenza lokho na?

K. Yebo, ngiyathembisa.

P. Ungakabhabhathizwa ufanele ulahle izono zakho, uphenduke, uzisole ngezono zakho zonke. Uyazisola ngezono zakho zonke na?

K. Yebo, ngiyazisola.

   
 

Kummeli:

P. Wena mmeli wakhe, usuzwile isithembiso somzalwane wethu u... Uyathembisa yini, njengommeli wakhe ukumkhumbuza isithembiso sakhe, lokumsiza ukuba afunde imfundiso kaKristu, amanyane lamanye amakholwa empilweni yakhe, abe ngumKristu olungileyo na?

M. Yebo, ngiyathembisa.

   
 

Kwabanye bonke:

P. Lina lonke elilapha, angithi liyasizwa isithembiso somzalwane wethu lo ogulayo na?

K. Yebo, siyasizwa.

   
 

Kogulayo:

P. Mzalwane othandekayo, uzabhabhathizwa ukuba uthole ukuphila okungapheliyo, njengokulaya kweNkosi yethu uJesu Kristu.

   
 

Izifundo ezingabalwa: Joha 3,1-6; Joha 6,44-45; Marko 1,9-11.

Intshumayelo.

Ukulahla uSathane lokuvuma ukholo lombhabhathizo.

UBaba wethu, lomkhuleko wokuvala lesibusiso.
   
  Ukwamukelwa eBandleni komuntu obhabhathizwe kwelinye ibandla
   
 

Umuntu owabhabhathizwa kwelinye iBandla, (IAnglican, IDutch Reform, ILutheran, IMethodist, IUCCSA ama-Orthodox) engakemukelwa eBandleni eliKhatholika, uyafundiswa ukholo lwethu, enze imvumo anduba emukelwe eBandleni. Ukuvuma kwakhe ukholo lwethu kanye lathi, kuyamngenisa eBandleni.

Ukuhlola kwabemukelwayo eBandleni

   
 

P. Liyazinikela ngenhliziyo zenu zonke yini ukuba libe ngamalunga eBandla likaJesu Kristu eliKhatholika elabaPhostoli na?

K. Yebo, siyazinikela.

P. Lina lonke Bandla likaJesu Kristu elilapha, liyathanda yini ukuba abazalwane bethu laba bemukelwe eBandleni likaJesu Kristu eliKhatholika elabaPhostoli na?

B. Yebo, siyathanda.

   
  Ukulahla uSathane lokuvuma ukholo
   
  P. INkosi yethu uJesu Kristu iyalamukela ngesihle eBandleni layo, yona eyalikhokhela ngomusa wayo ukuba lingene kilo, lizehlanganyela lathi kulolukholo esalutshiyelwa ngabaPhostoli bayo eliluvume phambi kweBandla layo.
   
 

UBaba wethu, umkhuleko wokuvala lesibusiso.
   
 

next page