PRAYER BOOK

Umkhuleko wokucela ukuba ukholo lwande emhlabeni

Nkosi Jesu Kristu, wena owathi: “Hambani lenze izizwe zonke zibe ngabafundi.” Siyakuncenga Nkosi, ukuba uthele uMoya wakho oNgcwele enhliziyweni zabalandeli bakho bonke, ukuze batshisekele ukusindiswa kwabantu bonke. Yenza ukuba omunye lomunye wethu abone ukuthi ulesibopho sokuphendula abangakholwayo, lokuvusa abawileyo, lokubuyisa abalahlekileyo. Nika iBandla lakho ababhishopi labapristi abanengi abalungileyo, lezidelamhlaba ezikhutheleyo abazaqinisa amakholwa akho ngemfundiso langesibonelo esihle. Basa umlilo wothando ezinhliziyweni zamakholwa wonke, ukuze atshisekele ukholo lwawo, leVangeli lakho, abe lokulunga, lokwenza imisebenzi emihle, khona ezakuba yikukhanya komhlaba, adonsele abangakholwayo kuwe lasekuphileni okulaphakade. Sicela ngoKristu iNkosi yethu. Amen.

Ukukhulekela ukuba amakholwa wonke abe ngofakazi beVangeli

Msindisi wethu, Jesu Kristu, Mesiya womhlaba, sicela iPhentekoste entsha! Sicela isivunguzane esitsha, lomlilo omutsha eBandleni lakho, ukuze bonke abalandeli bakho babe litswayi lomhlaba, babe yikukhanya kwawo, babe yimvubelo kubantu bonke. Ngamandla akho langoMoya oNgcwele kungenzeka lokhu, Nkosi. Sicela ngoKristu iNkosi yethu. Amen.

Umkhuleko wabafundela uMbhabhathizo

Nkulunkulu Somandla Simakade, akungikhangele ngomusa, mina ebengisemnyameni, ungihole ekukhanyeni kwakho. Vula ingqondo yami, ukuba ngizwisise izifundo engizifundiswayo, ukholo lwami luzike. Akungithumele uMoya oNgcwele, angisize, angikhanyisele, ngikholwe zonke imfihlakalo zokholo ngingathandabuzi. Ngicela amandla, lothando, lokutshiseka, lokungadinwa ekukukhonzeni, khona ngizakuba likholwa eliqotho. Ngicela ngoKristu iNkosi yethu. Amen.

Ukukhulekela ubunye beBandla

Nkosi Jesu Kristu, wena owakhulekela bonke abakholwa kuwe wathi: Baba ngicela ukuba bonke babe munye, njengalokhu wena ukimi, lami ngikuwe, ukuze umhlaba ukholwe ukuthi nguwe ongithumileyo; njalo wathi ufisa ukuba abalandeli bakho babe mhlambi munye ngaphansi komalusi munye, siyacela ukuba wenze amakholwa onke abe lokholo lunye, lesibaya sinye lomalusi munye. Yehlisela uMoya oNgcwele phezu kwabo bonke abakholwayo, ukuze bazithobe, bathandane, babe nguMzimba wakho obambeneyo. Sicela kuwe ophila ubusa loYihlo loMoya oNgcwele, kuze kube laphakade. Amen.

Umkhuleko wokucela izibizelo

Nkulunkulu, siyakuncenga, akubusise ilizwe lakithi, ngokulinika abapristi, lamabrada, lamasista amanengi alungileyo, abazakuthanda ngokupheleleyo, bathokozele ukunikela impilo yabo yonke ekukusebenzeleni phakathi kweBandla lakho, ukuze abantu bakwazi, bakuthande, basindiswe. Ake ubusise imuli zethu, ukhethe phakathi kwazo abafana lamantombazana abafanele ukuba semsebenzini wakho wokusindisa abantu. Sicela ngoKristu iNkosi yethu. Amen.

Umkhuleko wemuli

Nkosi Jesu Kristu, nguwe uMninizinto zonke, nguwe njalo lombusi wethu sonke. Konke esilakho kuvela kuwe. Uthando esithandana ngalo emulini yethu, luvela kuwe ngoba nguwe owaqala ukusithanda. Amasimu kanye lezifuyo zethu lezithelo zazo kuvela kuwe ngoba nguwe owakudalayo konke lokhu. Ekujabuleni lasekuhluphekeni kwethu, siphephela kuwe ngoba nguwe owasizuzela injabulo ngokuhlupheka langokusifela kwakho esiphambanweni. Nga-kho-ke, siyacela ukuthi usigcine ngomusa wakho ukuze sikusebenzele ngokukhuthala okukhulu insuku ngensuku, sikudumise. Siyakunxusa Nkosi Jesu Kristu ukuba uhlale phakathi kwemuli yethu kokuphela usivikele ezingozini zokomoya lezomzimba. Akwenze kube lokuthula, lokuzwana, lokuxolelana phakathi kwethu size sifinyelele sonke siyimuli nye ekhaya lasezulwini. Sicela ngoJesu Kristu iNkosi yethu. Amen.

Umkhuleko womfana ozizwa ekhwabitha ukuba ngumpristi loba yisidelamhlaba

Nkosi Jesu Kristu, nxa kunguwe ongibizayo ukuba ngibe ngumpristi (isidelamhlaba) kayenziwe intando yakho. Ngicela ukuba unginike inhliziyo ezinikelayo lengathandabuziyo ukulandela intando yakho. Nginika umoya wokuthanda ukuphilela wena leBandla lakho eliNgcwele, lokusiza imiphefumulo ukuba isindiswe. Qinisa inhliziyo yami ekulingweni, unqande umzimba wami enkanukweni ezimbi, ungigcwalise ngoMoya oNgcwele owamnika abaPhostoli labafundi bakho. Ngizibeka ezandleni zakho ukuba wenze okufunayo ngami. Amen.

Umkhuleko wenkazana ezizwa ikhwabitha ukuba yisidelamhlaba

Nkosi Jesu Kristu, Malusi olungileyo ngiyakubonga, nxa kunguwe ongibizayo ukuba ngibe ngumlobokazi wakho. Ngifisa ukukuthanda ngenhliziyo yami yonke, langomoya wami wonke, ngoba nguwe wedwa ongu-Myeni wami. Ake ungiphefumulele uMoya wakho oNgcwele lothando lwakho, ngihlale kuwe kokuphela, lawe uhlale kimi. Nxa ngiphumelele ukuba yisidelamhlaba, ngicela ukuba ungenze ngibe ngcwele, ngiphe isibonelo esihle ebantwini bonke ngize ngife. Amen.

Ukukhulekela amakholwa ahlutshwayo

Nkulunkulu Baba, Mninisihawu, uyavuma ukuba iBandla lithwale inhlupheko lobuhlungu lamanxeba eNdodana yakho, uJesu Kristu. Qinisa abazalwane bethu abahlutshelwa ukholo, ubanike isibindi sokuthwala isiphambano sabo ngokubekezela njengoJesu Kristu. Woba labo kokuphela, ungavumi ukuba behlukane lawe ngenxa yenhlupheko zabo. Sicela ngoKristu iNkosi yethu. Amen.

Ukukhulekela ukuthula emhlabeni

Nkosi Jesu Kristu, wena owathi mhla uzalwa izithu- nywa zahlabela zisithi: “Udumo kalube kuNkulunkulu kweliphezulu, lokuthula emhlabeni ebantwini bakhe.” Watshela abafundi bakho ungakenyukeli ezulwini, wathi ubatshiyela ukuthula kwakho. Siyakuncenga ukuba wenze kube lokuthula emhlabeni wonke, ika- khulu elizweni lakithi, ukuze umbuso wakho uqhube- kele phambili. UIsaya umprofethi ekhuluma ngawe wathi uzakuba nguMeluleki omangalisayo leNkosi yokuthula; (Isa 9,6). Wathi nxa umbuso usufikile impisi izahlala lewundlu, ingwe ilale lezinyane, ithole lidle ndawonye lesilwane; (Isa 11, 6). Sicela ukuba kube lokuzwana lokuxolelana lokuthandana phakathi kwa- bantu bakithi lasemhlabeni wonke. Sicela ngaye uKristu iNkosi yethu. Amen.

Umkhuleko phambi komhlangano (1)

Woza Moya oNgcwele, ugcwalise inhliziyo zamakholwa akho, ubase kizo umlilo wothando lwakho.

K. Ake uthume uMoya wakho, khona kuzakuba lemvuselelo.

B. Uvuselele butsha ubuso bomhlaba.

Kasikhulekeni: Nkulunkulu, wena ofundisa inhliziyo zabakholwayo ngokukhanyisa kukaMoya oNgcwele, akwenze ukuba ngaye lowo Moya oNgcwele sihlaka niphele kokuphela okulungileyo, sithokoze, sithatshiswe nguye. Sicela ngoKristu iNkosi yethu. Amen.

Umkhuleko phambi komhlangano (2)

Moya oNgcwele, siphefumulele, ukuze siqhube kuhle umhlangano wethu. Moya oNgcwele, sengamele, ukhanyisele inhliziyo zethu, uqondise izimiso zethu. Moya oNgcwele, seluleke, ukuze konke esizakubumba kulumhlangano kwandise udumo lukaNkulunkulu. Amen.

Umkhuleko emva komhlangano

Nkulunkulu Baba, siyakubonga ngosizo osiphe lona kulumhlangano. Sisize ukuba sikhumbule ukusikhokhela kwakho lezimiso esizenzileyo, sizifezele udumo lwakho. Sikhanyisele kulokho okungabe kungaphelanga, ukuze sikuqede ngesikhathi esizayo. Sicela ngoKristu iNkosi yethu. Amen.

Umkhuleko wokunikela umntwana ecaweni

Nkulunkulu Baba Somandla, siyakubonga ngesipho sosane lolu owasipha sona. Nguwe Baba owamdalayo ngoba umthanda. Ekudaleni kwakho umuntu, wakubona kungafanele ukuba ahlale yedwa, kodwa abe labanye abazancedisana laye empilweni. Lamhla sesiletha umntanethu u... eBandleni njengesibonelo esasifundiswa yiMuli eNgcwele kaJosefa loMariya abaletha iNdodana yakho uJesu, bayinikela kuwe eThempelini. Bayihlanganisa leBandla lakho, isizwe esikhethiweyo, esasimelwe zinceku zakho, uAnna loSimiyoni. Siyacela Baba ukuba uyibusise lingane, oyihlanganisa leBandla lakho lamhla, yenze ikhule isesandleni sakho. Akuyivikele ezingozini zonke ezingayehlela. Phana iBandla lakho labazali balo umntwana, indlela yokuyiphathisa lingane ukuba ikhule ihamba ngendlela esayitshengiswa yiNkosi yethu uJesu Kristu. Sicela lokhu ngaye uJesu Kristu iNkosi yethu. Amen.

Ukukhulekela izwekazi laseAfrika

Nkulunkulu Baba, iNdodana yakho yathi izingelwa nguHerodi yaphephela eAfrika, elizweni laseGibithe. Kwathi lapho ithwele isiphambano sayo, isiyasindisa umhlaba wonke entabeni yaseKhalivari, yathwalelwa isiphambano sayo nguSimoni waseKureni oweAfrika. Siyakubonga, Baba, ngesipho sokholo owasipha ilizwe lethu leAfrika. Siyakubonga, ngezibusiso lamathamsanqa onke owawanika iAfrika, ikakhulu ubuKristu lokuzibusa kwamazwe aseAfrika. Sithemba ukuthi ngosizo lwakho inhlupho eziqondane leAfrika izimpi, indlala, ubuyanga, umkhuhlane, ukungazi, kuphele, abantu balelizwekazi bathande ukholo lobuKristu, babe lentuthuko lengqubekela phambili enganciphiyo, babe lempilo lenjabulo efanele ubuntu obugcweleyo, ekhomba ukuthi bangabantwabakho abahlengwa nguJesu Kristu iNdodana yakho, lokuthi wakhile phakathi kwabo, bangamathempeli kaMoya wakho oNgcwele.

Siyakuncenga, Nkosi ukuba: Uthele uMoya wakho oNgcwele kwabatsha baseAfrika, ukuba bazinikele kuwe, basebenzele ukwanda kokholo.

Thela uMoya wakho oNgcwele kumakholwa onke aseAfrika, ukuba aqedisise isibizelo sawo sokuphendula abangakholwayo, labalahlekileyo, lamakholwa awileyo, ukuze bonke bazinikele kuKristu laseBandleni lakhe.

Thela uMoya wakho oNgcwele kubazali baseAfrika, ukuba baphe abantwababo isibonelo esihle ngokuziphatha kwabo langothando lwabo, ukuze izizukulwane zakusasa zaseAfrika, zibe yizakhamizi ezikuthabisayo wena Nkosi, lezifanele usindiso lwakho.

Akuthele uMoya wakho oNgcwele kubabhishopi labapristi lezidelamhlaba zeAfrika, ukuba balondoloze izifungo zabo, baqinise amakholwa onke ngesibonelo sabo esihle.

Thela uMoya wakho oNgcwele kibo bonke abangakholwayo baseAfrika, ukuba bemukele iVangeli likaJesu Kristu iNdodana yakho baphume ebumnyameni basindiswe, bangene ekukhanyeni kwenkazimulo yakho ukuze bamanyane bonke ngaphansi kwakho, babe mhlambi munye, lomalusi munye. Amen.

IROSALI ELINGCWELE

Ingcazelo: Ukukhuleka iRosali yikuhamba ngendledlana yempilo kaJesu, kusukela ezindabeni ezithabisayo zokwemulwa kwakhe, sidabule phakathi kwenhlupheko zakhe lokufa kwakhe, senyukele enkazimulweni yokuvuka kwakhe ekufeni, lokwenyukela kwakhe ezulwini, lokwehla koMthokozisi, uMoya oNgcwele, lokukhazimuliswa kukaMariya, uNina woMsindisi wethu. Okuqakathekileyo ekukhulekeni iRosali yikunakana ngemfihlo loba impilo kaJesu, sizihlanganise layo.

Indlela yokukhuleka iRosali

1.		Yenza isibonakaliso sesiphambano, ukhuleke uNgiyakholwa kuNkulunkulu...
2.		Khuleka uBaba wethu... Jesu, yandisa ukholo lwami. Ekuhle Mariya... Jesu, yandisa ithemba lwami. Ekuhle Mariya... Jesu, yandisa uthando lwami. Ekuhle Mariya...
3.		Khuleka uDumo..., ubusukhuleka "O! Jesu wami, akusixolele izono zethu, akusisindise emlilweni wesihogo, akuyise yonke imiphefumulo ezulwini ikakhulu leyo eswela isihawu sakho."
4.		Tshono imfihlo yokuqala... Baba wethu...
5.		Khuleka o-Ekuhle Mariya abalitshumi.
6.		Khuleka uDumo... “O! Jesu wami...”
7.		Tshono imfihlo yesibili... Baba wethu.
8.		Khuleka o-Ekuhle Mariya abalitshumi.

Imfihlo zeRosali elingcwele

A. Indaba zentokozo:

1.		Asikhumbuleni ukubika kwesithunywa kuMariya; (Luka 1,26-38). Baba wethu... Ekuhle Mariya abalitshumi, uDumo... O Jesu wami...
2.		Asikhumbuleni ukwethekela kukaMariya kuElizabethi; (Luka 1,39-56). Baba wethu... Ekuhle Mariya abalitshumi, uDumo... O Jesu wami...
3.		Asikhumbuleni ukuzalwa kukaJesu Kristu eBetlehema, esitebeleni; (Luka 2,1-20).
4.		Asikhumbuleni ukwethulwa kukaJesu kuNkulunkulu ethempelini; (Luka 2,21-40).
5.		Asikhumbuleni ukubonakala kukaJesu ethempelini; (Luka 2,41-52).

B. Indaba zokukhanya

1.		Asikhumbuleni ukubhabhathizwa kukaJesu emfuleni uJordani; (Mat 3,13-17; Marko 1,9-11; Luka 3,21-22).
2.		Asikhumbuleni uJesu ephendula amanzi esiba liwayini emthimbeni waseKana; (Joha 2,1-11).
3.		Asikhumbuleni ukutshumayela kukaJesu ngombuso kaNkulunkulu enxusa abantu ukuba baphenduke; (Mat 4,17; Marko 1,14-15; Luka 4,14-15).
4.		Asikhumbuleni ukukhazimuliswa kukaJesu entabeni ebonakalisa ubukhosi bakhe kubaPhostoli; (Mat 17,1-13; Marko 9,2-13; Luka 9,28-36).
5.		Asikhumbuleni ukuMiswa kweSidlo esiNgcwele njengeSakramente elichaza iMfihlo yePhasika; (Mat 26,17-30; Marko 14,12-26; Luka 22,3-6).

C. Indaba zenhlupheko kaJesu:

1.		Asikhumbuleni ukukhuleka lokuhlupheka kukaJesu ensimini yaseGetsemani; (Mat 26,36-46).
2.		Asikhumbuleni ukutshaywa kukaJesu endlini kaPhonsiyo Philathu; (Mat 27,26-31).
3.		Asikhumbuleni ukufakwa kukaJesu umqhele wameva ekhanda; (Marko 15,16-20).
4.		Asikhumbuleni ukuthwala kukaJesu isiphambano esiya entabeni yaseKhalivari; (Mat 27,27-32).
5.		Asikhumbuleni ukubethelwa kukaJesu esiphambanweni lokufa kwakhe; (Mat 27,35-56).

D. Indaba zobukhosi:

1.		Asikhumbuleni ukuvuka kukaJesu Kristu ekufeni; (Joha 20,1-29).
2.		Asikhumbuleni ukwenyukela kukaJesu Kristu ezulwini; (Luka 24,50-53).
3.		Asikhumbuleni ukwehlela kukaMoya oNgcwele kubaPhostoli; (Seb 2,1-4).
4.		Asikhumbuleni ukwenyuselwa kukaMariya ongcwele ezulwini; (1 Kor 15,20-28).
5.		Asikhumbuleni ukubekwa kukaMariya abe yinkosikazi yezithunywa labangcwele bonke; (Isam 12,1-6)

IRosali lezinsizi eziyisikhombisa zikaMariya oNgcwele.

IRosali le iqaliswa ngendlela ejwayelekileyo. Ilezigaba eziyisikhombisa. Endaweni yokuthandaza oEkuhle Mariya abalitshumi, uzathandaza Ekuhle Mariya abayisikhombisa kuphela.

1.		Usizi uMariya aba lalo ebikelwa nguSimiyoniukuthi inhliziyo yakhe yayizagwazwa ngomhedla; (Luka 2,41-52).
2.		Usizi uMariya aba lalo ebalekela eGibitheleNdodana yakhe, ekuzingelweni kwayo nguHerodi; (Mat 2,13-15).
3.		Usizi uMariya aba lalo edinga iNdodana yakhe eyayilahlekile, wayifumana eJerusalema ngemva kwensuku ezintathu; (Luka 2,41-50).
4.		Usizi uMariya aba lalo elandela iNdodana yakheendleleni yokuya eKhalivari; (Luka 23,27).
5.		Usizi UMariya aba lalo ebona indodana yakheilenga, ifela esiphambanweni; (Joha 19,25-27).
6.		Usizi uMariya aba lalo esamukela isidumbuseNdodana yakhe.
7.		Usizi uMariya aba lalo ebona ukungcwatshwakweNdodana yakhe; (Luka 23,50-56).

IRosali yesihawu sikaNkulunkulu. (Divine Mercy chaplet)

Sikhuleka sisebenzisa iRosali

1.		Baba wethu

2.		Ekuhle Mariya

3.		Ngiyakholwa

4.		Dinga eBhayibhilini isifundo esimayelana lesihawu sikaNkulunkulu, unakane ngaso.

5.		Letha izikhalazo zakho kuNkulunkulu.

6.		Phambi kwaleso laleso sigaba seRosali, khuleka umkhuleko olandelayo: Baba olaphakade, nginikela kuwe uMzimba leGazi, uMoya lobuNkulunkulu, beNdodana yakho ethandekayo kuwe, iNkosi yethu uJesu Kristu. Nginikela kuwe konke lokhu ukuba kube yinhlawulo yezono zethu lezabantu bonke.

7.		Tshono amazwi alandelayo kalitshumi Ngokusihluphekela kwakhe uJesu, woba lesihawu kithi lasebantwini bonke. (10x)

8.		Amazwi wokuphetha liRosali uthi: Nkulunkulu oNgcwele, Nkulunkulu Somandla, Nkulunkulu oNgafiyo. Woba lesihawu kithi, lasebantwini bonke. (3x)