Umkhuleko walowo okholwa ukuthi uledlozi
   
  Bala esinye salezizifundo: (Luka 11,14-22; Luka 10,17-20; Marko 16,15-18).
   
  Nkulunkulu Baba, xotsha kimi konke ukuthandabuza ngawe, lokuthandabuza amandla akho, lokukholwa okulize; ngikholwe kuphela ukuthi nguwe wedwa onguNkulunkulu wami, leNkosi yami, loMbusi wami, loMlondolozi wami, akungenze ngikholwe sibili, ukuthi nguwe wedwa onguMninimandla wonke, lokuthi kasikho isidalwa esilamandla kulawe. Nkulunkulu Ndodana, Nkosi yethu Jesu Kristu, xotsha kimi konke ukuthandabuza ngokholo, lokukholwa amadlozi lobungoma, lobuthakathi, lokutshaya amathambo, leminye imilingo yobumnyama. Usesemhlabeni wawuhamba uxotsha imimoya emibi, ukhulula abangenwe yiyo emandleni kaSathane.

Ngikhulule, uxotshe kimi loba yiwuphi umoya omubi oza kimi uzibiza ngokuthi ulidlozi, ngikholwe kuphela ukuthi abafileyo bonke basezandleni zikaNkulunkulu lasemandleni akhe, lokuthi bangeke benze lutho ngaphandle kukaNkulunkulu. Nkulunkulu Moya oNgcwele, xotsha kimi ithunzi elimnyama lobuqaba, eliletha ukwesaba, lokungathembi ukholo lwesiKristu, lamandla okuvikelwa nguNkulunkulu. Khanyisela ingqondo yami, uvule amehlo ami okomoya, ukuze ngibone iqiniso, ngingakholwa okulize, ngibe likholwa elipheleleyo. Amen.

   
  (Baba wethu... Ekuhle Mariya... Udumo... Kungaba kuhle ukukhuleka iLithani labangcwele bonke elikukhasi)
   
  Ukukhulekela umuntu okholwa ukuthi uledlozi
   
  Nkulunkulu Baba Somandla, wathuma iNdodana yakho ukuba izesihlenga ebugqilini besono lokusinika inkululeko yabantwabakho. Khathesi sikhulekela umzalwane wethu lo okholwa ukuthi uledlozi. Ukhangelane lokulingwa nguSathane. Ngokuhlupheka langokuvuka ekufeni kweNdodana yakho, akumkhuphe emandleni obumnyama. Mqinise ngamandla kaKristu, umeluleke ekuphileni kwakhe. Sicela ngoKristu iNkosi yethu. Amen.
   
  Ukukhulekela ababusi belizwe
   
  Nkulunkulu Baba, wena owanika uDavida inkosi yako-Israyeli isipho sokubusa kuhle abantu bakho, wanika indodana yakhe uSolomoni ukuhlakanipha okumangalisayo, lokuphumelela lokuthula okukhulu ngesikhathi sokubusa kwakhe. Siyakuncenga ukuba usize ababusi belizwe lakithi, ubaphe ukuhlakanipha, lokuqedisisa, lokulunga okuyikho, babuse kuhle abantu bakho, kube lokumanyana lokuthula, lengqubela phambili elizweni lethu. Akubasize banakekele abahluphekayo, labayanga labacindizelweyo ngoba lokhu yikho okuthandwa nguwe, lokuzakwenza iBandla lakho liqhube kuhle umsebenzi walo. Sicela ngoKristu iNkosi yethu. Amen.
   
  Ukukhulekela izifuyo
   
  Nkulunkulu olomusa ongapheliyo, wadala izifuyo ukuba zisisize thina labanye bethu. Siyakubonga. Baba, akubusise izifuyo zethu zonke, uzilondoloze kokuphela, uzivikele emikhuhlaneni lasendlaleni. Siphe inhliziyo yokwabelana labanye izibusiso zakho. Ngebizo likaYise, + leleNdodana, lelikaMoya oNgcwele. Amen.
   
  Ukukhulekela amasimu ukuba athele izithelo
   
  Nkulunkulu Mdali olesinanzo esingelamkhawulo, emva kokudala abantu, wabenzela insimu elenhlobo zonke zezithelo ezinhle, eyayibizwa ngokuthi yiPharadise. Ngiyacela, Baba olungileyo, ukuba ubusise amasimu ami, (ethu) avunde, athele izithelo ezithabisayo, usithumele izulu elaneleyo, ukuze singalambi, khona sizakukhonza sithokozile, sisize labaswelayo. Ngebizo likaYise, + leleNdodana, lelikaMoya oNgcwele. Amen.
   
  Ukukhulekela umuzi
   
  Nkulunkulu Mlondolozi wethu, akubusise umuzi wethu lo, njengalokhu wabusisa umuzi kaAbrahama, loIsaka loJakobe. Uwulondoloze umuzi lo, labo bonke abahlala kuwo, usivikele kizo zonke ingozi zomzimba lomphefumulo. Yenza ukuba sihlale sithandana, silokuthula, sikhonze wena ngenhliziyo zethu zonke. Angathi singalandela isibonelo seMuli eNgcwele yaseNazaretha. Ngebizo likaYise, + leleNdodana, lelikaMoya oNgcwele. Amen.
   
  Ukukhulekela indlu
   
  Nkulunkulu Baba Somandla, siyakuncenga ukuba ubusise indlu le, labo bonke abazayisebenzisa. Akuyivikele kuzo zonke ingozi ezinjengomlilo, lezivunguzane, lemibane lemimoya emibi. Siyacela ukuba wehlisele izibusiso zakho kuyo yonke imisebenzi yethu. Ngakhoke, sibusisele indlu le, ngebizo likaYise, + leleNdodana, lelikaMoya oNgcwele. Amen.
   
  Ukubusisa loba yiluphi ulutho
   
  Nkulunkulu Somandla, ake ubusise i ... (Qamba ibizo laleyonto) ngebizo likaYise, + leleNdodana, lelikaMoya oNgcwele. Amen.
   
  Umkhuleko wabadinga umsebenzi
   
  Nkosi Jesu Kristu, wasebenza nzima eNazaretha, usiza unyoko, uMariya oNgcwele, loJosefa umondli wakho, owayengumbazi. Wena labazali bakho lathola ukudla ngokusebenza. Lami ngidinga umsebenzi ukuze ngithole ukudla lezigqoko, ngisize abangekhaya, labanye abantu bakho abahluphekayo. Akungiphe inhlanhla yokuthola umsebenzi omuhle Nkosi, ukuze ngikukhonze ngenkululeko, langokubonga, langothando olwengezelelweyo. Akungenze ngibe ngothembekileyo emsebenzini wami. Siza labanye bonke abaswela umsebenzi, ubathokozise ngokuwuthola. Wena ophila ubusa loNkulunkulu uBaba, kuze kube laphakade. Amen.
   
  Umkhuleko walabo abalungisela umhloliso
   
  Nkulunkulu Baba, wena ongumthombo wokuhlakanipha konke, wangipha ithuba lokungena esikolo ngaze ngafika kulesisigaba. Ngiyakubonga. Sengicela ngizithoba ukuthi uthumele uMoya oNgcwele akhanyisele ingqondo yami ukuze ngikhumbule konke engakufundiswayo lengakubalayo khona ngizaphumelela emhlolisweni lo engiwulungiselelayo. Baba, ake ulalele isicelo sami lesi njengoba ngilungiselela ikusasa yami kulo umhlaba. Baba, ngicela ungisize ngingethuki njalo ngingesabi ngibhale kuhle umhloliso, ukuze ngiphumelele. Ngicela ngoKristu iNkosi yethu. Amen.
   
  Umkhuleko phambi kokuqalisa uhambo
   
  Siphelekezele Nkosi, kuloluhambo esesizaluqalisa, usiphephise ezingozini zonke ngesithunywa sakho sasezulwini, usithokozise phakathi kohambo lwethu. Yiba ngumthunzi ekutshiseni kwelanga, ube lihawu ezingozini, ube yinduduzo lekukhathaleni, ube lathi emini lasebusuku. Sicela ngoKristu iNkosi yethu. Amen.
   
  Ukukhulekela iBandla eliNgcwele
   
  Nkulunkulu Baba, wathumela iNdodana yakho uJesu ukuthi amanyanise lowo lalowo wethu lawe, lokuthi babambanise abantu bonke babe ngabazalwane, lokuthi ilizwi lakho litshunyayelwe ezizweni zonke, lombuso wakho wande ebantwini. Thumela uMoya wakho oNgcwele aqondise abantu bakho ngokukholwa, ngokuthemba, lothando, bagcine ubungcwele empilweni yabo, bathuthukise iBandla ngaso sonke isikhathi. Sicela ngoKristu iNkosi yethu. Amen.
   
  Ukukhulekela uPhapha wethu
   
  Nkulunkulu Somandla Simakade, ake uhawukele isikhonzi sakho uPhapha wethu u..., umkhokhele ngomusa endleleni eya ekusindisweni okulaphakade. Ngomusa wakho, menze afise kokuphela izinto ezikuthabisayo, azenze ngamandla akhe onke, akhokhele iBandla lakho ngokuhlakanipha langokuphumelela okukhulu. Sicela ngoKristu iNkosi yethu. Amen.
   
  Ukukhulekela umBhishopi wethu
   
  Nkosi Jesu Kristu, Malusi olungileyo wemiphefumulo, akunike umBhishopi wethu u... ukulunga lokuzithoba okuyikho, ukuze aqinise abapristi ngesibonelo langothando lwakhe, abe ngumalusi oqotho wamakholwa akho. Ake uthume uMoya wakho oNgcwele ukuba amsize emsebenzini wakhe, ukuze iBandla likhule, umbuso wakho wande phakathi kwethu. Sicela ngo-Kristu iNkosi yethu. Amen.
   
  Ukukhulekela abapristi bonke
   
  Nkosi Jesu Kristu, nguwe owamisa ubupristi ukuze iBandla lakho lilondolozeke, lande emhlabeni. Akubanqande, bangangeni kulesisikhundla esingcwele abangabizwanga nguwe, ubalungise ngamandla akho labo obabizileyo. Bagcwalise ngolwazi lwemfundiso engcwele, wenze inhliziyo zabo zitshisekele ukulunga, khona bezakuba yikukhanya komhlaba, banike isibonelo esihle kumakholwa, bawaqinise ngamazwi langezenzo, basize imiphefumulo eminengi ukuba iye ezulwini. Sicela kuwe ophila ubusa kuze kube laphakade. Amen.
   
  Ukukhulekela abadikoni
   
  Nkosi Jesu Kristu, busisa uqinise labo abakhonza eAlithareni lakho, baqinise emsebenzini wabo wokubhabhathiza, lokwamukelisa iSidlo esiNgcwele, lokutshadisa, lokungcwaba abafileyo lokubusisa abantu. Sicela kuwe ophila ubusa kuze kube laphakade. Amen.
   
  Ukukhulekela izidelamhlaba
   
  Nkosi Jesu Kristu wena owazidelayo ngenxa yokusithanda kwakho wakhetha ukuba ngumyanga ngenxa yethu, lobumhlophe benhliziyo, lokulalela kwaze kwaba sekufeni. Yenza izidelamhlaba zakho ezilingisela wena zigcine ubungcwele lezifungo zazo ezazenza phambi kweBandla lakho. Thela uMoya oNgcwele ezinhliziyweni zazo, zisebenzele iBandla lakho ngokuthembeka, zibambelele ezibizelweni zazo ukuze umsebenzi kaKristu wokusebenzela abantu uphumelele lapha emhlabeni. Sicela ngoKristu iNkosi yethu. Amen.
   
  Ukukhulekela abafundisa ukholo
   
  Nkulunkulu Baba, Mninimandla onke, akukhangele ngomusa inceku zakho owazibizela emsebenzini wokufundisa iLizwi lakho lokulihlanyela kubantu bakho bonke. Ake ubanike amandla, lokuhlakanipha, lolwazi, lothando emsebenzini wabo. Benze babe ngabantu abalesineke lababekezelela abantu, labazinikeleyo emsebenzini wokusindisa abantu. Ubavikele ezingozini zonke zempilo ezingabalethela inhlupheko zomzimba lezomphefumulo. Sicela ukuba wengezelele impilo yabo, ukuze bakusebenzele ngokukhuthala bengavinjelwa lutho. Ake ubusise imuli zabo ngesibusiso sakho, ukuze izindlu zabo zibe yizindlu zokuthula lokuzwana, ukuze banike abafundelayo isibonelo esihle. Baba olomusa, akusize amaKhathekisti ethu ukuba abe ngabakhokheli abaqotho besizwe sakho labeBandla lakho elingcwele. Emva kokuphila kwabo kwalumhlaba, ubanike umvuzo wokuthokoza okungapheliyo ezulwini. Sicela ngoKristu iNkosi yethu. Amen.
   
  Ukukhulekela abakhokheli beBandla
   
  Jesu, Malusi olungileyo, siyakuncenga ukuba wenze abakhokheli beBandla lethu babe ngabelusi abalungileyo sibili, bazinikele ngokupheleleyo emsebenzini owababizela wona owokukhokhelela abantu bakho ekusindisweni ukuze umbuso wakho wande emhlabeni. Sicela kuwe ophila ubusa kuze kube nininini. Amen.
   
  Umkhuleko womkhokheli
   
  Nkosi Jesu Kristu, wena owathi: “INdodana yomuntu kayizanga ukukhonzwa kodwa ukukhonza.” (Marko 10,45). Njalo walaya abafundi bakho, wathi owokuqala phakathi kwabo kabe njengowokucina kibo, abe yisikhonzi sabo bonke; (Marko 9,36). Akungiphe inhliziyo ethobekileyo, egcwele uthando lenhlonipho kubo bonke engibaphetheyo. Akungiphe ukuhlakanipha, lokudinga ulwazi, ngibe lengqondo ejulileyo, lamacebo aphumelelayo ekukhokheleni kwami abanye, kuthi ukuphumelela konke engizakuba lakho kwandise udumo lwakho, lokusindiswa kwemiphefumulo. Wena ophila ubusa loYihlo, ndawonye loMoya oNgcwele kuze kube nini lanini. Amen.
   
  Nxa iBandla lethu (iPharishi) lisebunzimeni
   
 

Nkosi Jesu Kristu, wathembisa ukuthi uzakuba lathi, usisiza kokuphela. Sisize, Nkosi!

Nkosi Jesu Kristu, wasithembisa uMoya oNgcwele, ake umthumele kithi Nkosi. Sisize, Nkosi!

Nkosi Jesu Kristu, wasiza abafundi bakho sebesengozini yokutshona olwandle. Sisize, Nkosi!

Nkosi Jesu, ake uvuselele iBandla lethu ngokulinika amandla lomoya omutsha. Sisize, Nkosi!

   
 

next page