Ingoma:

Nangu Nina ebuhlungu,

emi esiphambanweni,

K. Siyakhuleka kuwe Kristu, sikudumisa.

B. Ngoba wasindisa umhlaba ngesiphambano sakho esingcwele.

Isifundo: Marko 15,1-15.

K. Abapristi abakhulu labadala lomphakathi wonke, benza icebo, bambopha uJesu, bamtshaya, bamqhuba, bamnikela kuPhilathu. UPhilathu wambuza wathi: “Wena uyinkosi yamaJuda na?” UJesu wathi kuye: “Kutsho wena.” UPhilathu wathanda ukumkhulula ngoba engelacala. Kodwa ngenxa yokwesaba ixuku wamnikela ukuba abethelwe.

(Thula ucabange)

Kasikhulekeni: O! Jesu wami, wena owathula ulahlwa ungelacala, wabekezela, kawaze waphendula lelilodwa ilizwi; akungiphe inhliziyo efana leyakho, ukuze lami ngithule, ngibekezele lapho abantu benginyeya, bengithuka, lalapho bekhuluma izinto ezimbi ngami.

K. O! Jesu obethelweyo.

B. Sihawukele.

Ingoma:

Esakhala, O! kwangathi,

uhlatshiwe ngesihedla,

K. Siyakhuleka kuwe Kristu, sikudumisa.

B. Ngoba wasindisa umhlaba ngesiphambano sakho esingcwele.

K. “Bamthathake uJesu, waphuma ethwele isiphambano sakhe, waya endaweni ethiwa yiNdawo yokhakhayi, ngesiHeberu, iGolgotha;

(Joha 19,17). (Thula ucabange)

Kasikhulekeni: O! Jesu wami, wena owavuma intando kaYihlo wasezulwini, wathwala isiphambano esisindayo kakhulu, walalela kwaze kwaba sekufeni esiphambanweni. Akungiphe amandla okuba lami ngibekezelele ukuthwala isiphambano sokholo, ngigcine imilayo yakho, ngilalele imfundiso yeBandla, ngenze intando yakho kokuphela.

K. O! Jesu obethelweyo.

B. Sihawukele.

Ingoma:

O! ngosizi lobuhlungu,

abuzwayo uMariya,

K. Siyakhuleka kuwe Kristu, sikudumisa.

B. Ngoba wasindisa umhlaba ngesiphambano sakho esingcwele.

K. Wasesuka uJesu wahamba ethwele isiphambano eqonda eKhalivari. Umzimba wakhe wawusubuthakathaka kakhulu, ngoba wayewophe igazi elinengi. Ngenxa yalokhoke, waphelelwa ngamandla, wawa phansi, isiphambano sawela phezu kwakhe, sabuya sathunuka amanxeba akhe, aphuma igazi futhi ngamandla.

(Thula, ucabange).

Kasikhulekeni: O! Jesu wami, lanxa wawusizwa ubuhlungu obukhulu ngokuwa kwakho usindwa yisiphambano, wawuvuka, uqhubekele phambili, ngenxa yothando lwakho olukhulu kithi. Akungiphe lami uthando olukhulu, oluqotho, ukuba ngikuthande phezu kwezinto zonke, ngingavumi ukuba ngehlukaniswe yilutho lawe.

K. O! Jesu obethelweyo.

B. Sihawukele.

Ingoma:

Wema khona,

elusizi, ekhalela iNdodana,

K. Siyakhuleka kuwe Kristu, sikudumisa.

B. Ngoba wasindisa umhlaba ngesiphambano sakho esingcwele.

K. UJesu ethwele isiphambano sakhe wahlangana loNina endleleni. Inhliziyo kaNina yagwazwa ngumhedla wobuhlungu. Laye uJesu wadabuka kakhulu ebona uNina elusizi;

(Luka 2,35). (Thula, ucabange).

Kasikhulekeni: Nkosi Jesu Kristu, abafundi bakho bakubalekela, kodwa uNyoko wakulandela elusizi, engesabi. Lathi nxa sisebunzimeni, sekungathi sesideliwe yibo bonke, uNyoko uMariya, nguMama wethu sonke, uhlala lathi esiduduza, esisiza, nxa simcela. Sisize ukuba simlingise, singakutshiyi loba sekunjani, sibaduduze kokuphela abahluphekayo.

K. O! Jesu obethelweyo.

B. Sihawukele.

Ingoma:

Kambe kungabe ekhona,

ongambon’uNina lowo,

K. Siyakhuleka kuwe Kristu, sikudumisa.

B. Ngoba wasindisa umhlaba ngesiphambano sakho esingcwele.

K. Njengoba uJesu wayebuthakathaka, ehamba esiwa, kwaba sobala ukuthi umthwalo wawumsinda. Amabutho abamba ngamandla umuntu othiwa nguSimoni waseKureni, owayedlula evela egangeni, ukuba athwale isiphambano sakhe;

(Marko 15,21). (Thula, ucabange).

Kasikhulekeni: O! Jesu wami, inhliziyo yakho igcwele isihawu lothando, ngakhoke wemukela usizi lolo olwesabekayo, lokuhlutshwa ngesihluku esikhulu, ukuze usizuzele ukuthokoza okulaphakade. Siyakubonga ngokusithanda kwakho kangaka, Nkosi. Akuvume ukuba lathi sikuphumuze, njengoSimoni emthwalweni wakho onzima, ngokukusebenzela ngenhliziyo yonke, langokusiza omakhelwane.

K. O! Jesu obethelweyo.

B. Sihawukele.

Ingoma:

O! ngubani ongahawulwa,

nguMariya elusizi,

K. Siyakhuleka kuwe Kristu, sikudumisa.

B. Ngoba wasindisa umhlaba ngesiphambano sakho esingcwele.

K. Ubuso bukaJesu sebugcwele igazi, lezithukuthuku, lamathe amaJuda ayemkhafulela ngawo, owesifazana othiwa nguVeronika, wasondela kuJesu engesabi amabutho ayemqhuba, wesula ubuso ngeqhiye, kwasalela umfanekiso wobuso bukaJesu eqhiyeni.

(Thula, ucabange)

Kasikhulekeni: O! Jesu wami, sengibona ukuthi lami ngangcolisa ubuso bakho, lapho ngangithuka abanye, ngibanyeya, ngibulala amabizo abo ngokukhuluma kubi ngabo, ngoba lokho engangikwenza kibo, ngangikwenza kuwe. Akungisize ngamandla akho, ukuba ngibuyisele amabizo abo amahle engawabulalayo, ngilungise wonke, umonakalo engawenzayo ngokukhuluma.

K. O! Jesu obethelweyo.

B. Sihawukele.

Ingoma:

UMntanakhe amthandayo,

owambona ebulawa,

K. Siyakhuleka kuwe Kristu, sikudumisa.

B. Ngoba wasindisa umhlaba ngesiphambano sakho esingcwele.

K. Umthwalo wezono zethu zonke ayewuthwele, lobuhlungu bokutshiywa ngabafundi bakhe, lokuhlekwa, lokuklolodelwa ngamaxuku, kanye lobuhlungu bomzimba, konke lokhu kwamenza waphelelwa ngamandla uJesu, wabuya wawa phansi ngokwesibili, walimala kakhulu;

(Isaya 53,4-6). (Thula, ucabange).

Kasikhulekeni: O! Jesu wami, yisono sami engisiphindaphinda kanengi, esabangela ukuba uwe futhi usindwa yisiphambano. Akunginike amandla okusehlula leso sono, ngixwaye izingozi zaso, ngingaphindi ngisenze futhi.

K. O! Jesu obethelweyo.

B. Sihawukele.

Ingoma:

Wayibona iNdodana,

idanile, ilayela,

K. Siyakhuleka kuwe Kristu, sikudumisa.

B. Ngoba wasindisa umhlaba ngesiphambano sakho esingcwele.

K. Ethwele isiphambano sakhe uJesu, walandelwa lixuku elikhulu labantu; kwakukhona labesifazana ababemkhalela, bemlilela. Kodwa uJesu ephendukela kibo wathi: “Madodakazi aseJerusalema, lingangikhaleli mina, kodwa zikhaleleni lina labantwana benu”

(Luka 23,27-28). (Thula, ucabange)

Kasikhulekeni: O! Jesu wami, akwenze ukuba ngingakhali ngenxa yobuhlungu bomzimba lenhlupheko zalumhlaba, kodwa ngikhale ngenxa yezono zami, ngazo, ngoba yizo eziyisisusa sokuhlupheka lokufa kwakho, yizo futhi ezingangitshonisa emlilweni ongapheliyo wasesihogweni.

K. O! Jesu obethelweyo.

B. Sihawukele.

Ingoma:

Nina mthombo wokuthanda,

akungicelel’uthando,

K. Siyakhuleka kuwe Kristu, sikudumisa.

B. Ngoba wasindisa umhlaba ngesiphambano sakho esingcwele.

K. Wathi esesondele endaweni yokubethelwa, uJesu wabuya wawa phansi ngokwesithathu, walimala okwesabekayo. Amabutho eza, amvusa ngolunya, emsunduzela phambili.

(Thula, ucabange).

Kasikhulekeni: O! Jesu wami, kwenziwa yini ukuba uphinde njalo ukuwa phansi kabuhlungu usindwa yisiphambano na? Kwenziwa yizingozi zokona engingazixwayiyo, engibuyela kuzo kanengi, zingiwisela ezonweni ngezikhathi zonke. Akungiphe lamhla inhliziyo ezimisele ukuthi: Kungcono ukukhupha ilihlo nxa lingonisa, loba ukuquma izandla lezinyawo nxa zingonisa, kulokuba ngikuwisele phansi ngezono zami, ngizingenise esihogweni.

K. O! Jesu obethelweyo.

B. Sihawukele.

Ingoma:

Bas’enhliziyweni yami,

ilangabi lokuthanda,

K. Siyakhuleka kuwe Kristu, sikudumisa.

B. Ngoba wasindisa umhlaba ngesiphambano sakho esingcwele.

K. Wathi uJesu esezabethelwa amabutho amhlubula izigqoko. O! ngobuhlungu abuzwayo uMsindisi wethu bemhlubula izigqoko zakhe ezasezinamathele emanxebeni akhe. Kwasekungani yikuvuselela njalo amanxeba akhe ayebuhlungu kangaka. Wajuluka igazi ngenxa yezono zethu.

(Thula, ucabange).

Kasikhulekeni: O! Jesu wami, akungiphe inhliziyo ezonda ngenzondo enkulu zonke izono ezingangcolisa ubumhlophe benhliziyo, ngizixwaye sibili, ngixwaye lezingozi zazo. Ungavumi ukuba ngingcolise ngesono umzimba wami olithempeli likaMoya oNgcwele, ngiwungcolisa ngesono esingabhubhisa umzimba lomphefumulo wami, singitshonise osizini olungapheliyo.

K. O! Jesu obethelweyo.

B. Sihawukele.

Ingoma:

Mama unamathisele,

amanxeba oMntanakho,

K. Siyakhuleka kuwe Kristu, sikudumisa.

B. Ngoba wasindisa umhlaba ngesiphambano sakho esingcwele.

K. Sebefikile endaweni ethiwa uKhakhayi, bambethela khona kanye labaphangi, omunye ngakwesokunene, omunye ngakwesokhohlo. O! ngobuhlungu abuzwayo uMsindisi wethu, izipikili zibhoboza izandla lenyawo zakhe zizihlanganisa lesiphambano. Kodwa wabekezela ethule, ngoba kuyintando kaYise, langoba engithanda. UJesu wasesithi: “Baba, bathethelele, ngoba kabakwazi abakwenzayo;

(Luka 23,34).” (Thula, ucabange).

Kasikhulekeni: O! Jesu wami, yikungithanda kwakho okwenza ukuba uvume ukubethelwa ngesihluku esiphambanweni. Ngenxa yokungithanda kwakho kangaka, ngiyacela ukuba ubase enhliziyweni yami umlilo omkhulu wokukuthanda, ngikuthande kulakho konke langenhliziyo yami yonke, ngikuthande ekujabuleni lasekuhluphekeni, ngingavumi ukwahlukaniswa lawe lanini. Jesu, ngiyakuphilela; Jesu ngiyakufela; Jesu ngingowakho khathesi laphakade. Amen.

K. O! Jesu obethelweyo.

B. Sihawukele.

Ingoma:

Yenz’ukuba ngimkhumbule,

owafela mina soni,

K. Siyakhuleka kuwe Kristu, sikudumisa.

B. Ngoba wasindisa umhlaba ngesiphambano sakho esingcwele.

K. Kwakusemini, kwabamnyama elizweni lonke, kwaze kwaba yiAwa yesithathu ntambama, kwafiphala ilanga, lelembu lethempeli ladabuka phakathi. UJesu wamemeza ngelizwi elikhulu esithi: “Baba, ezandleni zakho ngibeka umoya wami”. Esetshilo lokhu, wafa;

(Luka 23,44-46). (Thula, ucabange).

Kasikhulekeni: O! Jesu wami, owathi usesiphambanweni wakhulekela abakubulalayo, wabathethelela usithi: Baba, bathethelele, ngoba kabakwazi abakwenzayo, akungiphe inhliziyo echumileyo, ethethelela masinya abangonayo, lebuyisela ngokuhle okubi engikwenzelwa ngabanye. Ngisize, Nkosi, ukuba lami ngithande izitha zami njengawe.

K. O! Jesu obethelweyo.

B. Sihawukele.

Ingoma:

Akuvume ngime lami,

esiphambanweni lawe,

K. Siyakhuleka kuwe Kristu, sikudumisa.

B. Ngoba wasindisa umhlaba ngesiphambano sakho esingcwele.

K. Kwathi esefile uJesu, wehliswa esiphambanweni, uNina wamphatha ngengalo zakhe engakafakwa elibeni. O! ngobuhlungu abuzwayo uMariya, esemphethe uMntanakhe oyedwa ayemthanda, esebona ukuthi usefile ngempela.

(Thula, ucabange).

Kasikhulekeni: O! Jesu wami, wena owavuma ukuba uMzali wakho oNgcwele uMariya, aluzwe usizi olukhulu kangaka ekuhluphekeni lasekufeni kwakho, kodwa emukele intando kaYihlo, akungisize ukuba lami ngemukele kokuphela intando kaNkulunkulu uBaba, ngisazi ukuthi uNkulunkulu umthumela izijeziso lenhlupheko emhlabeni lowo amthandayo, ukuze amuphe ukujabula okungapheliyo ezulwini.

K. O! Jesu obethelweyo.

B. Sihawukele.

Ingoma:

Ekuhluphekeni kwami,

kangibekezele lami,

K. Siyakhuleka kuwe Kristu, sikudumisa.

B. Ngoba wasindisa umhlaba ngesiphambano sakho esingcwele.

K. Kwakukhona umuntu othiwa nguJosefa, owayelilunga lomphakathi, eyindoda elungileyo. Wayengowomuzi wamaJuda othiwa yiArimathiya. Wasuka waya kuPhilathu, wacela isidumbu sikaJesu. Kweza loNikodima laye, owake wafika kuye kuqala ebusuku, basithatha isidumbu sikaJesu, basigoqela ngamalembu, basibeka elibeni elaligujiwe edwaleni, kungazange kubekwe muntu kulo;

(Luka 23,50-54; Joha 19,39). (Thula, ucabange).

Kasikhulekeni: O! Jesu wami, wena owathanda ukuzwa usizi lokufa, ukuze uhlawulele izono zethu, usiqinise ekuhluphekeni lasekufeni kwethu, akwenze ukuba ngihlale ngikhumbula ukufa kwakho okubuhlungu, ngikhumbule lokufa kwami, ngilungisele usuku lokucina, khona ngizavukela ukuphila okulaphakade.

K. O! Jesu obethelweyo.

B. Sihawukele.

Ingoma:

Yenz’ukuba ngisithande,

isihlahla soMntanakho,

K. Siyakhuleka kuwe Kristu, sikudumisa.

B. Ngoba wasindisa umhlaba ngesiphambano sakho esingcwele.

K. Isithunywa sathi: “Lifunelani ophilayo kwabafileyo na? Akekho lapha, usevukile” (Luka 24,5-6). Okwenzakalayo mhlalokho, singeke sakuqedisisa. UMninimandla wonke, esimazi enguBaba wethu useyihlengile iNdodana yakhe emandleni okufa, wayiphakamisela esandleni sakhe sokunene. UJesu uyaphila! Ukuhlupheka kobuhlungu bakhe kwakungeke kwaba lize. Nguye owaqala ukuvuka ekufeni, ulizibulo lesizwe esitsha. Ngakhoke, ithemba lethu lonke likuKristu ovukileyo yena othi: “Mina ngiyikuvuka lokuphila; okholwa kimi, loba esefile, uzakuphila. Lalowo ophilayo, ekholwa kimi, kasayikufa lanininini” (Joha 11,25-26).

Kasikhulekeni: O! Jesu wami ovukileyo, wasisindisa ngokufa langokuvuka kwakho, wasilethela impilo engapheliyo. Siyakubonga. Ngamandla okuvuka kwakho, siqinise okholweni, simelane lenhlupheko, sinqobe izilingo lesono, silandele wena kokuphela, size singene kanye lawe ebukhosini obungapheliyo. Sicela kuwe wena ophila ubusa kuze kube laphakade. Amen.

K. O! Jesu obethelweyo.

B. Sihawukele.

Ingoma:

Mhla kutshon umzimba wami,

akuse umoya wami,