PRAYER BOOK

	ISIKHATHI SOKUZILA

	Ingcazelo: Isikhathi sokuzila siqalisa ngoLwesithathu loMlotha sicine ngoMgqibelo oNgcwele. NgoLwesithathu loMlotha abantu banindwa umlotha emabunzini. Lokhu kutshengisa ukuthi bafanele ukuhlawulela izono zabo. Ngalolusuku, abantu bakhuthazwa ukuzila inyama, lokusutha kanye ngelanga. Ngalesisikhathi sokuzila sifanele ukuzincitsha imidlalo, lokuchitha imali etshwaleni, lokunye, ukuze ngaleyo mali, senelise ukusiza abahluphekayo. Isikhathi lesi ngesokukhumbula kakhulu ukuhlupheka kukaJesu. Siyakhuleka sisenza imisebenzi yomusa. Siyakhuthazwa njalo ukukhuleka indlela yesiphambano leminye imikhuleko eqondane lokuhlupheka kukaJesu. Izifundo ezingathathwa: Jow 2,12-18; Roma 5,12-19; Marko 9,2-10.

	Kasikhulekeni: Nkulunkulu olesihawu esingapheliyo, ngesikhathi sokuzila uyasinxusa ukuba sizile, sizincitshe, sizinqande, siphane, ukuze sibonakalise uthando lwethu kuwe lakumakhelwane wethu. Sisize, ukuba singazenzisi lakancinyane, singabi ngabakhohlisi, kodwa sibe ngamakholwa azinikele ngokupheleleyo, ukuze uMbuso wakho leBandla likaJesu Kristu kuqhubekele phambili. Sicela ngoKristu iNkosi yethu. Amen.

	IVIKI ENGCWELE

	Ingcazelo: NgeViki eNgcwele iBandla emhlabeni wonke, likhumbula ukuhlupheka lokufa kukaJesu Kristu. Kuliviki, kulapho esibona khona uthando olukhulu lukaNkulunkulu. Liviki eNgcwele iqala ngesonto yamalala. Phakathi kwale iviki, umbhishopi ukhetha elinye ilanga lapho abusisa khona amafutha asetshenziswa embhabhathizweni, lemqinisweni, lakwabagulayo lasebufundisini. (Khangelani izinkonzo ezisegwalweni lweViki eNgcwele - Revised Rites for Holy week). NgeSonto yamalala sikhumbula ukungena kukaJesu eJerusalema ngobukhosi, ehlangabezwa ngamaJuda, ephethe ingatsha zamalala, ehlabela, edumisa.
	- Udwendwe lwamalala - Ukuchasiswa. - Ukubusiswa kwamalala ngamanzi angcwele. Kubalwa iVangeli. - Intshumayelo emfitshane. - Udwendwe. - IMisa eNgcwele.

	ULwesine oluNgcwele

	NgoLwesine oluNgcwele sikhumbula uJesu esekudleni kokucina elabafundi bakhe lapho amisa khona iSidlo esiNgcwele lobuPristi.

	Kasikhulekeni: Nkulunkulu Baba wethu, lamhla sihlangene lapha ukuba samukele iSidlo esiNgcwele iNdodana yakho eyodwa eyasitshiyela iBandla layo, yatshengisa obala uthando lwayo ngaso. Kwathi isikhathi sokufa kwayo sesifikile yasinika lesiSidlo. Yasilaya ukuba sisamukele njengomhlabiso omutsha ongapheliyo. Sengathi ngaleliSakramente singathola uthando lempilo epheleleyo. Sicela ngoKristu iNkosi yethu. Amen.

	- Emva kwentshumayelo kugeziswa inyawo. - Izikhalazo. - Emva kweMisa eNgcwele kuhlutshulwa iAlithare. - ISidlo esiNgcwele sibekwa kwelinye iTabernakeli. - Ukuguqela iSidlo esiNgcwele. - Umkhuleko wokuvala.

	ULwesihlanu oluNgcwele

	NgoLwesihlanu oluNgcwele sikhumbula ukusifela kukaJesu esiphambanweni.

	Kasikhulekeni: Nkulunkulu Baba, ngokuhlupheka kukaKristu iNdodana yakho, wasisindisa ekubhubheni esakuthola sonke ngokona kukaAdamu. Njengoba singabenyama njengaye, sisize ngamandla langomusa wakho ukuba sifuze iNkosi yethu esezulwini yona ephila ibusa ngezikhathi zonke. Amen.

	- Isigaba seLizwi likaNkulunkulu. Kubalwa izifundo zenhlupheko kaJesu. - Izikhalazo. Kukhulekelwa iBandla labantu abatshiyeneyo. - Ukuhlonitshwa kwesiphambano. - Kukhulekwa uBaba wethu. - Ukwamukela iSidlo esiNgcwele

	UMgqibelo oNgcwele

	NgoMgqibelo oNgcwele siba lomlindelo wokuvuka kukaKristu ntambama, sidumisa, sibabaza amandla kaNkulunkulu anqoba ngawo ukufa, wasizuzela impilo entsha.

	Kasikhulekeni: Bazalwane bami kuKristu, ngalobubusuku obungcwele kakhulu iNkosi yethu uJesu Kristu eyakhuphuka ngabo ekufeni yaya ekuphileni, iBandla linxusa abantwabakho emhlabeni wonke, ukuba beze ndawonye balindele bekhuleka. Khathesi sesigcina iPhasika leNkosi yethu. Nxa sikhumbula ukufa lokuvuka kwayo, ngokulalela ilizwi layo lokugcina imfihlakalo zayo, sizakuba lethemba lokuhlanganyela ekunqobeni kwayo ukufa lokuphila layo ezulwini kuze kube lanini. Amen.

	- Inkonzo yokukhanya.

	Kasikhulekeni: Nkulunkulu Baba, sihlanganyela ekukhanyeni kobukhosi bakho, ngeNdodana yakho eyikukhanya komhlaba. Ake ubusise + lumlilo omutsha, usigcwalise ngethemba elitsha. Hlambulula ingqondo zethu ngalinkonzo yePhasika, kuthi ngelinye ilanga usise ebukhosini bokukhanya okungapheliyo. Sicela ngoKristu iNkosi yethu. Amen.

	- Ingoma yePhasika. - Isigaba selizwi likaNkulunkulu. - Imikhuleko emva kwezifundo. - Ukubusiswa kwamanzi ombhabhathizo. - Ukuvuselela izithembiso zoMbhabhathizo. - Umbhabhathizo. - Ukuqhutshwa kweNkonzo yeSidlo esiNgcwele.

	ISIKHATHI SEPHASIKA

	Ingcazelo: ISonto yePhasika, lusuku esikhumbula ngalo ukuvuka kukaJesu Kristu kwabafileyo. Abesifazana bafika elibeni ekuseni. Isithunywa seNkosi sathi kubo: Kakho lapha uvukile njengokutsho kwakhe. “Ngalolusuku uJesu wanqoba ukufa watshengisa amandla akhe obuNkulunkulu. IBandla liyatho-koza ngoba lo, yiwo umkhosi omkhulu kulayo yonke eminye imikhosi yeBandla ngoba uPhawuli uthi: “Uba uKristu enga-vuswanga, ukukholwa kwenu kuyize, lisesezonweni zenu” (1 Kor 15,17).

	Kasikhulekeni: Nkulunkulu Mninimpilo, Yise weNkosi yethu uJesu Kristu, silaphanje sizobabaza izenzo zakho ezimangalisayo. INdodana yakho ngokuvuka kwayo ekufeni ngamandla akho, yanqoba ukufa lesono. Ukuvuka kwayo kuyisimangaliso sezimangaliso zonke. Siyacela, Baba, ukuba usiphe ukholo oluqinileyo lethemba elikhulu, singathandabuzi ukuthi sizavuka ekufeni ngosuku lokucina. Usiphe uthando lokutshiseka, ukuze silungisele ukuvuka ekufeni ngobukhosi, langenkazimulo kaKristu, sihlale laye ezulwini kuze kube nini lanini. Amen.

	Izifundo ezingabalwa: Seb 10,34a.37-43; Kol 3,1-4; Joha 20,1-9

	Ukuhalalisela uKristu ovukileyo

	K. Nkosi Jesu Kristu Qhawe lamaqhawe, Mehluli wokufa, usuvukile sibili. Aleluya! B. Ihubeleni iNkosi ingoma entsha ngoba ivukile sibili. Aleluya! K. Ekuvukeni kwakho umhlaba wazamazama, amabutho awa, abhazalala. Aleluya! - Ihubeleni... K. UMagadalena labafundi bathola ingcwaba lize, ngoba wawusuvukile sibili. Aleluya! - Ihubeleni... K. Wabonakala kuPhetro, waqinisa ukholo lwakhe. Aleluya! - Ihubeleni... K. Abafundi baseEmawusi bakwazi ekuhlephuneni isinkwa. Aleluya! - Ihubeleni... K. Kusihlwa wabonakala kubafundi, wakhuluma, wadla labo, bathokoza. Aleluya! - Ihubeleni... K. UThomasi othandabuzayo, usuqinisile ukholo lwakhe wathi: “Nkosi yami, Nkulunkulu wami!” Aleluya! - Ihubeleni... K. Siqinise lathi, singathandabuzi okholweni lwethu. Aleluya! - Ihubeleni...

	Isilangazelo sabafundi base - Emawusi

	K. Nkosi, sikhaphe ohambeni lwethu lwalumhlaba, usivulele imibhalo, siqedisise ukuthi nguwe uMesiya. B. Hlala lathi, Nkosi! zitshiseke njalo inhliziyo zethu ngomlilo wothando. K. Nkosi, uvukile, hlala lathi, uhambe lathi, uvule amehlo ethu, sikwazisise. Sihlephunele isinkwa, ukhulume lathi, sikwazi, aleluya! - Hlala... K. Thela phakathi kwethu intokozo yase-Emawusi, sijabule okholweni lwethu, sisukumele phezulu ekukukhonzeni. - Hlala... K. Nkosi Jesu, wonke amandla asezulwini lasemhlabeni anikwe wena. Siqinise ngamandla akho, usithume emhlabeni, sikuzuzele abafundi. - Hlala... K. Lapho sihanqwe yizilingo, lalapho sikhangelene lobunzima, lalapho sesiphelelwe lithemba, lalapho sesisethunzini lokufa. - Hlala... K. Nxa ulathi, uvula ingqondo zethu, ubase umlilo enhliziyweni zethu, sizasukela phezulu, sifakaze singesabi, sitshumayele ukuvuka kwakho. - Hlala... K. Siphephise ezingozini zomoya lezomzimba, usifikise ezulwini, sithokoze kanye lawe labangcwele bonke kuze kube nini lanini. - Hlala...

	UMkhosi wokwenyukela kweNkosi ezulwini

	Ingcazelo: UJesu wavuka ekufeni wahlala lapha emhlabeni insuku ezingamatshumi amane. Wahamba labafundi bakhe wadla labo. Emva kwensuku ezingamatshumi amane wenyuka waya ezulwini lapho ahlezi khona kwesokunene sikaYise. IBandla lonke ngalolusuku likhumbula ukwenyukela kuka-Kristu ezulwini. IBandla liyakholwa ukuthi uKristu uzaphinda abuye njalo ekupheleni kwesikhathi esezothatha bonke abalungileyo ebasa kuNkulunkulu uBaba, ngoba wathi lapho akhona bazakuba khona labo.

	Kasikhulekeni: Nkulunkulu Baba, gcwalisa inhliziyo zethu ngentokozo ngalolusuku lokwenyukela kweNdodana yakho ezulwini. Siyacela Baba olamandla wonke, ukuba usisize, simlandele uJesu Kristu ekhaya lakho lasezulwini mhla sifayo. Sicela ngoKristu iNkosi yethu. Amen.

	Izifundo ezingabalwa: Seb 1,1-11; Efe 1,17-23; Luka 24,46-53.

	Inkondlo yokwenyukela kukaJesu ezulwini

	K. Nkosi Jesu Kristu, unguSomandla, unguSimakade, unguMvelingqangi! B. Siyakubabaza, siyakwazisa, siyakuguqela. K. Mhla usenyukela ezulwini umkhathi lesikhathi kwaqhekezeka, izulu lomhlaba kwamanyana! - Siyakubabaza... K. IPhezulu lephansi kwagonana, ubuntu lobuNkulunkulu kwahlangana, akusoze kwehlukane futhi kuwe! - Siyakubabaza... K. Wenyuka ngeyezi, wasitheka, wayahlala kwesokunene sikaYihlo. - Siyakubabaza... K. Abafundi basala bejolozele phezulu, amehlo abo engafuni ukusuka, ngoba inhliziyo zabo zikuwe. - Siyakubabaza... K. Nxa sisithi wenyuselwa ezulwini, kasitsho ukukhwezwa komzimba nje, sitsho kakhulu ukuphakanyiselwa kwakho esikhundleni esiphezulu. - Siyakubabaza... K. Ngakwesokunene sikaYihlo udunyiswa yizithunywa zezulu labangcwele bonke, ngoba unguPhezukonke, wena Jesu Kristu. - Siyakubabaza... K. Ezulwini usilungisele indawo, ukuze kuthi lapho okhona wena, sibe khona lathi, ngoba uyasithanda. - Siyakubabaza... K. Kawusitshiyanga sizintandane, wasithembisa uMoya oNgcwele, ukuba asithokozise, asifundise indlela eza kuwe. - Siyakubabaza... K. Ngosuku lokufa kwethu, sihlangabeze sihlale lawe kokuphela, kungabi lenye indawo esingaya kuyo ngaphandle kwalapho okhona.
	*UNgcwele, uNgcwele, uNgcwele...*

	IPHENTEKOSTE

	Ingcazelo: EThestamenteni eliDala usuku lwePhentekoste lwalubizwa ngokuthi “Olwamaviki ayisikhombisa, “emva kwePhasika, ngesiGriki kuthiwa “Olwensuku ezingamatshumi amahlanu”; emva kwePhasika. Usuku lolu lwalugcinelwa ukunikela izithelo zesivuno sokuqala ethempelini, lokukhumbula ukunikwa kukaMose imithetho elitshumi entabeni yaseSinayi, okwenzakala emva kwensuku ezingamatshumi amahlanu abakolsrayeli besukile eGibithe. EThestamenteni eliTsha uMkhosi lo, siwugcinela ukukhumbula ukwehla kukaMoya oNgcwele kubaPhostoli ngalolusuku. Ngumkhosi omkhulu eBandleni, ngoba ngumkhosi wokuzalwa kwalo, lowokuqalisa kwalo ukutshumayela iVangeli ezizweni zonke.

	Kasikhulekeni: Nkulunkulu Baba Somandla, Simakade, wathumela uMoya wakho oNgcwele kubaPhostoli ngeLanga lePhentekoste, ukuba abasize, batshumayele iVangeli emhlabeni wonke, bakhe umbuso wakho ezizweni zonke. Siyakuncenga ukuba umthumele eBandleni lakho, lakithi sonke, ukuze iVangeli lakho lifike emikhawulweni yomhlaba, abantu bonke bakwazi, bakuthande bakukhonze. Sicela ngoKristu iNkosi yethu. Amen.

	Izifundo ezingathathwa yilezi: Seb 2,1-11; Roma 8,8-17; Joha 14,15-16.23-26.

	Ukucela izipho zikaMoya oNgcwele
	K. Woza Moya wokuhlakanipha, usenze sihlakaniphele izinto zokomoya, sitshisekele okwasezulwini. B. Nkosi ekuthumeni kwakho uMoya wakho konke kuyadalwa, wenza umhlaba ube mutsha. K. Woza Moya wokuqedisisa, uvule ingqondo zethu ukuze sizwisise imfundiso engcwele lamaqiniso okholo. - Nkosi ekuthumeni kwakho... K. Woza Moya wokweluleka, uqondise inhliziyo zethu, ukuze sithande okuhle, sizonde okubi, sihambe ngokulunga, sixwaye ububi. - Nkosi... K. Woza Moya wesibindi, udinise inhliziyo zethu ukuze singalahli ithemba ekulingweni lasebunzimeni. - Nkosi... K. Woza Moya wolwazi, usenze sibone intando kaNkulunkulu kukho konke okusehlelayo kulumhlaba. - Nkosi... K. Woza Moya wokulunga, usenze sitshisekele ukulunga lobungcwele, lokuthanda uNkulunkulu phezu kwezinto zonke, sithande omakhelwane njengoba sizithanda thina. - Nkosi... K. Woza Moya wokwesaba iNkosi, ugcwalise inhliziyo zethu ngokwesaba uNkulunkulu, lokwesaba ukwephula imilayo yakhe. - Nkosi...

	Ukucela izithelo zikaMoya oNgcwele
	K. Moya oNgcwele, akuthele enhliziyweni zethu isipho sothando, khona sizathanda uNkulunkulu phezu kwezinto zonke, labantu bonke njengoba sizithanda thina. B. Woza Moya oNgcwele, ugcwalise inhliziyo zamakholwa akho. K. Moya oNgcwele, faka enhliziyweni zethu isipho sokuthokoza, ukuze sihlale sithabile, sithokozise uNkulunkulu labantu bonke. - Woza... K. Moya oNgcwele, siphe ukuthula, ukuze sanelise ukuhlalisana kuhle njengabantwana bakaNkulunkulu. - Woza... K. Moya oNgcwele, siphe ukubekezela, ukuze sithwale ijogwe lethu lobuKristu ngokwenama langesibindi. - Woza... K. Moya oNgcwele senze sibe mnene, sikhaliphe njengezikhwehle, kodwa sibe msulwa njengezinkwilimba. - Woza... K. Moya oNgcwele gcwalisa inhliziyo zethu ngokulunga, sitshisekele ukuba ngabapheleleyo njengoBaba osezulwini. - Woza... K. Moya oNgcwele, siphe inhliziyo ende, ikakhulu ebunzimeni lasekuhluphekeni, ukuze sifane loJesu uMsindisi wethu. - Woza... K. Moya oNgcwele senze sibe ngabachumileyo, sinqande ulimi lwethu sizikhuze, sizithinte kokuphela. - Woza... K. Moya oNgcwele siphe ukukholwa okuqotho, okubonakala ngezithelo langemisebenzi emihle. - Woza... K. Moya oNgcwele, akusenze siziphathe ngokufaneleyo, sibe lempilo elembeko, sigqoke okulesithunzi. - Woza... K. Moya oNgcwele, akufake enhliziyweni zethu ukuzinqanda lokwehlula inkanuko ezimbi. - Woza... K. Moya oNgcwele, siphe ubumhlophe benhliziyo, sibe mhlophe emoyeni lasemzimbeni, ngoba singamathempeli akho. - Woza... K. Akuthume uMoya wakho khona kuzakuba lemvuselelo. B. Uvuselele butsha ubuso bomhlaba. *UNgcwele, uNgcwele, uNgcwele Nkosi...* K. Umusa kaNkulunkulu kawuthelwe enhliziyweni zethu. B. NgoMoya oNgcwele ohlala kizo. Umkhuleko welanga likaMoya oNgcwele Siyakuncenga Nkosi, akulumathise enhliziyweni zethu umlilo owazaphenjwa yiNkosi yethu uJesu Kristu lapha emhlabeni. Sicela uwukhwezele ngoMoya wakho oNgcwele uvuthe ubonakale ezizweni zonke. Sicela ngaye uKristu iNkosi yethu, ophila ebusa kanye lawe ndawonye loMoya oNgcwele kuze kube laphakade. Amen. K. Ake uthume uMoya wakho, khona kuzakuba lemvuselelo. B. Uvuselele butsha ubuso bomhlaba.

	Umkhosi woButhathu obuNgcwele

	Ingcazelo: Ngalelilanga, sikhumbula imfihlo eyedlula ezinye imfihlo zonke, eyokuthi uNkulunkulu munye, kodwa kuye kulabazimeli abathathu: UYise, leNdodana loMoya oNgcwele. Lokho singakufanisa lomzimba wethu, olenyama, legazi lamathambo, kodwa ungumzimba munye. Njalo thina uqobo silomoya lomzimba munye, izinto ezitshiyeneyo kakhulu, kodwa singumuntu munye. Ngakho-ke, lanxa imfihlo yoButhathu obuNgcwele, iphezu kwengqondo yethu, kayiphambananga lokubona kwengqondo yethu. Siyabona ukuthi akukho okungavimbela ukuba kube labazimeli abathathu kuNkulunkulu munye. Emkhulekweni lasekukhonzeni, sidumisa, sibonga uNkulunkulu munye; owasidalayo losilondolozayo - enguYise, lowasihlengayo losisindisayo ukuba sifike ezulwini - enguNdodana, losihlambululayo asingcwelise, ukuze sibe ngabantwana abayibo bakaNkulunkulu - enguMoya oNgcwele. Siyambonga uNkulunkulu ngakho konke asenzela khona, simcele ukuba ahlale phakathi kwethu, lathi sihlale kuye kokuphela.

	Kasikhulekeni: Siyakhuleka kuwe sikubonga, sikudumisa, Buthathu obuNgcwele, ngoba ufanele udumo lonke. Siyakholwa ukuthi unguNkulunkulu munye ongabazimeli abathathu, uYise, leNdodana loMoya oNgcwele, ngoba wasazisa iqiniso leli ngoMsindisi wethu uJesu Kristu. Siyakholwa ukuthi wawuvele ukhona kusukela nini lanini, lokuthi uzakuba khona kuze kube laphakade. Ubukhosi bakho kabulamkhawulo, amandla akho lokuhlakanipha kwakho akulamkhawulo, izenzo zakho lendlela zakho zonke zingcwele; umusa wakho lokusithanda kwakho akupheli. Sibuse, Nkosi, ubuse ingqondo zethu lentando zethu. Busa konke okusezulwini lokusemhlabeni lokusezindaweni zonke, ngoba uyiNkosi yakho konke. Amen.

	Izifundo ezingabalwa: Isa 3,1-3; 2 Kor 13,11-13; Mat 28,16-20. Amabizo lezitemo zikaNkulunkulu kukhasi.

	*UNgcwele, uNgcwele, uNgcwele Nkosi...* Kasikhulekeni: Uyabongeka, Nkosi, Nkulunkulu munye ongabazimeli abathathu, uYise, leNdodana loMoya oNgcwele, ngakho konke osenzela khona kanye lezidalwa zakho zonke. Sibongela lezidalwa ezingela milomo lenhliziyo zokukubonga. Sicela ukuthi njengalokhu wena umunye, lathi sibe munye sonke ezimulini zethu, laseBandleni lakho eliKhatholika, lasemazweni onke. Njalo, sicela ukuba uhlale lathi, sibe ngamathempeli akho, umhlaba lo ube yisandulelo sezulu ngokubuswa nguwe langokumanyana kwethu lawe. Amen.

	UMkhosi wesiDlo esiNgcwele
	(Corpus Christi)

	Ingcazelo: EThestamenteni eliDala uNkulunkulu wondla abakolsrayeli ngesinkwa okwakuthiwa yiMANA ohambeni lwabo, besuka eGibithe besiya elizweni laseKanani; (Eks 16; Josh 5,12.) IMANA yayifanekisa ISINKWA SOKUPHILA seThestamente eliTsha, eyayizamiswa nguJesu Kristu; (1 Kor 10,3; Joha 6,25-58.) ISidlo esiNgcwele singuMzimba, leGazi loqobo lukaJesu Kristu ofuna ukuhlala phakathi kwethu, asiphe amandla okufika ezulwini; (Joha 6,35.54.58; Joha 15,1-8.) Ngakho-ke, umkhosi lo kawusiwokudumisa uMzimba leGazi nje likaJesu, ngowokudumisa Yena uJesu uqobo, okulesiSidlo esiNgcwele. Ukwenza udwendwe obala sihamba sihlabela, yikuvuma obala lokutshengisa ukholo lwethu ebantwini ukuthi siyakholwa ukuthi uJesu ukhona sibili eSidlweni esiNgcwele, lokutshengisa ukumbonga kwethu.

	Isibusiso ngeSidlo esiNgcwele (Benediction)
	- Ingoma - Umpristi uyangena akhuphe iSidlo esiNgcwele kuThabanakeli, asibeke eAlithareni. - Uyasithunqisela ngempepha - Umkhuleko wokumanyana

	Kasikhulekeni: Nkulunkulu Baba Somandla, Siyakuncenga ukuba uholele abantu bonke eBandleni lakho lona elamiswa nguJesu Kristu. Walikhulekela ukuze abakholwayo labangakholwayo baphendukele kilo babe liBandla linye elilomalusi munye. Ngomusa wakho, vuselela abalenhliziyo ezilukhuni, uphendule bonke asebeduhile ngenxa yobuthakathaka langenxa yezilingo abahlangana lazo. Ubaphe amandla okubambelela okholweni lwakho. Sifundise ukuphila njengabantwabakho sithakazelelane njengabazalwane. Sicela ngoJesu Kristu iNkosi yethu. Amen.

	Mariya Msizi wabakholwayo - sikhulekele. (3x)
	- Ingoma - Impepha

	K. Wabanika isinkwa sasezulwini (Aleluya). B. Esilobumnandi bonke (Aleluya)

	Kasikhulekeni: Nkosi Jesu Kristu, wena owasimisela iSakramente elimangalisayo, ukuba libe yisikhumbuzo sokuhlupheka kwakho, siyakuncenga akwenze ukuba sidumise ngokufaneleyo imfihlakalo ezingcwele zoMzimba leGazi lakho, ukuze siqhubeke sizuza izithelo zosindiso lwakho. Wena ophila ubusa kuze kube laphakade. Amen.

	Emva kwesibusiso:
	Kadunyiswe uNkulunkulu. Kalidunyiswe ibizo lakhe eliNgcwele. Kadunyiswe uJesu Kristu, uNkulunkulu lomuntu uqobo. Kalidunyiswe ibizo likaJesu. Kadunyiswe uJesu eSakramenteni le Alithare eliNgcwele sibili. Kayidunyiswe inhliziyo engcwele sibili kaJesu. Kadunyiswe uMoya oNgcwele, uMsizi. Kahlonitshwe uNina kaNkulunkulu, uMariya oNgcwele sibili. Kakuhlonitshwe ukwemulwa kwakhe okungcwele okungelacala. Kakuhlonitshwe ukwenyuselwa kwakhe ezulwini ngobukhosi. Kalihlonitshwe ibizo likaMariya iVirigo elingumzali. Kahlonitshwe uJosefa oNgcwele, umkakhe olenhliziyo emhlophe sibili. Kadunyiswe uNkulunkulu kuzithunywa kanye lakubangcwele bakhe.

	UMkhosi wenHliziyo eNgcwele kaJesu

	Ingcazelo: Nxa umuntu elomusa sithi: Inhliziyo yakhe inhle. Nxa elolunya sithi inhliziyo yakhe imbi. Ngakho-ke, umuntu uyilokho inhliziyo yakhe eyikho khona. Nxa sidumisa umuntu sidumisa ubuhle benhliziyo yakhe. Nxa sidumisa inhliziyo yomuntu sidumisa yena umuntu uqobo. Ngakho-ke, nxa sidumisa iNhliziyo kaJesu sidumisa Yena uJesu uqobo, sinakana ngakho konke okuhle asenzela khona ngenxa yobuhle benhliziyo yakhe.

	Kasikhulekeni: Nkulunkulu Baba, iNdodana yakho uJesu Kristu, yasithanda ngothando olumangalisayo, yabonakalisa ukuthi iNhliziyo yayo ingumthombo wokulunga lothando. Siyazi ukuthi ukusithanda kwayo, yikusithanda kwakho. Siyabonga ngothando olungaka kithi. Siyacela ukuba usiphe inhliziyo entsha, egcwele uthando, ukhuphe kithi inhliziyo embi, ethanda isono, khona sizafuza iNdodana yakho, yona ephila ibusa kanye lawe ndawonye loMoya oNgcwele, kuze kube laphakade. Amen.

	Izifundo ezingabalwa: Dute 7,6-11; 1 Joha 4,7-16; Mat 11,28-29.

	Umkhuleko wokuzinikela eNhliziyweni eNgcwele kaJesu. Mina... ngiyazinikela eNhliziyweni eNgcwele yeNkosi yethu, uJesu Kristu, nginikela kuyo uqobo lwami, lempilo yami, lemisebenzi yami, lezinsizi zami zonke. Ngizakhuthalela ikakhulu ukuyithanda liNhliziyo eNgcwele, lokuyidumisa kokuphela ngesikhathi esizayo. Ngiyaqinisa ngithi: Ngifuna ukuba ngowayo kokuphela, konke engikwenzayo ngikwenze ngenxa yokuyithanda, ngilahle okungayicunula liNhliziyo eNgcwele. Amen.

	Umkhuleko wokuzinikela kwemuli eNhliziyweni eNgcwele kaJesu. Nhliziyo eNgcwele kaJesu, wena owazisa uMagaretha Mariya Alakhokho ngokuthi wena uthanda ukubusa ezindlini zamakholwa; siyathembisa lamhla, sithi: Nguwe wedwa esifuna ukuba ube yiNkosi ebusa imuli yethu. Sesifuna ukuphila ngawe, ukuze sifumane lawo malungelo owawathembisayo, ukuthi abalawo bazazuza ukuzwana lokuthula beselapha emhlabeni. Sifuna ukukhupha phakathi kwemuli yethu umoya walumhlaba owaqalekiswa nguwe, ukuze sibuswe nguwe wedwa. Thina amalunga alimuli yako...... sibuthene lapha, siguqe ngamadolo phambi kwakho, siyazinikela eNhliziyweni yakho eNgcwele, Nkosi yethu Jesu Kristu, ngalolusuku lomhlaka... (ilanga lenyanga lomnyaka) sizahlukanisela iNhliziyo yakho eNgcwele, thina lomuzi wethu, lakho konke esilakho, lesiyikho khona, omunye lomunye wethu, lemuli yethu yonke. Akuvume, Nkosi, ukuhlala phakathi kwemuli yethu, ube nguMbusi leNkosi yethu, njalo ube nguMbusi welizwe lakithi. Sifuna ukuthi kusukela lamhla sibe ngabakho kokuphela, kuze kube lanini, kungabi loyedwa phakathi kwethu ongesuye wakho, khona sizakuba lawe ezulwini kuze kube nininini. Amen.

	Abantu bangakhuleka iLithani leNhliziyo eNgcwele kaJesu elikukhasi.

	Kasikhulekeni: Nkosi Jesu Kristu, esiphambanweni welula ingalo zakho, ukuze usamukele sonke, sisondele kuwe lasothandweni lwakho. INhliziyo yakho eNgcwele yavulwa ngomhedla ukuze uthando lwayo luthululelwe phezu kwethu, usihlambulule, singene eNhliziyweni yakho, sihlale kuwe, singasuki kuwe lanini. Siyabonga Nkosi ngokusithanda kwakho okungaka. Akwenze ukuba inhliziyo zethu ezilukhuni njengamatshe, zibe buthakathaka njengeYakho, zigcwale uthando lomusa njengeYakho. Sicela kuwe ophila ubusa loNkulunkulu uBaba, loMoya oNgcwele kuze kube laphakade. Amen.

	next page

ISIKHATHI SOKUZILA

B. Uvuselele butsha ubuso bomhlaba.

UNgcwele, uNgcwele, uNgcwele Nkosi...