Umkhuleko womntwana wesikolo
   
  Nkosi Jesu Kristu, wena owamangalisa abafundisi ethempelini uleminyaka elitshumi lambili, ngolwazi lwakho langempendulo zakho; ngiyakuncenga ukuba uvule ingqondo yami, ngiqedisise engikufundiswayo. Ufake uthando enhliziyweni yami, ukuba ngikhuthale ezifundweni zami, ungisize emizameni yami yonke ngenxa yokulunga kwakho lokungithanda kwakho, khona ngizakuba lusizo eBandleni lakho, wena ophila ubusa kuze kube laphakade. Amen.
   
  Ukukhulekela abantwabethu
   
  Nkulunkulu Baba, Mninimandla wonke, akukhangele ngomusa abantwabethu esibabeka ezandleni zakho. Babusise, ubavikele kuzo zonke izingozi zalumhlaba. Vula ingqondo zabo, ukuze babambisise ilizwi lakho eliNgcwele, baqedisise izindaba zokholo, bagxile kokuphela okholweni. Baphe inhliziyo ethobekileyo, lelalelayo, legcwele uthando lomusa. Benze banqande amehlo abo, lendlebe zabo, lenkanuko yomzimba, ukuze babe ngamakholwa apheleleyo. Sisize, thina abazali, ukuba sikhulise kuhle abantwabethu, sibatshengise indlela yokukukhonza lokukuthanda, ngesibonelo sethu, ukuze bonke bafike ezulwini, kungalahleki loyedwa wabo, sikudumise sikanye labo, kuze kube laphakade. Amen.
   
  Umkhuleko womfana loba intombi ethombileyo
   
  Nkulunkulu Baba, Somandla Simakade, ziyamangalisa kangaka izenzo zakho! Kukhulu kangaka ukungithanda kwakho! Sengikhulile! Sengingumuntu! Ngiyawubonga umusa wakho lamandla akho, Baba. Udumo alube kuwe kuze kube nininini. Ngiyacela ukuba ukhulise ingqondo yami lokholo lwami, wandise amandla akho phakathi kwami, ukuze ngibe likholwa eliqinileyo, elililunga eliqotho leBandla lakho, lesakhamuzi esithembekileyo elizweni lakithi. Ngicela ngoKristu iNkosi yethu. Amen.
   
  (Baba wethu... Ekuhle Mariya... Udumo... IHubo)
   
  Umkhuleko wejaha eselithembisene lentombi
   
  Nkulunkulu Baba olomusa wonke, uyangazi kusukela ebuntwaneni bami, uyabazi lobuthakathaka bami. Ngiyacela ukuthi njengoba kunguwe onginike inhlanhla yokuzuza umngane engithembisane laye, usiphe sobabili inhliziyonye, lomoya munye, lothando oluqinileyo loluqotho, ukuze kungangeni lutho phakathi kwethu olungasehlukanisa. Nguwe owathi: “Kakulunganga ukuba umuntu ahlale yedwa, ngizakumenzela onjengaye ukuba amsize.” Wabuya wathi: “Ngenxa yalokhu umuntu uzakutshiya uyise lonina anamathele kumkakhe, labo ababili bazakuba nyamanye.” Ungisize, Nkosi, ukuba ngingamkhohlisi umntanakho lo onginike yena, ngingamngenisi ezilingweni, kodwa ngilandele intando yakho lemilayo yakho size sitshade umtshado omhlophe phambi kwakho. Ngiyamcelela laye ukuba umnike inhliziyo ezinikeleyo lamandla okwehlula izilingo. Ngicela ngoKristu iNkosi yethu. Amen.
   
  Umkhuleko wentombi esithembisene lejaha
   
  Nkulunkulu Baba olomusa wonke, ngiyakubonga ngalumuntu ongiphe yena. Menze abambelele esithembisweni sokutshada lami. Ngithembele kuwe Baba, ukuthi ngamandla akho langomusa wakho, uzamenza afise kuphela intando yakho ezintweni zonke, angadingi intokozo ephambene lawe. Ungisize lami ukuba ngingamfaki phakathi kwezilingo, kodwa abone kimi inhliziyo ezimisele ukuba ngumkakhe oqotho ngendlela yakho. Basa enhliziyweni zethu umlilo wokuthandana ngothando olungaqamukiyo, wenze ukuba uthando lwethu lukhule ngamandla emva komtshado wethu, ngenxa yokukuthanda kwethu, langenxa yebizo lakho elingcwele. Ngiyacela Baba, ukuba ngamandla akho, ulungise umzimba wami, ukuze ube lezithelo ezizathabisa umkami ziqinise uthando lwethu. Ngicela ngoKristu iNkosi yethu. Amen.
   
  Umkhuleko wabasakhulayo wokucela ubumhlophe benhliziyo
   
  Nkulunkulu Somandla olaphakade, wena othanda ukuba sigcine yonke imilayo yakho, ukuze sibe ngabakho, lawe ube nguNkulunkulu wethu, akusiphe thina abasakhulayo, umoya wokulangathela ubumhlophe benhliziyo, sihlale simsulwa emzimbeni lasemoyeni, size sitshade phambi kwakho, (size sithathe izifungo zethu zokuzinikela kuwe) singangcoliswanga yisono. Senze sifuze uMariya loJosefa abangcwele, sibe ngamathempeli ayiwo, kaMoya oNgcwele, sehlule izilingo zonke zikaSathane, lezilethwa ngabantu, lezilethwa yinkanuko yomzimba. Siyazi ukuthi nxa usisiza wena, singehlula izilingo zonke, sikukhonze ngobuqotho, sitshade umtshado omsulwa. Sicela ngoKristu iNkosi yethu. Amen.
   
  Owabatshadileyo, mhla beqalisa ukuhlala ndawonye
   
  Kawudunyiswe, wena Nkulunkulu wabokhokho. Kalidunyiswe ibizo lakho kuze kube nininini. Amazulu kakudumise, lakho konke owakudalayo, kuze kube nininini. Nguwe owadala uAdamu wadala lomkakhe uEva, ukuba abe ngumsizi lomgcini wakhe. Kulaba ababili kwadabuka uhlanga lonke lwabantu. Nguwe owathi: Kakukuhle ukuba umuntu ahlale yedwa. Kasimenzele umsizi ofana laye. Ngakho-ke Baba, kasithathananga ngenxa yenkanuko yenyama nje. Sithathene ngenhliziyo ezizikileyo. Woba lomusa kithi, usihawukele, usiphe uthando lokuhlalisana kuhle size siluphale sindawonye. Sicela inzalo, Baba, ukuze udumo lwakho lukhule kokuphela phakathi kwethu, laphakathi kwemuli yethu. Amen.
   
  (Baba wethu... Ekuhle Mariya... Udumo...)
   
  Umkhuleko wesifazana ozithweleyo
   
  Nkulunkulu Somandla, Simakade, ngiyakubonga ngalesisipho ongiphe sona. Ngiyazi ukuthi ungiphe sona ngenxa yokungithanda kwakho. Ngiyabonga sibili, Baba. Ngicela ukuba lumuntu omdale phakathi kwami alondolozeke ngamandla akho, aphephe ezingozini zonke lasemikhuhlaneni yonke, lakukho konke okungamlimaza. Ngibeka ithemba lami lonke kuwe, ukuthi ngamandla akho angelamkhawulo, ngizakhululeka kuhle. Woba lami lomntanami kokuphela, ungasitshiyi. Ngicela ngoKristu iNkosi yethu. Amen.
   
  Umkhuleko kamama emva kokubeletha
   
  Nkulunkulu Baba, wena olamandla onke, umntwana lo obephakathi kwami wangipha yena njengesipho, wamlondoloza, wamvikela ezingozini zonke, ngaze ngabeletha kuhle. Ngiyakubonga. Sengathi Baba, ungenza ukuba mina lalo umntwana singahlala simanyene kokuphela njengoba kuyimi engizamupha ukudla komzimba. Ngisize ngimfundise impilo yokholo. Yenza ukuba ngimondle kuhle ngibone ukuthi ukhula eqinile. Akumvikele kuzo zonke ingozi lemikhuhlane engamehlela. Ngicela lokhu ngoKristu iNkosi yethu. Amen.
   
  Umkhuleko wesifazana ecela usizo lukaMama uMariya
   
  Mama Mariya, wenelisa ukondla uJesu ngendlela eyathandwa nguNkulunkulu, ngicela ukuba ngikhulise kuhle lumntwana, ngincediswa nguwe ngemikhuleko yakho. Amen.
   
  Umkhuleko wabazali abangelabantwana
   
  Nkosi Nkulunkulu Baba, Somandla, uba uthanda ukuba sithwale isiphambano sethu lesi sokungatholi abantwana, kayenziwe intando yakho. Kodwa nxa usizwela ekuhluphekeni kwethu, Nkosi, akusiphe abantwana, khona sizalidumisa ibizo lakho. Sizabafundisa ngawe, sibakhulise kuhle okholweni, ukuze bakukhonze ngokufaneleyo okwempilo yabo yonke. Siyacela-ke Baba, ukuba intando yakho yenziwe. Sicela ngoKristu iNkosi yethu. Amen.
   
  Owomuntu otshadileyo osephelelwa luthando
   
  Nkosi, ngifundisa indlela yezimiso zakho. Umphefumulo wami uyaphela amandla, ngivuselela ngothando lwakho olungapheliyo, ukuze ngigcine imilayo yakho. Sengiwele phansi nganqotshwa yinhliziyo embi, ngivuselela ngelizwi lakho. Susa kimi indlela zamanga, ungifundise ngomusa umlayo wakho. Phendulela amehlo ami, ukuba angaboni okubi, kodwa kumkami abone okuhle lokuthandekayo okukuye. Kaluze kimi uthando lwakho olungapheliyo, Nkosi, ngingaziletheli isigcono lasezihlotsheni zami. Nkosi, ilizwi lakho limi kuze kube nininini. Ufuna ukuba ukuthathana lokuthandana kwethu kume kokuphela. Ngisize, Nkosi ukuba ngingavumeli inhliziyo embi, kodwa uthando lwami kuwe lakumkami lukhu-le kokuphela. Ngicela ngoKristu iNkosi yethu. Amen.
   
  Nxa umkakho esewile okholweni loba engakholwa
   
  Nkulunkulu Baba, wasihlanganisa ngoMtshado, wafisa ukuba sibe munye, size sehlukaniswe yikufa. Khangela ubunzima esengikibo Baba, ngomkami ongasangisizi mina lemuli yami okholweni lwethu. Ngamandla akho angehlulwa lutho, mvuse, mbuyisele okholweni lasemuseni wakho; akuthande phezu kwezinto zonke, akukhonze ngomoya wonke, aphume emandleni kaSathane. Ngicela ngoKristu iNkosi yethu. Amen.
   
  Umkhuleko wabagcina iJubhili lomtshado
   
  Nkulunkulu Somandla Simakade, nguwe owadala owesilisa lowesifazana, ukuba babe nyamanye, bahlale bethandana emtshadweni wabo. Siyakubonga ngokusisiza kwakho, ukuze siqede iminyaka engu... sihlezi ndawonye. Siyabonga amandla onke (labantwana) lezibusiso zonke okade usipha zona, ukuze sakhe umuzi ozinzileyo. Siyacela ukuba usisize ngesikhathi esizayo, sihlale sithandana kokuphela, sikukhonze ngenhliziyo zethu zonke, (sibe yisibonelo esihle ebantwaneni bethu), khona sizafinyelela emthimbeni ongapheliyo wasezulwini, sithokoze ndawonye, kanye labangcwele bonke, kuze kube nini lanini. Amen.
   
  (Ngiyakholwa... Baba wethu... Ekuhle Mariya... Udumo...)
   
  Umkhuleko walabo abawela esonweni sinye bephindaphinda
   
  Nkosi, Jesu Kristu, wasixwayisa wathi: “Uba ilihlo lakho lokunene likukhubekisa, likhuphe, ulilahle, uba isandla sakho sokunene sikukhubekisa, siqume usilahle, ngoba kungcono kuwe ukuba kubhubhe sibe sinye sezitho zakho kulokuba wonke umzimba wakho uphoselwe esihogweni.” Ungisize, Nkosi, ukuba ngehlukane sibili lesono sami lesi engisiphinda kanengi. Angithandi ukuba yisitha sakho kumbe ukukuzondisa, ngehlulwa yibuthakathaka bami engibuvumelayo. Khathesi sengizimisele ukuthi ngizanqanda amehlo ami, angakhangeli kulokho okungidonsela kiso, nginqande indlebe zami, ngikhuze inhliziyo yami, ingasikhanuki. Kangiyikuvuma ukuphakamisa unyawo lwami ukuba ngiye kuso, kangiyikuvuma ukuphakamisa isandla sami ukuba sifinyelele kuso. Ngisize, Nkosi, angisafuni ukuphinda ngisenze futhi ngize ngife. Wena ophila ubusa kuze kube laphakade. Amen.
   
  Umkhuleko womuntu ogulayo
   
  Nkosi, Nkulunkulu Baba, iNdodana yakho uJesu Kristu, yahamba isilisa abagulayo kulumhlaba. AbaPhostoli labangcwele labo babesilisa abagulayo ngokukhuleka kuwe. Ngiyacela, Nkosi ngebizo layo iNdodana yakho uJesu Kristu, ungibuyisele impilo enhle, nxa kuyintando yakho. Ake ungiphe isibindi lesineke, sokubekezela ebuhlungwini engikibo, ngihlawulele ngabo izono zami, ngibunikele kuwe insuku zonke ngabelane loKristu iNdodana yakho eyahluphekela thina, yona ephila ibusa kanye lawe, ndawonye loMoya oNgcwele, kuze kube laphakade. Amen.
   
  Umkhuleko walabo abonga izigulane
   
  Nkosi Jesu Kristu, wasitshengisa uthando lwakho kwabagulayo labahluphekayo ngokuhamba ubasiza, ubasilisa. Njalo wasitshela ukuthi ngosuku lokucina uzakuthi kithi, lokho esasikwenza kwabagulayo sasikwenza kuwe. Ngiyacela inhliziyo efuze eyakho kwabagulayo. Ngibathande njengoba wena wawubathanda, ngibazwele, ngibabekezelele kokuphela, ngibaduduze ebuhlungwini babo, ngibanike isibindi, ngibalethele ukusiliswa komzimba lokomphefumulo. Nginika isandla esihle emsebenzini wami, kube nguwe osebenzayo kimi, ngenxa yokuthanda kwakho imiphefumulo, langenxa kaYihlo, ophila ebusa kanye lawe loMoya oNgcwele kuze kube laphakade. Amen.
   
  Umkhuleko wabalupheleyo
   
  Nkosi Nkulunkulu Somandla Simakade, ngiyakubonga ngeminyaka eminengi owanginika yona emhlabeni. Khangela, khathesi sengiluphele, angiselamandla okukusebenzela lokukukhonza njengokufisa kwami. Njengoba usungilondolozile kulokhu kuphila ngenxa yokungithanda kwakho, ngiyacela, Baba, ukuba ugcwalise inhliziyo yami ngoMoya wakho oNgcwele, ukuze ngikuthande ngenhliziyo yami yonke langomoya wami wonke, ngemukele bonke ubuhlungu bokuluphala lenhlupheko zonke ngokuthokoza, ngoba konke kuvela kuwe. Akwenze ukuba ngiqede yonke inhlawulo yezono zami ngisaphila, ukuze kuthi mhla ungibizayo ngindizele ekhaya lakho lasezulwini. Ngicela ngoKristu iNkosi yethu. Amen.
   
  Ukukhulekela abazali abafayo
   
  Nkulunkulu Baba, Mninimandla wonke, ake uhawukele abazali bami owabathathayo ubathethelele yonke imilandu abangabe beselayo kuwe, ufinyeze isikhathi sokuhlawulela kwabo iziphambeko zabo, ngenxa yokuhlupheka lokufa kweNdodana yakho uJesu Kristu, langenxa yemikhuleko yami leyeBandla lakho eliNgcwele. Sicela ngaye uKristu iNkosi yethu. Amen.
   
  Ukukhulekela ukufa okuhle
   
  Nkosi Jesu Kristu, Msindisi wami othandekayo, ngiyakuncenga ngokuhlupheka kwakho langokufa kwakho okungcwele, ukuba ungisize esikhathini sokufa kwami, ungisindise ezinsizini zonke zalesosikhathi. O! Jesu olesihawu esingapheliyo, ngihawukela, ungingenise ezulwini, khona ngizathokoza ndawonye labangcwele bonke, ngikuthande kokuphela, ngikubonge kuze kube nini lanini. Amen.
   
 

next page