UKUKHULEKA
   
  Isingeniso
   
 

UNkulunkulu, unguMdali wethu, osithanda ngothando olukhulu olumangalisayo, nguye osipha konke esilakho; okomoya lokomzimba. Ngenxa yokusithanda kwakhe, wasithumela iNdodana yakhe eyodwa, uJesu Kristu, ukuba izosisindisa, isivulele indlela eya ekhaya lakhe lasezulwini. Amandla onke okuphila kwethu siseselapha emhlabeni langemva kokufa kwethu, akuye uNkulunkulu kuphela. Ngakhoke, ngenxa yomusa, lothando, lamandla akhe asisizayo, kufanele size kuye silezinswelo zethu. Inkonzo ngokwayo ingumkhuleko omkhulu wabantwana bakaNkulunkulu, bebuthene ndawonye beliBandla.

Ngaphandle komkhuleko owenziwa eNkonzweni eziNgcwele, kufanele omunye lomunye wethu afunde ukukhuleka eyedwa eletha izinswelo zakhe, lezemuli yakhe kanye lezabanye abaswela ukukhulekelwa. Kanti futhi nxa sisemaqenjini esiKristu atshiyeneyo, silesibopho sokukhuleka ngoba phela umkhuleko yiwo osimanyanisayo lophumelelisa injongo zethu ezinhle. Umkhuleko uveza ngokubalulekileyo ukukholwa, ukuthemba lokumthanda kwethu uNkulunkulu. UNkulu-nkulu kumele simthande phezu kwezinto zonke, simkhonze ngenhliziyo zethu zonke, sigcine imilayo yakhe ngokuthe-mbeka. Nxa sikhuleka siyabe sivuma ukuthi thina ngokwe-thu singeze saziphilisa kumbe singeze sazenzela ulutho oluhle ngaphandle kokuthi konke kuvela kuNkulunkulu. Umkhuleko uqakathekile kuwo wonke umuntu okholwa kuNkulunkulu, lakuNdodana yakhe, uJesu Kristu, ngoba uyikudla, lenotho yomphefumulo. UJesu Kristu nguye owaba yisibonelo sakuqala kubo bonke abakholwa kuye, ngoba impilo yakhe yayiyimpilo yomkhuleko.

Kwathi uJesu esezaqala umsebenzi wokutshumayela, waya enkangala, wakhuleka, wazila ukudla. Engakakhethi abafundi abalitshumi lambili, wakhuleka ubusuku bonke. UJesu wabuya wafundisa abafundi bakhe ukukhuleka; (Luka 11,1-4).

Lasesiphambanweni wakhuleka. Lokhu kubonakalisa ukuqakatheka kokukhuleka. Umkhuleko ngowezikhathi zonke, kodwake, siyawuswela kakhulu ngesikhathi sobunzima. UJesu wathi: Lindani, likhuleke ukuze lingangeni ekulingweni, umoya uyavuma kodwa inyama ibuthakathaka; (Marko 14,38; Mat 26,41; Joha 16,24). UKristu engakenyukeli ezulwini, wathembisa ukuthi uzasithumela uMoya oNgcwele ukuba azosisiza ezintweni zonke. UMoya oNgcwele nguye okhanyisela ingqondo zethu, enze inhliziyo zethu zitshisekele ukukhuleka. Ngakhoke, asimnxuseni kanengi ukuba asifu-ndise okuhle.

   
  Imikhuleko yonke iqondiswa kuNkulunkulu
   
 

Nxa sikhuleka siqondisa imikhuleko yethu kuNkulunkulu munye sicelelwa yiNdodana yakhe uJesu Kristu, sincediswa nguMoya oNgcwele. Ekukhulekeni kwethu sikhuleka loMariya, lezithunywa, labangcwele bonke siqondisa imithandazo yethu kuNkulunkulu ngoba nguye yedwa okhonzwayo, lesikhuleka kuye. Silokholo lokuthi laba njengoba bekuNkulunkulu balamandla okusicelela. Lokhu akwehlisi isithunzi, lodumo lukaNkulunkulu, ngoba ngoMama uMariya, lezithunywa, labangcwele sidumisa yena uNkulunkulu.

   
  Okunye okusetshenziswa ekukhulekeni
   
 

Ngaphandle kwemikhuleko yethu sicelelwa nguMama uMariya, uNina kaJesu, lezithunywa, labangcwele bonke, singasebenzisa imifanekiso, lezithombe lokunye okudaliweyo ukuze ngakho sibone amandla lothando lukaNkulunkulu kusisondeze kuye. Isinkwa lewayini ngezinye zezinto ezisetshenziswa eNkonzweni yeMisa eNgcwele. Ngokusebenzisa lokhu sigcwalisa umlayo kaJesu mhla emisa iSidlo esi-Ngcwele. Imifanekiso kaJesu, lekaMariya, leyabangcwele bonke, iyindlela elula yokusondeza ingqondo lemicabango yethu kuKristu. IRosali, lesiPhambano, lakho kusebenza umsebenzi ofananayo wokusondeza abantu kumfihlakalo ezingcwele zikaNkulunkulu. Kufanele sinanzelele ukuthi uMariya, lezithunywa, labangcwele bonke, lemifanekiso yabo, isiphambano, iRosali kanye lokunye esikusebenzisa ekukhu-lekeni, akukhonzwa, akuthathi ndawo lodumo lukaNkulu-nkulu.

   
  Amadlozi
   
 

Esintwini abantu baqakathekisa ukuthethela amadlozi belokholo lokuthi amadlozi azabacelela kuNkulunkulu. Kodwa ngokholo lwethu lwesikristu, siyakwazi ukuthi uNkulunkulu unguBaba wethu. Ngakhoke, silamandla okukhuluma laye thina ngokwethu. UNkulunkulu siyamkhonza, kodwa abangcwele siyabahlonipha. Singacela abangcwele labo bonke abafa belethemba kuNkulunkulu ukuba basicelele, basivikele emikhuhlaneni, lezingozini zonke ezingasehlela. Abangcwele siyabahlonipha ngenxa yokuthi bangabangane bakaNku-lunkulu. Abazali bethu abafa belethemba kuNkulunkulu balamandla okusikhulekela.

Kuyinto enhle kakhulu ukukhumbula abafileyo bethu, ngemikhuleko langeMisa eNgcwele ukuze uNkulunkulu abemukele ekhaya lasezulwini. Ngakhoke, senzela abafileyo umhlabiso wesikhumbuzo (iMisa eNgcwele) ukuze bathethelelwe izono zabo; (2 Makhabi 12,38-45).

   
  Izingoma
   
 

Nxa sihlabela siphakamisele inhliziyo zethu, lemiphefumulo yethu kuNkulunkulu. Ukuhlatshelwa kwazo kuyasivuselela, kusinike amadlabuzane okudumisa uNkulunkulu. Ngenye indlela, izingoma ziyikukhuleka okuphindiweyo. Izingoma zihaya indaba eziqakathekileyo empilweni yabantu, ziveze umumo esikiwo, zikhombisa lezikhathi zomnyaka weBandla. Ziyasiduduza, zisijabulise, zisikhokhelela emoyeni wokukhuleka kuNkulunkulu.
   
 

IMIKHULEKO YENSUKU NGENSUKU

   
  Isibonakaliso sesiphambano
   
  Ngebizo likaYise, + leleNdodana, lelikaMoya oNgcwele. Amen.
   
  Umkhuleko weNkosi
   
  Baba wethu osezulwini, alidunyiswe ibizo lakho, awuze umbuso wakho, intando yakho ayenziwe emhlabeni njengasezulwini. Sipha lamhla ukudla kwethu okwansuku zonke, usixolele izono zethu njengalokhu lathi sibaxolela abasonayo thina. Ungasingenisi ekulingweni, kodwa usisindise ekubini. Amen.
   
  Ekuhle Mariya
   
  Ekuhle Mariya, ugcwele igrasiya, iNkosi ilawe, ubusisiwe wena esifazaneni, ibusisiwe lenzalo yesisu sakho uJesu. Mariya oNgcwele, Nina kaNkulunkulu, usikhulekele thina zoni, khathesi lasesikhathini sokufa kwethu. Amen.
   
  Udumo
   
  Udumo kalube kuYise, lakuNdodana, lakuMoya oNgcwele. Njengoba kwakunjalo ekuqaleni, kusenjalo lakhathesi, kuzakuba njalo kuze kube laphakade. Amen.
   
  Ukukhuleka kuJesu
   
  Nkosi Jesu Kristu, Ndodana kaNkulunkulu, Msindisi wethu, akungihawukele mina soni. Amen.
   
  (Emabandleni asempumalanga usetshenziswa uphindwaphindwa njengeRosali).
   
  UMvumukholo wabaphostoli
   
  Ngiyakholwa kuNkulunkulu uYise uMninimandla wonke, uMdali wezulu lomhlaba, lakuJesu Kristu iNdodana yakhe eyodwa, iNkosi yethu; owemulwa ngamandla kaMoya oNgcwele, wazalwa liVirigo uMariya. Wahlutshwa ekubuseni kukaPhonsiyo Philathu, wabethelwa esiphambanweni, wafa, wangcwatshwa, wehla waya kwabafileyo. Ngelanga lesithathu wabuya wavuka ekufeni, wenyuka waya ezulwini. Uhlezi esandleni sokunene sikaYise lapho azavela khona, ezothetha amacala abaphilayo labafileyo. Ngiyakholwa kuMoya oNgcwele; iBandla eliNgcwele eliKhatholika; ukumanyana kwabangcwele, ukuthethelelwa kwezono, ukuvuka komzimba ekufeni, lokuphila okulaphakade. Amen
   
  Ukukholwa
   
  Nkulunkulu wami, ngiyakholwa kuwe, ngiyakholwa konke okufundiswa liBandla lakho. Ngiyakholwa ngoba watsho wena; ilizwi lakho liliqiniso. Nkulunkulu wami, yandisa ukukholwa kwami! Amen.  
   
  Ukuthemba
   
  Nkulunkulu wami; ngiyathemba kuwe, ngoba ulamandla wonke, ulomusa ongakhawukiyo. Nkulunkulu wami, yandisa ukuthemba kwami! Amen.
   
  Ukuthanda
   
  Nkulunkulu wami ngiyakuthanda. Yenza ukuba ngikuthande phezu kwezinto zonke, ngoba umuhle phezu kwakho konke okuhle; ngimthande lowakhelene lami njengoba ngizithanda mina. Nkulunkulu wami, yandisa ukukuthanda kwami! Amen.
   
  Ukuzisola ngezono
   
  Nkulunkulu wami, inhliziyo yami ibuhlungu kakhulu, ngoba ngikonile wena Baba olobuhle obungapheliyo. Sengizimisela ukukuthanda phezu kwakho konke okudaliweyo. Ngiyazizonda izono zami zonke; ungisize ngamandla akho, ngingaphindi ukwenza isono. Amen.
   
  Imikhuleko yokudla
 

Sekuzadliwa:

Nkulunkulu Baba, akubusise lokhu kudla esikuphiwe nguwe. NgoJesu Kristu iNkosi yethu. Amen.

   
 

Sekudliwe:

Siyabonga, Nkulunkulu Baba, ngakho konke okuhle osipha khona. NgoJesu Kristu iNkosi yethu. Amen.

   
  Umkhuleko wekuseni
   
  Ngiyakholwa kuwe, Nkulunkulu wami, yenza ngikuthande ngenhliziyo yami yonke. Ngiyakubonga ngoba ungilondolozile kulobubusuku. Konke engizakwenza lamhla ngizakwenzela ukudumisa lokuthanda wena. Konke ukuhlupheka okuzangivelela ngizabekezela kukho ngenxa yakho, ngihlawulele ngakho izono zami. Ngithanda ukuzuza zonke izibusiso ezizuzakala ngemikhuleko langemisebenzi yami. Baba, Nkosi, ngilondoloze futhi lamhla, ungisize ukuba ngixwaye konke ukona. Amen.
   
  (Baba wethu, Ekuhle Mariya, Udumo, Sithunywa esingcwele)
   
  Umkhuleko wakusihlwa
   
 

Nkulunkulu Baba, ngiyakubonga ngosuku lwalamuhla onginike lona, langakho konke okomoya lokomzimba, ongenzele khona. Ngiyethula kuwe konke okuhle engikwenzileyo, ngikubonga ngokungisiza kwakho kukho konke, ngoba ngaphandle kwakho bengingasoze ngenze lutho oluhle. Zinengi iziphambeko engizenzileyo lamhla, lamaphutha engibe lawo ekukukhonzeni.

 

(Hlolisisa inhliziyo yakho ngezono)

 

Sengizisola Baba ngokudabuka, ngisithi:

 

Nkulunkulu wami, inhliziyo yami ibuhlungu kakhulu ngoba ngikonile wena...

 

Ake ungemukele njalo, ngithandeke kuwe, ngingabuyi ngehlukaniswe yilutho lawe. Ungilondoloze kulobubusuku, ungivikele ezingozini zonke, ezomphefumulo lezomzimba; ulondoloze labazali bami lezinini, labangane bami.

 

(Baba wethu, Ekuhle Mariya, Udumo, Sithunywa esingcwele)

 

Ngiyazi ukuthi ngizakufa, kodwa kangazi ukuthi nini, kumbe njani, loba ngaphi. Into engiyaziyo yinye: ukuthi ngingafa ngilesono esibulalayo ngizakuya emlilweni, ngingasindiswa lanini. Jesu, loMariya, loJosefa, ngibeka ezandleni zenu umphefumulo wami. Jesu, loMariya, loJosefa, lingisize lapho sengisifa. Jesu, loMariya, loJosefa, wobani lami lapho umoya wami usuphuma.

   
  Imilayo elitshumi kaNkulunkulu
   
 

Mina ngiyiNkosi uNkulunkulu wakho, ungabi labanye oNkulunkulu ngaphandle kwami.

Ungaliphathi ngeze ibizo leNkosi uNkulunkulu wakho.

Khumbula ukulondoloza usuku lweSonto ulwenze lube Ngcwele.

Yazisa uyihlo lonyoko, khona uzakuhlala kuhle, uhlale isikhathi eside futhi emhlabeni.

Ungabulali.

Ungafebi.

Ungebi.

Ungaqambeli amanga owakhelene lawe.

Ungakhanuki umfazi kamakhelwana wakho.

Ungahawukeli impahla kamakhelwana wakho.

   
 

next page