| |
|
| |
|
| |
Ingcazelo:
Isikhathi saphakathi komnyaka yisikhathi samalanga loba amaSonto angesiyo
mikhosi. Siqalisa ekupheleni kwesikhathi sokuzalwa lokuzibonakalisa
koMsindisi, siphele ekuqaliseni kwesikhathi sokuzila, sibuye siqalise futhi
emva koMkhosi woButhathu obuNgcwele, size siphele ngeSonto lokuqala
lokulindela ukuza koMsindisi (Advent). Umpristi labakhonzayo eMiseni bagqoka
izembatho eziluhlaza, ezifanekisa ithemba lethu kuNkulunkulu. Ngakho-ke
sifanele ukukhuleka ngethemba eliqinileyo, langokholo olungathandabuziyo,
ngoba zinengi izizatho lezinswelo zeBandla lezamakholwa, lezinye izinjongo
ezikhulekelwa ngalesisikhathi. |
| |
|
| |
Kasikhulekeni: Nkulunkulu wothando, ake uzwe imikhuleko yethu. Sisize
ukuba sazi lokho othanda ukuba sikwenze, ukuze sikwenze ngesibindi
langobuqotho. Sicela ngoKristu iNkosi yethu. Amen. |
| |
|
| |
Izifundo
ezingabalwa: Isa 49,3.5-6; 1 Kor 1,1-3; Joha 1,29-34 Lingakhangela izifundo
kusiQondiso seZifundo salowomnyaka. |
| |
|
| |
Inkondlo yokubonga
K. Kasibongeni uNkulunkulu, ngoba
nguye owasithanda kuqala.
B. Siyakubonga sikudumisa, Nkosi.
K. Nkulunkulu Baba, wawuthanda kangaka
umhlaba, waze wawuthumela iNdodana yakho eyodwa ukuba izewusindisa. -
Siyakubonga...
K. Nkulunkulu Mninikulunga, uthando
lwakho luthululelwa enhliziyweni zethu nguMoya
oNgcwele. - Siyakubonga...
K. Nkulunkulu wothando, lanxa umzali
elakho ukukhohlwa umntanakhe, wena kawusoze
usikhohlwe. -
Siyakubonga...
K. Baba olungileyo, uyasigona ngengalo zakho usilondoloze, lanxa
singawunanzi umusa wakho ngenxa yobubi bethu. - Siyakubonga...
K. Baba olobuhle bonke, uyasiholela
kuwe ngobubele bakho, usidonsela kuwe ngothando
lwakho. - Siyakubonga...
K. Nguwe owasithanda kuqala. Khathesi
uyasimema ukuba sibuyisele uthando
lwakho. - Siyakubonga...
K. Ngalokhu sihlanganyela lezithunywa zasezulwini, kanye
labangcwele bonke sisithi: UNgcwele, uNgcwele, uNgcwele...
|
| |
|
| |
Kasikhulekeni: Nkulunkulu Baba olomusa lothando olungapheliyo, umzali
angamlahla umntanakhe, kodwa wena kawubalahli abantu bakho. Umzali
angayidela inzalo yakhe, kodwa Wena kawusideli, lanxa sikonela. Ukusithanda
kwakho kuyamangalisa, Baba. Usidonsela kuwe ngamandla akho langendlela
ezitshi-yeneyo, ngoba usithanda, ufuna ukuba sisindiswe, sihlale lawe
ezulwini kuze kube nini lanini. Siyacela, Baba, ukuba usenze lathi
sikuthande ngenhliziyo yonke, langomoya wonke, langengqondo yethu yonke,
langamandla ethu onke, sithande labomakhelwane bethu njengoba sizithanda
thina. Senze sibe litswayi lomhlaba, lokukhanya kwawo. Sicela ngoKristu
iNkosi yethu. Amen. |
| |
|
| |
UMkhosi kaKristu iNkosi |
| |
|
| |
Ingcazelo:
IBandla ligcina iSonto yokucina yomnyaka weBandla njengeSonto loBukhosi
bukaJesu Kristu. UJesu njengo-Mdali uyiNkosi. Zonke izinto zadalwa nguye
ngitsho lamakhosi adalwa nguye. Lamandla abawasebenzisa ekubuseni kwabo
avela kuye njalo avunyelwe nguye. Wonke amakhosi
angaphansi kwakhe. IBandla
lakhangela konke lokhu labona kufanele ukumkhumbula uJesu njengeNkosi
yamakhosi. KuMvumukholo wabaphostoli sithi uJesu Kristu “uhlezi
ngakwesokunene sikaYise, lapho azavela khona ezothetha amacala abaphilayo
labafileyo. “Ukuhlala ngakwesokunene sikaYise kutsho ukuthi ubusa ndawonye
loYise njalo njengawo wonke amakhosi ulamandla okuthonisa amacala.
Ngokunjalo, uyiNkosi yazo zonke izidalwa. |
| |
|
| |
Kasikhulekeni:
Nkulunkulu Somandla Simakade, wenza uJesu
Kristu, iNdodana yakho, waba yiNkosi yethu leyezidalwa zonke. Ufuna
ukumanyanisa izizwe zonke ngaphansi kwakhe. Ufuna lokubambanisa izulu
lomhlaba lokumanyanisa amakhosi asemhlabeni ngaye. Siyabemukela ngokuthokoza
ubukhosi bakhe.
Sisize ukuba
simamukele ngenhliziyo yonke uKristu, oyiNkosi yethu loMkhokheli wethu
endleleni eza kuwe. Sivikele singaduhiswa ngabaprofethi bamanga abasikhupha
eqinisweni likaKristu. Sikucela ngaye uKristu iNkosi yethu. Amen
|
| |
|
| |
Izifundo
ezingathathwa yilezi: 2 Sam 5,1-3; Kol 1,12-20; Luka 23,35-43. |
| |
|
| |
Inkondlo
yezibongo zoBukhosi bukaJesu
K.
Kasibongeni iNkosi, uJesu Kristu, ngoba
inguMalusi wethu olungileyo.
B.
Siyakubonga sikudumisa, Nkosi.
K.
UyiNkosi elamandla, esilisa abagulayo, levusa
abafileyo. - Siyakubonga...
K.
Uzabuya ngosuku lokucina uzothetha amacala
abaphilayo labafileyo. - Siyakubonga...
K.
Amandla onke asezulwini lasemhlabeni anikwe
Wena. - Siyakubonga...
K.
UnguMalusi olungileyo, owelusa kuhle izimvu
zakho. - Siyakubonga...
K.
Ngamandla akho, iziphofu ziyabona, izilima
ziyalulama, abalobulepheru bayahlambuluka, abayanga batshunyayezwa izindaba
ezinhle. - Siyakubonga...
K.
Ulamandla phezu kokuphila lokufa, wavusa
uLazaro, waphuma elibeni, waphakamisa indodakazi kaJayirosi ngesandla,
yavuka ekufeni. - Siyakubonga...
K.
UNkulunkulu uBaba wakuphakamisa, wakunika
ibizo elikhulu kulawo wonke, ukuze
ebizweni
lakho kuguqe amadolo wonke, awabasezulwini labasemhlabeni, labangaphansi
komhlaba. -
Siyakubonga...
K.
UnguLizwi owayevele ekhona kungakadalwa lutho,
konke okudaliweyo kwadalwa
ngawe. -
Siyakubonga...
K.
Siyizidalwa zakho, sizinceku zakho, sizibeka
ngaphansi kwakho, sivuma ukuthi uyiNkosi yethu kuze kube nininini. -
Siyakubonga...
K.
Sikanye lezithunywa zasezulwini labangcwele
bonke, siyakuhubela sisithi:
UNgcwele, uNgcwele,
uNgcwele.... |
| |
|
| |
Ukudumisa
uJesu iNkosi
Nkosi Jesu Kristu, ngiyavuma
ukuthi uyiNkosi yezulu lomhlaba. Konke okudaliweyo kwadalelwa wena. Ungibuse
njengokuthanda kwakho, njengoba uyiNkosi yami. Ngivuselela izithembiso zami
zoMbhabhathizo, ngithi ngiyamlahla uSathane lobukhosi bakhe, lemisebenzi
yakhe. Ngiyathembisa ukuthi ngizahamba njengekholwa elilungileyo kokuphela.
Ngiyazibopha ukuthi ngizazama ngawo wonke amandla ami, ukwenza ukuthi
intando kaYihlo yenziwe, umsebenzi weBandla lakho uqhubekele phambili,
umbuso wakho unqobe. Nginikela kuwe zonke izenzo lemisebenzi yami, ukuze
konke engizakwenza, ngikwenzele ukwandisa ubukhosi bakho, ukuze umbuso wakho
wokuthula uzinze emhlabeni. Amen. |
| |
|
| |
AMALANGA KAMARIYA ONGCWELE |
| |
|
| |
Ingcazelo:
Kulamalanga athile kaMama uMariya iBandla eliwagcina njengaqakathekileyo
okholweni lwethu. Wona yila: |
| |
|
| |
UMkhosi kaMariya uNina
kaNkulunkulu;
(1 January) |
| |
UMariya uthiwa nguNina kaNkulunkulu ngoba umntwana owazalelwa eBethlehema,
wayengumuntu enguNkulunkulu uqobo. UMariya wasizalela iNdodana kaNkulunkulu.
Ngokunjalo sikhuleka kuye sisithi: Mariya oNgcwele Nina kaNkulunkulu,
usikhulekele thina zoni khathesi lasesikhathini sokufa kwethu. Siyambonga
uMariya ngeNdodana yakhe, simdumisa njengoNina kaNkulunkulu.
|
| |
|
| |
Kasikhulekeni: Nkulunkulu Baba, angathi uJesu Kristu ongumthombo
wokuphila, owasinika yena ngo-Nina oliVirigo uMariya, angaqhubeka ngenxa
yemikhuleko kaMariya, ukusiholela ekuphileni lasekusindisweni. Sengathi
umnyaka omutsha ungasilethela ukuthula lokudla okwaneleyo, sivikelwe
emikhuhlaneni lasezingozini zonke. Sicela ngeNkosi yethu uJesu Kristu
iNdodana yakho, enguNkulunkulu, ephila ibusa kanye lawe, ndawonye loMoya
oNgcwele, kuze kube laphakade. Amen. |
| |
|
| |
Izifundo ezingabalwa: Zef 3,14-17; Luka 1,26-28; Luka 2,41-52; Joha 2,1-12;
Joha 19,25-27. |
| |
|
| |
UMkhosi weNhliziyo
engelacala kaMariya. |
| |
Usuku lolu
luthakazelelwa ngoMgqibelo olandela iNhliziyo engcwele kaJesu. Lumkhosi
ugcinwa yisifundambhishopi sakoBulawayo.
IBandla
eliKhatholika likholwa ukuthi uMariya oNgcwele wemulwa engelacala.
UNkulunkulu walungiselela uMariya ukuba nguNina weNkosi yethu ngokumvikela
esonweni ekwemulweni kwakhe lasempilweni yakhe. Okuqakathekileyo yikuthi
semukele uMariya uNina kaJesu njengomama wethu, osicelelayo losikhulekelayo.
Impilo kaMariya iyasifundisa ukubekezela ekuhluphekeni.
|
| |
|
| |
Kasikhulekeni: Nkulunkulu Baba, walungisa inhliziyo yeVirigo uMariya,
yaba yindawo efanele ukuhlala uMoya oNgcwele. Sengathi ngemikhuleko yakhe
lathi singaba ngamathempeli afaneleyo enkazimulo yakho. Sicela ngoKristu
iNkosi yethu. Amen. |
| |
|
| |
Izifundo ezingathathwa: Hubo 13,5-6; Luka 2,19 |
| |
|
| |
UMkhosi wokwenyuselwa kukaMariya
ezulwini
(15 August) |
| |
UMariya
uNina weNkosi yethu uJesu Kristu, wenyuselwa ezulwini ngomzimba lomphefumulo
wakhe. Ukwenyuselwa kukaMariya ezulwini kuveza obala icebo likaNkulunkulu
kithi lokuthi ufuna siphile laye kokuphela ngomzimba langomphefumulo.
UMariya wazithoba, wakhuleka, walalela, wamdumisa uNkulunkulu. Ngokunjalo
uNkulunkulu wamenzela izinto ezinkulu. |
| |
|
| |
Kasikhulekeni:
Nkulunkulu Somandla, wanika uMariya iVirigo elithobekileyo isibusiso sokuba
ngu-Nina weNdodana yakho, wamethesa umqhele wenkazimulo yasezulwini. Angathi
imikhuleko yakhe ingasifikisa osindisweni lukaKristu, isifikise ekuphileni
okungapheliyo. Sicela ngeNkosi yethu uJesu Kristu iNdodana yakho,
enguNkulunkulu, ephila ibusa kanye lawe, ndawonye loMoya oNgcwele, kuze kube
laphakade. Amen. |
| |
|
| |
Izifundo ezingabalwa: Luka
1,39-56; Joha 19,25-27; Seb 1,12-14; Hubo 45. |
| |
|
| |
UMkhosi wokuzalwa kukaMariya;
(8
September) |
| |
Ngalelilanga sikhumbula
ukuzalwa kukaMariya oNgcwele uNina weNkosi yethu uJesu Kristu. UNkulunkulu
walungiselela uMariya ukuba nguNina weNkosi yethu ngokumnikela esonweni
ekwemulweni kwakhe lasempilweni yakhe. Ilanga lokuzalwa kukaMariya kalaziwa,
kodwa siyazi ukuthi wayezalwa endlini kaDavida iNkosi edumileyo yakolsrayeli.
|
| |
|
| |
Kasikhulekeni:
Nkulunkulu wokulunga lomusa, akunike abantu bakho usizo lamandla avela kuwe.
Ukuzalwa kweNdodana yakho liVirigo uMariya kwaba yikusungula kokusindiswa
kwethu. Sengathi ukugcina umkhosi wokuzalwa kwakhe uMariya, kungasisa
ekuthokozeni okungapheliyo. Sicela ngeNkosi yethu uJesu Kristu iNdodana
yakho, enguNkulunkulu, ephila ibusa kanye lawe, ndawonye loMoya oNgcwele,
kuze kube laphakade. Amen. |
| |
|
| |
Izifundo ezingabalwa: Isa 7,14; Mat 1,21 |
| |
|
| |
ILanga likaMariya iNkosikazi
yeRosali; (7 October) |
| |
UMariya
iNkosikazi yeRosali wakhuthaza amakholwa ukukhuleka iRosali ngesikhathi
elwisana lokuqeda imfundiso yamanga. UMariya empilweni yakhe wayekhuleka,
emdumisa uNkulunkulu. Njalo iBandla libiza linyanga ngokuthi ngeyeRosali.
Amakholwa ayakhuthazwa ukukhuleka iRosali nsuku zonke ngalinyanga.
|
| |
|
| |
Kasikhulekeni:
Nkulunkulu olesihawu esingelamkhawulo, ake ugcwalise inhliziyo zethu
ngothando lwakho, kuthi njengoba wasazisa ngesithunywa sakho ngokuza
kweNdodana yakho ingumuntu, usiholele ngokuhlupheka langokufa kwayo
enkazimulweni yokuvuka kwayo ekufeni. Sicela ngeNkosi yethu uJesu Kristu
iNdodana yakho, enguNkulunkulu, ephila ibusa kanye lawe, ndawonye loMoya
oNgcwele, kuze kube laphakade. Amen. |
| |
|
| |
Izifundo ezingabalwa: Luka
1,28.31.42. |
| |
|
| |
UMkhosi wokwemulwa okungelacala
kukaMariya iVirigo elibusisiweyo; (8
December) |
| |
Siyakholwa ukuthi uMariya
oNgcwele wemulwa engelacala. UMoya oNgcwele walungiselela uMariya uNina
weNkosi yethu uJesu Kristu ngokumvikela esonweni ukuze abe yindlu
engangcolanga okwakuzathwalwa kiyo uMsindisi. UMariya nguye yedwa ongazange
abe lesono semvelo. |
| |
|
| |
Kasikhulekeni:
Nkulunkulu Baba, walungiselela iVirigo uMariya ukuba abe nguNina weNdodana
yakho. Wamenza waba lesabelo emsebenzini wokusindiswa kwabantu,
okwakuzalethwa nguKristu ngokufa kwakhe. Wamgcina engelasono kusukela
ekwemuleni kwakhe. Akusisize ngemikhuleko yakhe, ukuba lathi sihlale
singelasono phambi kwakho. Sicela ngoJesu Kristu iNkosi yethu. Amen.
|
| |
|
| |
Izifundo ezingabalwa: Isa
7,10-17; 2 Sam 7,1-17; Jer 31,21-22; Hubo 46; Hos 2-3. |
| |
|
| |
ISonto lokukhulekela ukuba
ukholo lwande |
| |
Ingcazelo: Ukholo
luyisipho sikaNkulunkulu. Nxa uNkulunkulu engasiphanga lesosipho, asingeke
sibe lokholo. UJesu wathi: “Kalingikhethanga lina, kodwa yimi
engilikhethileyo ngalimisela ukuba lihambe, lithele izithelo”(Joha 15,16).
Ngala amazwi, uJesu wasitshengisa ukuthi ukholo lwethu luyisipho. Ngakho-ke,
sifanele ukuzikhulekela, sikhulekele labanye abangasiwo makholwa ukuba labo
bemukeliswe lesisipho. Ngenxa yalokho, iBandla lamisa usuku lapho amakholwa
amele akhulekele ukwanda kokholo emhlabeni. |
| |
|
| |
Izifundo ezingabalwa: Zek 8,20-25; 1 Tim 2,1-8; Luka 24,44-53.
|
| |
|
| |
ISonto lokukhulekela izibizelo |
| |
Ingcazelo:
UJesu wathi: “Ukuvuna kukhulu, kodwa izisebenzi ziyingcosana; ngakho-ke
celani eNkosini yokuvuna ukuba ithumele izisebenzi ekuvuneni kwayo” (Luka
10,2). Ngala amazwi, uJesu wayethanda ukusitshengisa ukuthi banengi abantu
abathanda ukufundiswa ngokholo, kodwa balutshwane abantu abazinikela kulo
umsebenzi wokuthuthukisa ukholo. Nxa sikhangela lamhla, abapristi esilabo
balutshwane, kabenelisi ukuya kibo bonke abantu ababaswelayo. Lamhla,
iBandla liyakhuthazwa ukuthi likhulekele izibizelo ukuze uNkulunkulu athele
umoya wokuzinikela kubafana lakumantombazana, bazimisele ukusebenzela
iBandla bengamasista lamabrada labapristi. |
| |
|
| |
Izifundo ezingabalwa Isa 6,6-8; Gal 6,14-18; Luka 10,1-12.17-20. |
| |
|
| |
UMkhosi wabaNgcwele bonke (1
November) |
| |
Ingcazelo: Abangcwele abasezulwini bangabameli bethu ngokokholo. Yibo
abasandulelayo ukungena ezulwini. Abanye babo baqanjwa liBandla ukuthi
bangabangcwele ngenxa yempilo yabo eyayingcwele kakhulu lapha emhlabeni.
Abanengi kabaqanjwanga liBandla, kodwa basezulwini. Ngitsho labokhokho bethu
basendulo, nxa babelungile, belandela isazela sabo esihle, uNkulunkulu
wabasindisa, wabangenisa ezulwini. Usuku lwabangcwele ngolwabo bonke
abasezulwini, abaziwayo labangaziwayo. Thina lathi singaphila impilo enhle
size sife. Ekufeni kwethu silungile kuzakuba lusuku lwethu lokungena
ezulwini. |
| |
|
| |
Izifundo ezingabalwa: Isam 7,2-14; 1 Joha 3,1-3; Mat 5,1-16. Khulekani
iLithani labangcwele. |
| |
|
| |
Kasikhulekeni: Nkulunkulu Mninizizwe zonke, nguwe owenza abangcwele
esibahloniphayo lamhla bangena ezulwini. Wabangcwelisa, wabaqinisa benza
intando yakho ngenhliziyo zabo zonke. Siyacela ukuba usivuselele ngoMoya
wakho oNgcwele, sibe ngcwele, sikukhonze ngobuqotho, khona sizakuba kanye
labangcwele bakho ezulwini. Sicela ngoKristu iNkosi yethu. Amen. |
| |
|
| |
Usuku lokukhulekela abafileyo
(2 November) |
| |
Ingcazelo: Kusukela kubaPhostoli, imfundiso ithi akukho okungcolileyo
okungangena ezulwini; (Isam 21,27). Ngakhoke lithi imiphefumulo yabantu
abafa bengahlambulukanga okupheleleyo, iya “Esihlanjululweni” ingakangeni
ezulwini; (1 Kor 3,13-15). Lokho yikho okwenza ukuba sikhulekele abafileyo,
ngoba alubana kulezulu lesihogo kuphela, kungela “Sihlambululo” ngabe
akusizi lutho ukukhulekela abafileyo, ngoba abasezulwini kabasweli
kukhulekelwa, abasesihogweni kabasoze baphume loba bekhulekelwa kangakanani. |
| |
|
| |
Izifundo
ezingabalwa: 2 Makh 12,43-45; Isam 14,13; Joha 14,1-6. |
| |
|
| |
Kasikhulekeni: Nkulunkulu Mninimusa lesihawu, ufuna ukuba abantu bonke
basindiswe, kungalahleki ngitsho lamunye. Siyakuncenga ukuba uhawukele
imiphefumulo yezihlobo zethu ezisitshiyileyo, leyabo bonke abafileyo
abasahlawulela izono zabo. Bakhuphe ebuhlungwini abaphakathi kwabo,
ubangenise ekuthokozeni okungapheliyo kwasezulwini ngenxa yenhlupheko
zikaJesu Kristu iNdodana yakho eyabahlawulelayo. Sicela ngaye uKristu iNkosi
yethu. Amen. |
| |
|
| |
Ukulabhelela imiphefumulo yabafileyo
K.
UNkulunkulu kaAbrahama, loIsaka loJakobe,
bahawukele abazalwane bethu bonke abasitshiyileyo.
B.
Siyakuncenga, akusizwe.
K.
Ngenxa yokulunga kwakho okungelamkhawulo,
langenxa yenhlupheko zeNdodana yakho uJesu Kristu, bathethelele, Nkosi. -
Siyakuncenga...
K.
Wabekezelela uAbrahama, wathethelela uDavida
inkosi, bahawukele, ubaxolele,
Baba! -
Siyakuncenga...
K.
Wahlambulula uMariya Magadalena wamenza waba
ngcwele, bahlambulule,
Nkosi! -
Siyakuncenga...
K.
Nkosi Jesu Kristu, wathethelela isela
esiphambanweni, wathi: “Lamuhla uzakuba lami ePharadise.” Bangenise
epharadise lakho. - Siyakuncenga...
K.
Nkosi, baphe ukuphumula okungapheliyo.
Lokukhanya okulaphakade kubakhanyele. Angathi bangaphumula ngobuhle. Amen.
|
| |
|
| |
next page
 |