PRAYER BOOK

“Baba, ezandleni zakho ngibeka umoya wami” (Luka 23,46).

K. Siyakhuleka kuwe Kristu, sikudumisa.

B. Ngoba wasindisa umhlaba ngesiphambano sakho esingcwele.

Kasikhulekeni: O! Jesu othandekayo kakhulu, ngenxa yezithelo zegazi lakho eliligugu, akusiphe umusa wokuba nxa sesiphansi kokufa semukele ngokupheleleyo intando yakho, singadingi lutho, ngaphandle kokwenza intando yakho. Udumo alube...

Ingcazelo: Ukuzibonakalisa kukaJesu kuzazi ezazingamakhosi angesiwo amaJuda, kwakuyisibonakaliso sokuthi uyiNkosi yezizwe zonke, kungesiyamaJuda kuphela. Sifanele ukukhulekela abantu basemhlabeni wonke, ukuba bamukele uJesu njengoMsindisi wabo bonke.

Izifundo ezingathathwa yilezi: Isa 60,1-6; Efe 3,2-3.5-6; Mat 2,1-12.

Kasikhulekeni: Nkulunkulu Baba, siyakubonga ngokubonakalisa iNdodana yakho kithi abezizwe. Siyakubonga ngokusamukela kwakho, ukuba sibe ngabombuso wakho, labantwabakho kanye loJesu. Akusiphe uMoya wakho oNgcwele, ukuba asenze sibe ngabafundi abaqotho bakaKristu, simnike amagugu ethu onke, lempilo yethu yonke, singehlukani laye lanini. Sicela ngaye uKristu iNkosi yethu. Amen.

Umbhabhathizo uligugu ngoba usenza sibe ngabantwana bakaNkulunkulu; (Roma 8,15), wesula zonke izono esazenzayo (Seb 2,38), usenze sibe yizindlalifa zasezulwini; (Roma 8,17). Phezu kwakho konke, usenza sihlupheke loJesu, sife laye, singcwatshwe laye, sivuke laye ekufeni; (Roma 6,3-I1).

Kasikhulekeni: Nkulunkulu Somandla, Simakade, kwathi uMoya oNgcwele esehlela phezu kukaJesu ekubhabhathizweni kwakhe eJordani, wambonakalisa ukuthi uyiNdodana yakhe ethandekayo. Ake wenze ukuba thina abantwabakho abazelwe ngamanzi langoMoya, sihlale sithembekile njengabakhethelwe umsebenzi wakhe. Sicela ngoKristu iNkosi yethu. Amen.

Izifundo ezingabalwa: Roma 6,3-11; Gen 45,14-47; Eks 4,19-23; Eks 13,1-16; Hubo 128; Efe 5,21-6,4.

	Amazwi ayisikhombisa kaJesu esesiphambanweni

	Ilizwi lokuqala:
	“Baba, bathethelele, ngoba kabakwazi abakwenzayo” (Luka 23,34). K. Siyakhuleka kuwe Kristu, sikudumisa. B. Ngoba wasindisa umhlaba ngesiphambano sakho esingcwele. Kasikhulekeni: O! Jesu wami, wena owasifundisa ukuba sithethelele abasonayo, wasipha isibonelo ngokuthethelela abakubethela esiphambanweni, akusiphe amandla akho, ukuze sithethelele, njalo sithande izitha zethu kokuphela ngenxa yakho. Udumo alube...

	ILizwi lesibili:
	“Lamhla uzakuba lami ePharadise” (Luka 23,43). K. Siyakhuleka kuwe Kristu, sikudumisa. B. Ngoba wasindisa umhlaba ngesiphambano sakho esingcwele. Kasikhulekeni: O! Jesu othandekayo, Yeka ubukhulu bomusa lothando lwakho, ngokuxolela isela elabethelwa kanye lawe! Akungixolele lami mina soni, utsho kimi, uthi: “Uzakuba lami ePharadise!”. Udumo alube...

	ILizwi lesithathu:
	“Nanso iNdodana yakho; nango uNyoko” (Joha 19,26-27). K. Siyakhuleka kuwe Kristu, sikudumisa. B. Ngoba wasindisa umhlaba ngesiphambano sakho esingcwele. Kasikhulekeni: Jesu, Nkosi yethu, loMnewethu othandekayo kakhulu; ngicela ukuba unginikele kuMama ukuba ngihlale ezandleni zakhe kokuphela, angivikele ezingozini zomphefumulo. Udumo alube...

	ILizwi lesine:
	“Nkulunkulu wami, Nkulunkulu wami, ungitshiyeleni na?” (Marko 15,34; Mat 27,46). K. Siyakhuleka kuwe Kristu, sikudumisa. B. Ngoba wasindisa umhlaba ngesiphambano sakho esingcwele. Kasikhulekeni: O! Jesu wami, akungisize ukuba ebunzimeni bonke lasezilingweni ezinzima ngikhale kuwe, ngiphephele kuYihlo uMninimandla ngingalahli ithemba, ngoba ijogwe lakho lilula, lomthwalo wakho ulula. Udumo alube...

	ILizwi lesihlanu:
	“Ngomile!” (Joha 19,28). K. Siyakhuleka kuwe Kristu, sikudumisa. B. Ngoba wasindisa umhlaba ngesiphambano sakho esingcwele. Kasikhulekeni: O! Jesu wami, wena owawomele ukusindisa umphefumulo wami, lemiphefumulo yabantu bonke, lowawungathwala inhlupheko enkulu kule yasesiphambanweni ngenxa yami, akungenze ngomele wena ngezibanga zonke, ngingakhohliswa yilutho ngaphandle kwakho. Udumo alube...

	ILizwi lesithupha:
	“Kuphelile!” (John 19,30). K. Siyakhuleka kuwe Kristu, sikudumisa. B. Ngoba wasindisa umhlaba ngesiphambano sakho esingcwele. Kasikhulekeni: O! Jesu wami, wena owawuqhuba kuhle umsebenzi wakho wokusindisa abantu, waze wawuphumelelisa esiphambanweni, wamemeza wathi: “Kuphelile”. Ngisize ukuba ngibeke konke ezandleni zakho. Ngiyakuncenga ukuba usisize sonke thina abakholwa kuwe, ukuba senze intando kaYihlo kokuphela kuze kufike ilanga lokufa kwethu. Bahawukele bonke abaseduze lokufa ukuba bafe kuhle, baye ekuphileni okulaphakade. Udumo alube...

	ILizwi lesikhombisa:
	“Baba, ezandleni zakho ngibeka umoya wami” (Luka 23,46). K. Siyakhuleka kuwe Kristu, sikudumisa. B. Ngoba wasindisa umhlaba ngesiphambano sakho esingcwele. Kasikhulekeni: O! Jesu othandekayo kakhulu, ngenxa yezithelo zegazi lakho eliligugu, akusiphe umusa wokuba nxa sesiphansi kokufa semukele ngokupheleleyo intando yakho, singadingi lutho, ngaphandle kokwenza intando yakho. Udumo alube...

	UMNYAKA WEBANDLA

	Umnyaka weBandla uqalisa ngeSonto lokuqala lokulindela ukuza koMsindisi (Advent), uphele ngeSonto lamatshumi amathathu lane lomnyaka, usuku lukaKristu iNkosi. Lokho akutsho ukuthi iBandla lilowalo umnyaka otshiyene lowomhlaba wonke, kutshiwo ukuhlelwa kwesikhathi lezinkonzo lezifundo, ngendlela ehambelana lokwenzakala empilweni kaKristu, ukuze sicabange ngaye ngokujulileyo. Inkonzo ezilandelayo ezomnyaka weBandla zilungiselwe imuli zamakholwa wonke, ikakhulu lezo ezingenelisanga ukungena iMisa eNgcwele yalelolanga.

	Isikhathi sokulindela ukuza koMsindisi

	Lesisikhathi ngamaviki amane phambi kwelanga lokuzalwa kukaJesu. Phakathi kwawo la amaviki amane, sikhumbula izinto ezintathu mayelana loMsindisi:
	Ukulindelwa kwakhe ngabakolsrayeli (labantu bonke) eThestamenteni eliDala, engakazalwa. Ukufika kwakhe kulumhlaba ngesimo soMuntu, (ukuzalwa kwakhe, esikulindelayo kulamaviki amane). Lokulindelwa kwakhe ngamakholwa (langumhlaba wonke) khathesi engakabuyi ngokokucina, esezothetha amacala abaphilayo labafileyo, ngosuku lokucina.
	Emikhulekweni yethu sifanele ukubonga uNkulunkulu ngokusithumela uMsindisi uJesu Kristu iNdodana yakhe, simbonge laye uJesu ngokusithanda kwakhe kangaka, sicele amandla wokuhlala silindele ukubuya kwakhe ngosuku lokucina.

	Kasikhulekeni: Nkulunkulu, Baba osezulwini, abantu bakho baseThestamenteni eliDala, labokhokho bethu, babelindele ukuza koMsindisi ukuba azobahlenga. Ngomusa langothando lwakho olungelamkhawulo, wamthuma uJesu Kristu iNdodana yakho, weza emhlabeni. Siyakubonga, Baba, ngomusa wakho, langokusithanda kwakho kangaka. Akusiphe umusa wakho, ukuze simlungisele indawo enhle enhliziyweni zethu, singamlahli njengamaJuda. Sicela ngoKristu iNkosi yethu. Amen. Izifundo ezingabalwa: Isa 2,1-5; Roma 13,11-14; Mat 24,37-44.

	Kasikhulekeni: Nkosi, Jesu Kristu, wena oweza lapha emhlabeni ukuzasisindisa, akwenze ukuba ngalesisikhathi esingcwele sokukhumbula ukuza kwakho, sifulathele izono, siphume ebumnyameni esikibo, silangazelele ukuza kokukhanya kwakho, silangathele usuku lokuzalwa kwakho, njengabantu basendulo, sihlale silindele ukufika kwakho ngosuku lokucina. Sicela kuwe ophila ubusa kuze kube laphakade. Amen. Ukuze ikholwa liqedisise ngomnyaka weBandla kuyasweleka ukuthi libe lesiqondiso sezifundo salowo lalowo mnyaka - (Liturgical guide).

	Isikhathi sokuzalwa koMsindisi

	Ingcazelo: UMsindisi wethu uJesu Kristu wazalelwa emzini waseBetlehema, esitebeleni elizweni laseJudiya, kwelasePalestina. Ilanga lokuzalwa kwakhe ligcinwa mhlaka 25 December. Ukubalwa kweminyaka kusukela ekuzalweni kwakhe, sekudlula iminyaka engu 2000 ezelwe. Kasikhulekeni: Nkulunkulu, Mninisihawu lothando, sesilubonile usuku lokuzalwa koMsindisi wethu uJesu Kristu eBetlehema, esitebeleni. Siyathokoza, sikubonga Baba, ngenhlanhla engaka osiphe yona. Siyakuncenga ukuba ubase umlilo wothando phakathi kwethu, ukuze simamukele ngenhliziyo zethu zonke, athole indawo emthabisayo emiphefumulweni yethu. Sicela ngoKristu iNkosi yethu. Amen. O! Jesu, Mntwana othandekayo, wena owathi ngokuhawulwa lusizi lwethu, weza lapha emhlabeni ukuzosisindisa, waba nguMuntu ngamandla kaMoya oNgcwele, sihawukele. Sihawukele, Jesu, yiba lomusa kithi. Baba wethu... Ekuhle Mariya... Udumo alube... Izifundo ezingabalwa: Isa 52,7-10; Heb 1,1-6; Joha 1,1-18.

	Ukuthakazelela umntwana uJesu

	K. Sizwile ingoma yezithunywa zasezulwini, size ukumhubela uMntwana, uJesu. B. Udumo kalube kuNkulunkulu kweliphezulu! Silizwile ilizwi lesithunywa kanye labelusi, kasigijimeni, siye esitebeleni. - Udumo... Sizangena esitebeleni saseBetlehema, simguqele uMntwana ozelweyo. - Udumo... Siyibonile inkanyezi yakhe ivela empumalanga, kasiyilandele, simdinge. - Udumo... Kasihambe lamakhosi, sinikele kanye lawo amagugu ethu onke. - Udumo... Kasimphathe ngezandla, simgone, simange, njengoNina uMariya. - Udumo... Kasihlale laye kokuphela, singehlukani laye, njengoMariya loJosefa abangcwele. - Udumo... Baba wethu... Ekuhle Mariya... Udumo alube...

	Umkhosi weMuli eNgcwele

	Ngalumkhosi sikhulekela izimuli zamakholwa ukuba ziqine. Kasikhulekeni: Nkulunkulu Baba, ufuna ukuba imuli zonke zihlale ngothando langokuzwana okupheleleyo, njengoJosefa, loMariya loJesu eNazaretha. Siyacela, Nkosi ukuba ubusise imuli zethu zonke, zibe lokuthula, lokuzwana lokuhlalisana kuhle. Thela uthando oluqotho enhliziyweni zabazali, lomoya wokulalela ebantwaneni, ukuze imuli zethu zibe yisibonelo esihle kwezabangakholwayo. Xotsha yonke imimoya emibi, efuna ukungena phakathi kwemuli zethu, uhlale wena phakathi kwazo. Sicela ngoKristu iNkosi yethu. Amen. Izifundo ezingabalwa: 1 Sam 1,20-22.24-28; 1 Joha 3,1-2. 2124; Luka 2,1-52.

	Ukubonga lokubabaza uNkulunkulu

	K. Kasibongeni uNkulunkulu ngokudala imuli, langokuyivikela ngemithetho yakhe. Baba olomusa Mninimpilo, siyakubonga sikudumisa ngecebo lakho elimangalisayo, elimayelana labathetheneyo labantwana. Yeka ukumangalisa kwakho, Baba! siyakubonga. B. Siyakubonga, sikudumisa. K. Zinkulu izimangaliso zakho. Wenza imuli yaba ngumthombo, lapho abantwana abazalelwa khona, bakhulele khona, lalapho ukuthandana kukhudumeza ikhaya, kulenze libe yindawo ethandekayo lejabulisayo. Baba, siyakubonga. - Siyakubonga... K. Yeka ubukhulu benhlakanipho yakho, Baba! Usebenzisa umuntu lomkakhe ukuba bakusize emsebenzini wakho wokudala abantu! Baba, siyakubonga. - Siyakubonga... K. Ngobukhulu bothando lwakho emulini zethu, langokuthanda kwakho ukuba imuli zizinze, zibe lokuchelesa, wabeka umthetho wokuthi kungabi lokwehlukana phakathi kwabatshadileyo. Baba, siyakubonga. - Siyakubonga... K. Ngemuli eNgcwele yaseNazaretha, wafuna ukunika imuli zonke isibonelo sokuhlalisana kuhle lokuthandana. Baba, siyakubonga. - Siyakubonga... K. Kasihlanganyeleni lezithunywa labangcwele bonke basezulwini, sithi: *UNgcwele, uNgcwele, uNgcwele, Nkosi Nkulunkulu wamaxuku...*

	Ekupheleni komnyaka lasekuqaleni komnyaka omutsha

	Ingcazelo: Sifanele ukubonga uNkulunkulu ngokusilondoloza kwakhe kulumnyaka saze sabona ukuphela kwawo, langezipho lezibusiso zakhe zonke asiphe zona. Njalo siyamncenga uNkulunkulu, ukuba asilondoloze kuhle ngalumnyaka ozayo (omutsha), asisize ukuba simkhonze ngcono kulakulo umnyaka ophelileyo. Kasikhulekeni: Kasibongeni uNkulunkulu uYise, leNdodana, loMoya oNgcwele. Kasimbongeni, simdumise kuze kube laphakade. Uyabongeka, Nkosi, emkhathini wezulu. Uyababazeka, uyadumiseka, uyaphakamiseka kuze kube laphakade. Nkulunkulu Baba, wena olesihawu esingelinganiswe, lomusa oyikujula okungapheliyo, siyakubonga sikudumisa ngalumkhosi wokuphela komnyaka (womnyaka omutsha). Siyakubonga, ngoba usiphe izipho ezingabalwayo kulumnyaka. Siyakudumisa, ngoba uyiNkosi yethu, unguNkulunkulu wethu loMdali wethu. Siyacela, Baba, ukuba ube lathi kulumnyaka omutsha, usivikele ezingozini zomzimba lezomphefumulo, usiphe umusa wakho, ukuze sikuthande ngokupheleleyo, sikukhonze ngobuqotho, khona sizafika ekhaya lakho lasezulwini. Sicela ngoKristu iNkosi yethu. Amen. Izifundo ezingafundwa: (Gen 6,1-8; Roma 6,1-14; Marko 10,28-31) Kungakhulekwa umkhuleko wokubonga lokudumisa uNkulunkulu A, B, C, D oba iLithani lezitemo zikaNkulunkulu.

	Umkhosi wokuzibonakalisa kukaJesu
	Epiphany

	Ingcazelo: Ukuzibonakalisa kukaJesu kuzazi ezazingamakhosi angesiwo amaJuda, kwakuyisibonakaliso sokuthi uyiNkosi yezizwe zonke, kungesiyamaJuda kuphela. Sifanele ukukhulekela abantu basemhlabeni wonke, ukuba bamukele uJesu njengoMsindisi wabo bonke. Izifundo ezingathathwa yilezi: Isa 60,1-6; Efe 3,2-3.5-6; Mat 2,1-12. Kasikhulekeni: Nkulunkulu Baba, siyakubonga ngokubonakalisa iNdodana yakho kithi abezizwe. Siyakubonga ngokusamukela kwakho, ukuba sibe ngabombuso wakho, labantwabakho kanye loJesu. Akusiphe uMoya wakho oNgcwele, ukuba asenze sibe ngabafundi abaqotho bakaKristu, simnike amagugu ethu onke, lempilo yethu yonke, singehlukani laye lanini. Sicela ngaye uKristu iNkosi yethu. Amen.

	Umkhosi wokubhabhathizwa kukaJesu

	Umbhabhathizo uligugu ngoba usenza sibe ngabantwana bakaNkulunkulu; (Roma 8,15), wesula zonke izono esazenzayo (Seb 2,38), usenze sibe yizindlalifa zasezulwini; (Roma 8,17). Phezu kwakho konke, usenza sihlupheke loJesu, sife laye, singcwatshwe laye, sivuke laye ekufeni; (Roma 6,3-I1). Kasikhulekeni: Nkulunkulu Somandla, Simakade, kwathi uMoya oNgcwele esehlela phezu kukaJesu ekubhabhathizweni kwakhe eJordani, wambonakalisa ukuthi uyiNdodana yakhe ethandekayo. Ake wenze ukuba thina abantwabakho abazelwe ngamanzi langoMoya, sihlale sithembekile njengabakhethelwe umsebenzi wakhe. Sicela ngoKristu iNkosi yethu. Amen. Izifundo ezingabalwa: Roma 6,3-11; Gen 45,14-47; Eks 4,19-23; Eks 13,1-16; Hubo 128; Efe 5,21-6,4.

	next page

“Baba, bathethelele, ngoba kabakwazi abakwenzayo” (Luka 23,34).

K. Siyakhuleka kuwe Kristu, sikudumisa.