PRAYER BOOK

	Imilayo yeBandla

	Londoloza iSonto lemikhosi emikhulu yeBandla, ube khona eNkonzweni eNgcwele uyekele lokusebenza. Londoloza insuku zokuzila inyama lokusutha kanye kuphela ngelanga. (NgoLwesithathu lomlotha langoLwesihlanu oluNgcwele) Ungaboqeda umnyaka wonke ungenzanga imvumo. (ngesikhathi sePhasika) Ngesikhathi sePhasika ubokwamukela iSidlo esiNgcwele. Siza iBandla lakho ngokukhupha isondlo seBandla langezinye indlela zokulisiza.

	Umkhuleko phambi kwesiphambano

	O! Jesu olungileyo, omnene, olomusa, khangela, ngiguqa phansi phambi kwakho ngikuncenga ngenhliziyo yami yonke, langomphefumulo wami wonke, ukuba ungiphe ukholo olujulileyo, lethemba eliqinileyo, lothando oluvuthayo, ukuze ngizisole ngezono zami zonke, ngingaphindi ukona futhi. Nxa ngikhangela amanxeba akho amahlanu, nginakana ngawo, ngikhumbula amazwi ehubo likaDavida athi: “Babhobozile izandla lenyawo zami, babale wonke amathambo ami,” ngehlelwa yibuhlungu obukhulu. Ngakhoke, akungiphe amandla akho Nkosi ukuba nginqobe zonke izilingo zikaSathane. Amen.

	Umkhuleko wangoLwesihlanu

	Ngiyakubonga, Jesu wami, wena owafa ngenxa yami, wangihlenga ezonweni, ngokufa kwakho esiphambanweni. Ngiyakuncenga ukuba ungihawukele khathesi, lamhla ngifayo. Jesu, ngiyakuphilela, Jesu, ngiyakufela; Jesu, ngingowakho, khathesi laphakade. Amen.

	Umkhuleko kuMoya oNgcwele

	Nkulunkulu wena ofundisa abakholwayo ngokukhanya kukaMoya oNgcwele, akwenze ukuba ngaye uMoya oNgcwele, sihlakaniphele kokuphela okulungileyo, sithokoze, sithatshiswe nguye, sibe ngcwele njengoba wena uNgcwele. Sikucela ngoKristu iNkosi yethu. Amen.

	Kusithunywa esingcwele esingilondolozayo

	Sithunywa esingcwele, uNkulunkulu wakubeka ngomusa wakhe ukuba ube ngumlondolozi wami, ungikhanyisele, ungilondoloze, ungiqondise, ungaluse lamuhla. Amen.

	Kuzithunywa zonke

	Lina Mikhayeli, loGabriyeli, loRafayeli, lezithunywa zonke ezingcwele, lisikhulekele.

	Isithunywa seNkosi

	K. Isithunywa seNkosi sabika kuMariya; B. Wemula ngamandla kaMoya oNgcwele. K. Ekuhle Mariya... B. Mariya oNgcwele... K. UMariya wathi: Khangela ngiyincekukazi yeNkosi; B. Kakube kimi njengokutsho kwakho. K. Ekuhle Mariya... B. Mariya oNgcwele... K. ULizwi waba yiNyama; B. Wahlala phakathi kwethu. K. Ekuhle Mariya... B. Mariya oNgcwele... K. Sikhulekele, Nina oNgcwele kaNkulunkulu; B. Ukuba senziwe sifanele asithembisa khona uKristu.

	Kasikhulekeni: Nkosi siyakucela ukuba uthele amandla akho enhliziyweni zethu, ukuze kuthi thina esaziswa yisithunywa ukuba ngumuntu kukaKristu iNdodana yakho, sifmyelele ebukhosini basezulwini, ngenxa yokuhlupheka lokufa, lovuka kwayo. Sicela ngaye uKristu iNkosi yethu. Amen.

	Nkosikazi yezulu

	K. Nkosikazi yezulu thokoza, Aleluya! B. Ngoba lowo owawufanele ukumbeletha, Aleluya! K. Uvukile njengokutsho kwakhe, Aleluya! B. Usikhulekele kuNkulunkulu, Aleluya! K. Thaba uthokoze, Virigo Mariya, Aleluya! B. Ngoba iNkosi, ivukile sibili, Aleluya!

	Kasikhulekeni: Nkulunkulu, wena owathanda ukuthokozisa umhlaba ngokuvuka kweNdodana yakho, iNkosi yethu uJesu Kristu, siyakuncenga, ukuba ngoNina weNkosi yethu uJesu Kristu, yenza ukuba sizuze intokozo zokuphila okulaphakade. Sicela ngaye uKristu iNkosi yethu. Amen.

	Nkosikazi yami, Mama

	Nkosikazi yami, Mama, ngiyazinikela kuwe, ngikunika okwami konke, ngibonakalisa ukukuthanda kwami. Ngiyakunika lamhla amehlo ami, indlebe zami, umlomo wami, inhliziyo yami: ngitsho loqobo lwami lonke. Bonake sengingowakho, Mama olungileyo, ungilondoloze, ungilamulele njengomntanakho. Amen.

	Khumbula Mariya

	Khumbula, Mariya Virigo elilungileyo kakhulu, ukuthi kakuzange kuzwakale ukuba ukhona owake wadelwa nguwe, ebalekela kuwe, nqaba yethu, ekuncenga ukuba umlalele, ekunxusa ukuba umkhulekele. Ngakho-ke, ngethemba elinjalo, ngiyaphangisa, ukuza kuwe, Virigo lamavirigo, Mama. Sengimi phambi kwakho, ngikhala mina soni. O, Nina kaLizwi, ungawadeli amazwi ami, kodwa uwalalele ngomusa wakho. Amen.

	Ekuhle Nkosikazi

	Ekuhle, Nkosikazi, Mama olomusa, oyisiphephelo sethu, legugu lethu, lethemba lethu, Ekuhle! Siyamemeza kuwe thina abakaEva abaxotshiweyo. Siyabubula kuwe, sikhala kulelilizwe lezinyembezi. Ngakhoke, wena mkhulumeli wethu, phendulela kithi amehlo akho alomusa, usitshengise uJesu oyinzalo ebusisiweyo yesisu sakho, mhla sifayo; wena Mariya, Virigo elilomusa, elichumileyo, elilungileyo. Amen.

	Sibalekela kuwe

	Sibalekela kuwe, nqaba yethu, Mzali ongcwele kaNkulunkulu. Ungasideli lapho sikuncenga, sikhathazekile, kodwa ube lokhu usikhupha ebunzimeni usivikela lasezingozini zonke. Wena Virigo elidumileyo, elibusisiweyo. Amen.

	KuJosefa oNgcwele

	Josefa oNgcwele, mlondolozi waba lobumhlophe benhliziyo, wena owathembeka kuNkulunkulu, waze wabeka ezandleni zakho uJesu Kristu, iNdodana yakhe, loMariya, iVirigo eliNgcwele, ukuba ubalondoloze. Ngiyakuncenga ngabo, ukuba ungicelele amandla okwehlula izilingo zomzimba ukuze ngikhonze uNkulunkulu ngengqondo ehlambulukileyo, langenhliziyo emhlophe, langomzimba omsulwa. Amen.

	Kumngcwele wami

	(Qamba ibizo lomngcwele wakho) *...* ongcwele, wena engaphiwa ibizo lakho eMbhabhathizweni, mmeli wami wasezulwini, ngiyakubonga ngakho konke ongenzele khona: ukungilondoloza kwakho, lokungikhulekela kwakho kokuphela kuNkulunkulu. Ngiyambonga uNkulunkulu ngokukuphathisa kwakhe ukuba ufike ezulwini. Njengoba mina ngiselapha elizweni lezilingo lobunzima obungapheliyo, ngiyakuncenga ukuba ungisize, ungicelele kokuphela kuNkulunkulu, ukuba angiphe amandla okwehlula izilingo lokumkhonza ngobuqotho njengawe; khona ngizakuba lawe ezulwini, ngimbone uNkulunkulu kanye lawe, sithokoze ndawonye kuze kube nini lanini. Amen.

	Ukukhulekela abafileyo

	Nkosi, baphe ukuphumula okungapheliyo, lokukhanya okulaphakade kubakhanyele, angathi bangaphumula ngobuhle. Amen.

	Umkhuleko kaFransisi ongcwele waseAssisi

	Nkosi, ngenze ngibe linxusa lokuthula kwakho: Kwabazondanayo, ngilethe ukuthandana; Kwabathandabuzayo, ngilethe ukukholwa; Kwabaphelelwa lithemba, ngilethe ithemba; Kwabasebumnyameni, ngilethe ukukhanya; Kwabadanileyo labasosizini, ngilethe ukuthaba. Yenza ukuba ngingadingi ukududuzwa, ngidinge kuphela ukududuza abanye; Ngingadingi ukuzwisiswa ngabanye, kodwa ukuzwisisa abanye; Ngingadingi ukuthandwa ngabanye, kodwa ukuthanda abanye. Ngoba nxa sisipha ngomusa: siphiwa ngomusa; Nxa sithethelela siyathethelelwa; Nxa sifela eNkosini, siqalisa impilo entsha engapheliyo. Amen.

	Izikhalazo zikaAgastini ongcwele

	Nkosi Jesu, akungenze ngizazi kuhle, ngikwazisise lawe. Ngingalangathi lutho, ngaphandle kwakho. Yenza ukuba ngingazithandi mina, ngithande wena. Yenza ukuba konke engikwenzayo ngikwenzele ukuthabisa wena. Yenza ukuba ngizehlise kokuphela, ngiphakamise wena. Yenza ingqondo yami ingacabangi ngokunye, icabange ngawe kuphela. Yenza ngibe ngosefile kimi, osephila kuwe. Yenza ngamukele ngokujabula konke okuvela kuwe. Yenza ngizidele ngokupheleleyo, ngilandele wena, ngingadinwa yikulangazelela ukukulandela. Yenza ngibalekele intando yami, ngiphephele kuwe, ukuze ngibe lenhlanhla yokuvikelwa nguwe. Yenza ngesabe ubuthakathaka bami; ngesabe ulaka lwakho. Yenza Nkosi, ukuba ngibe ngomunye walabo obakhethileyo. Yenza ukuba ngingazithembi mina, kodwa ngithembe wena. Yenza ukuba ngilalele kokuphela ngenxa yakho. Yenza nginganamatheli kolunye ulutho, ngaphandle kwakho. Yenza ngivume ukuba ngumyanga, ngenxa yakho. Akungikhangele ngamehlo akho, Nkosi ukuze ngikuthande. Akungibize ngelizwi lakho, Nkosi ukuze ngibonane lawe, ngithokoze ngokuba lawe kuze kube nini lanini. Amen.

	Ukuzahlukanisela uJesu

	Nkosi Jesu Kristu, ngiyakunika izandla zami, ukuba zenze umsebenzi wakho. Ngiyakunika inyawo zami, ukuba zihambe endleleni zakho. Ngiyakunika amehlo ami, ukuba ngibone ngawo njengoba wena ubona. Ngiyakunika ulimi lwami, ukuba lukhulume amazwi akho. Ngiyakunika umkhumbulo wami, ukuba kube nguwe okhumbulayo ukimi. Ngiyakunika umoya wami, ukuba kube nguwe okhulekayo phakathi kwami. Phezu kwakho konke, ngiyazinikela kuwe, ukuba ukhule phakathi kwami. Khona kuzakuba nguwe Nkosi Jesu, ohlala kimi, osebenza ukimi, lokhuleka ukimi. Amen.

	Umkhuleko wokuzinikela eNhliziyweni eNgcwele kaJesu

	Nkosi Jesu, Msindisi wabantu, ake usikhangele thina esiguqe ngamadolo phambi kwakho. Sithanda ukuzinikela kuwe, sibe ngabakho. Ngakho-ke lamhla sizinikela eNhliziyweni yakho eNgcwele, ukuze simanyaniswe lawe kokuphela. Banengi abangakwaziyo, Nkosi labadelela imilayo yakho engcwele. Bahawukele bonke, Jesu olomusa wonke, ubaholele bonke, enhliziyweni yakho eNgcwele. Ungavumi ukuba thina esikholwa kuwe, sehlukane lawe, loba sekunjani. Mhla sibhabhathizwa samlahla uSathane, lemisebenzi yakhe, lobukhosi bakhe, lentokozo zakhe. Siyaphinda lamuhla isithembiso leso. Sifuna ukulalela wena leBandla lakho kokuphela. Siphe umusa wakho, ukuze sibe lamandla okugcina imilayo yakho, lokukuthanda ngenhliziyo zethu zonke, khona sizakuba lawe ekuthokozeni okungapheliyo. Amen.

	Ukukhulekela abazali

	Nkulunkulu Baba, akukhangele konke okuhle abazali bami abangenzela khona, ubabusise, (ubaphilise isikhathi eside), ubaphe umvuzo wokuphila okulaphakade ezulwini. NgoKristu iNkosi yethu. Amen.

	next page